Josue 2:1-24

  • Mangibaon ni Josue iti dua nga espia idiay Jerico (1-3)

  • Ilemmeng ni Rahab dagiti espia (4-7)

  • Kari ken Rahab (8-21a)

    • Nalabaga a tali kas pagilasinan (18)

  • Agsubli dagiti espia ken Josue (21b-24)

2  Manipud idiay Sitim,+ sililimed a nangibaon ni Josue nga anak ni Nun iti dua a lallaki nga espia. Kinunana kadakuada: “Inkay kitaen ti daga, nangruna ti Jerico.” Idi nakadanonda sadiay, napanda iti balay ti maysa a balangkantis nga agnagan iti Rahab+ ket nagdagusda sadiay.  Naipadamag iti ari ti Jerico: “Adda lallaki nga Israelita nga immay ita a rabii tapno agespia iti pagiliantayo.”  Isu nga impaibilin ti ari ti Jerico ken ni Rahab: “Iruarmo dagiti lallaki nga adda iti balaymo, ta immayda agespia iti intero a pagiliantayo.”  Ngem nailemmengen ni Rahab ti dua a lallaki ket kinunana: “Agpayso nga adda lallaki nga immay ditoy, ngem diak ammo no tagaanoda.  Itay sumipngeten sakbay a maiserra ti ruangan ti siudad, pimmanawdan. Diak ammo no napanandan, ngem no kamatenyo ida itan, sigurado a makamakamyo ida.”  (Ngem pinaulina idan iti atep ket pinaglemmengna ida iti nagbabaetan dagiti nayaplag nga ungkay ti lino.)  Isu a kinamat ida dagiti lallaki nga imbaon ti ari agingga iti paset ti Jordan a pagballasiwan,+ ket nairikep ti ruangan ti siudad apaman a nakaruar dagiti kumamkamat kadakuada.  Sakbay a maturog ti dua nga espia, immuli ni Rahab iti atep nga ayanda.  Kinunana: “Masiguradok nga itedto ni Jehova kadakayo ti dagami+ isu a mabutengkami kadakayo.+ Agkakapsut aminen dagiti umili gapu iti butengmi kadakayo,+ 10  ta nadamagmi no kasano a binisngay ni Jehova ti Nalabaga a Baybay tapno makapagnakayo iti namaga a lansadna idi pimmanawkayo idiay Egipto.+ Naammuanmi met ti inaramidyo iti dua nga ari dagiti Amoreo a da Sihon+ ken Og+ a pinapatayyo iti bangir* ti Jordan. 11  Nagbutengkami* idi nangngegmi dayta ket awanen ti turedmi a lumaban* kadakayo, ta ni laeng Jehova a Diosyo ti Dios ti langit ken ti daga.+ 12  Ita, agsipud ta impakitak ti napudno nga ayat kadakayo, ikariyo kaniak iti nagan ni Jehova nga ipakitayonto met ti napudno nga ayat iti pamilia ni amak, ket ikkandak iti pagilasinan tapno ammok a paypaysuenyo ti imbagayo.* 13  Isalakanyonto koma ti biag ni amak, ni inak, ti kakabsatko a lallaki ken babbai, ken ti intero a pamiliada. Saandakami koma a patayen.”+ 14  Kinuna dagiti lallaki: “Irisgomi ti biagmi para kadakayo!* No dinakami ipulpulong, ipakitaminto met kadakayo ti napudno nga ayat ken kinamatalek inton ited kadakami ni Jehova ti dagayo.” 15  Kalpasanna, pinaulog ida ni Rahab iti tawa babaen ti tali, ta ti balayna ket adda iti rabaw ti pader ti siudad.+ 16  Imbagana kadakuada: “Inkayo iti kabambantayan ket aglemmengkayo sadiay iti tallo nga aldaw, tapno saandakayo a masarakan dagiti agsapsapul kadakayo. Agawidkayonto laengen inton makasublida.” 17  Kinuna dagiti lallaki: “Tungpalenminto ti inkarimi kenka+ 18  no la ket ta inton sakupenmi ti dagayo, igalutmo daytoy nalabaga a tali iti tawa a nangipaulogam kadakami. Ummongemto ditoy balaymo dagiti nagannakmo, kakabsatmo, ken ti amin a kapamilia ni amam.+ 19  No addanto asinoman a rummuar iti balaymo, isunto a mismo ti makimbasol iti ipapatayna, saan a dakami. Ngem no addanto asinoman a madangran* iti uneg ti balaymo, dakaminto ti mapabasol iti ipapatayna. 20  Ket no ipulongnakami,+ saanminto a tungpalen ti impaikarim kadakami.” 21  Kinuna ni Rahab: “Sige. Aramidek ti imbagayo.” Kalpasanna, pinalubosanna idan ket pimmanawdan. Idi kuan, inggalutna ti nalabaga a tali iti tawa. 22  Napan dagiti espia iti kabambantayan ket naglemmengda sadiay iti tallo nga aldaw agingga a nakaawiden dagiti agsapsapul kadakuada. Binirbirok ida dagiti agsapsapul kadakuada iti amin a dalan ngem saanda ida a nasarakan. 23  Kalpasanna, simmalogen ti dua nga espia manipud iti kabambantayan sa bimmallasiwda iti karayan. Napanda ken Josue nga anak ni Nun ket impadamagda ti amin a napasamak kadakuada. 24  Imbagada ken Josue: “Inted ni Jehova kadatayo ti intero a pagilian.+ Kinaagpaysuanna, kabutbutengdatayo ti amin nga umili.”+

Footnotes

Kayatna a sawen, iti daya.
Lit., “Narunaw ti pusomi.”
Lit., “awanen ti espiritu a timmaud iti maysa a lalaki.”
Wenno “mapagtalkan ti kariyo.”
Wenno “Dagiti kararuami ti matayto imbes a dakayo!”
Wenno “ima a mangsagid.”