Levitico 2:1-16

  • Daton a bukbukel (1-16)

2  “‘No adda mangipaay ken Jehova iti daton a bukbukel,+ masapul a napino nga arina nga ikkanna iti lana ken olibano.+  Kalpasanna, ipanna kadagiti papadi nga annak ni Aaron, ket mangrakem ti padi iti napino nga arina ken lana ken amin nga olibano sa ipuorna iti rabaw ti altar kas simbolo ti datonna.*+ Maysa daytoy a daton a mapuoran a makaay-ayo* ti banglona ken Jehova.  Kukua ni Aaron ken dagiti annakna+ ti matedda iti daton a bukbukel kas nasantuan unay+ a daton a mapuoran para ken Jehova.  “‘No mangipaayka iti daton a bukbukel a naluto iti urno, masapul a naaramid iti napino nga arina, awan lebadurana a sinansingsing a tinapay a nalaokan iti lana wenno awan lebadurana a naingpis a tinapay a napulagidan iti lana.+  “‘No mangipaayka iti daton a bukbukel a naluto iti daplat a pariok,+ masapul a naaramid iti napino ken awan lebadurana nga arina a nalaokan iti lana.  Mapispisi ken maikkan dayta iti lana.+ Maysa daytoy a daton a bukbukel.  “‘No mangipaayka iti daton a bukbukel a naluto iti pariok, masapul a naaramid iti napino nga arina a nalaokan iti lana.  Ipanmo ken Jehova daytoy a daton a naaramid kadagita a ramen, sa maited iti padi a mangyasideg iti altar.  Mangala ti padi iti sumagmamano iti daytoy a daton kas simbolo ti datonmo*+ ket ipuorna iti altar. Maysa daytoy a daton a mapuoran a makaay-ayo* ti banglona ken Jehova.+ 10  Kukua ni Aaron ken dagiti annakna ti matedda iti daton a bukbukel kas nasantuan unay a daton a mapuoran+ para ken Jehova. 11  “‘No mangipaayka ken Jehova iti daton a bukbukel, masapul nga awan lebadurana+ ta saan a mabalin ti mangpuor iti maysa a banag nga addaan lebadura wenno diro kas daton ken Jehova. 12  “‘Mabalinmo nga idaton dagita ken Jehova kas umuna a bungbunga ti apitmo,+ ngem saan a maipan iti altar kas daton a makaay-ayo* ti banglona. 13  “‘Masapul a maasinan ti amin a datonmo a bukbukel. Dimo liplipatan nga asinan,+ ta ti asin ti mangipalagip kenka iti tulagmo iti Dios. 14  “‘No mangipaayka ken Jehova iti daton a bukbukel kas umuna a naluom a bungbunga ti apitmo,+ masapul a saan pay a natangkenan a dawa* a nakirog ken natumek. 15  Ikkam dayta iti lana ken olibano. Maysa daytoy a daton a bukbukel. 16  Puoran ti padi ti sumagmamano iti natumek a bukbukel a naikkan iti lana ken olibano kas simbolo ti daton*+ ken Jehova.

Footnotes

Wenno “kas pakalaglagipan (mangirepresentar) a paset dayta.”
Wenno “makapabang-ar.” Lit., “makapakalma.”
Wenno “kas pakalaglagipan (mangirepresentar) a paset dayta.”
Wenno “makapabang-ar.” Lit., “makapakalma.”
Wenno “makapabang-ar.” Lit., “makapakalma.”
Wenno “berde pay laeng a dawa.”
Wenno “kas pakalaglagipan (mangirepresentar) a paset dayta.”