Josue 7:1-26

  • Naabak ti Israel idiay Ai (1-5)

  • Kararag ni Josue (6-9)

  • Basol a nakaigapuan ti pannakaabak ti Israel (10-15)

  • Naibutaktak ti basol ni Acan ket naubor (16-26)

7  Ngem saan a matalek dagiti Israelita iti tulagan ta sinukirda ti bilin maipapan kadagiti bambanag a masapul a madadael. Ngamin, ni Acan+ nga anak ni Carmi, nga apoko ni Zabdi, iti pamilia ni Zera, iti tribu ni Juda, ket nangala iti dadduma a banag a masapul a madadael.+ Isu a nakapungtot ni Jehova kadagiti Israelita.+  Manipud Jerico, nangibaon ni Josue iti lallaki a mapan idiay Ai,+ iti daya ti Bethel+ nga asideg ti Bet-aven. Imbagana kadakuada: “Inkayo agespia iti daga.” Isu a napan dagiti lallaki tapno agespiada idiay Ai.  Idi nagsubli dagitoy nga espia, imbagada ken Josue: “Saan a kasapulan nga ibaonmo ti amin a soldado nga Israelita. Umanayen ti agarup 2,000 wenno 3,000 a makigubat idiay Ai. Dimo ibabaon amin ida ta bassit ti umili sadiay.”  Isu a napan ti agarup 3,000 a lallaki ngem nagatrasda idi kinamat ida dagiti lallaki ti Ai.+  Pinatay dagiti lallaki ti Ai ti 36 a lallaki nga Israelita, ket kinamatda ida manipud iti ruar ti ruangan ti siudad agingga idiay Sebarim.* Intultuloyda a pinatay ida iti salogan, isu nga awanen ti tured dagiti tattao.*  Pinigis ni Josue ti badona ket nagpakleb iti daga iti sango ti Lakasa ni Jehova agingga iti rabii, a kaduana dagiti panglakayen iti Israel, ket inikkanda iti tapok dagiti uloda.  Kinuna ni Josue: “O Kangatuan* nga Apo Jehova, apay nga imballasiwnakami iti Jordan tapno laeng iyawatnakami kadagiti Amoreo a mangdadael kadakami? Nasaysayaat koma a nagyankami lattan iti bangir* ti Jordan!  Pakawanennak, O Jehova. Ania pay ti makunak ita ta immatrasen ti Israel kadagiti kabusorna?  Inton madamag daytoy dagiti Canaanita ken ti amin nga umili, palikmutandakaminto ken papatayendakami amin ket saanton a malagip dagiti naganmi. Anianto ngaruden ti aramidem iti naindaklan a naganmo?”+ 10  Imbaga ni Jehova ken ni Josue: “Tumakderka! Apay a nakapaklebka? 11  Nagbasol ti Israel. Saanda a matalek iti tulagan+ ta saanda a nagtulnog iti imbilinko. Nangalada kadagiti bambanag a masapul a madadael,+ tinakawda+ dagita ken inlemmengda kadagiti sanikuada.+ 12  Saanto a kabaelan dagiti Israelita nga abaken dagiti kabusorda. Itarayandanto ida gapu ta isuda a mismo ket masapul a madadael. Addaakto kadakayo no la ket ta ikisapyo ti masapul a madadael.+ 13  Tumakderka ket pagbalinem a nasantuan dagiti tattao!+ Ibagam kadakuada, ‘Pagbalinenyo a nasantuan ti bagiyo inton bigat, ta daytoy ti imbaga ni Jehova a Dios ti Israel: “O Israel, adda iti tengngayo ti masapul a madadael. Pulos a saanyonto a maabak dagiti kabusoryo no saanyo nga ikkaten iti tengngayo ti masapul a madadael. 14  Inton bigat, aggugrupokayo sigun kadagiti tribuyo ket agpasangonto ti tribu a pilien ni Jehova.+ Aggugruponto met dagiti tattao iti dayta a tribu sigun kadagiti pamiliada, ket agpasangonto ti pamilia a pilien ni Jehova. Kalpasanna, aggugrupo ti tunggal sangakabbalayan. Agpasangonto ti sangakabbalayan a pilien ni Jehova, ket agpasangonto dagiti miembro ti sangakabbalayan a mapili. 15  Daydiay matakuatan a nangala kadagiti bambanag a masapul a madadael ket masapul a mapuoran,+ agraman ti amin nga adda kenkuana, gapu ta sinukirna ti tulag+ ni Jehova ken nakababain ti inaramidna iti Israel.”’” 16  Kabigatanna, nasapa a bimmangon ni Josue ket inummongna dagiti Israelita sigun iti tribuda, ket ti tribu ni Juda ti napili. 17  Kalpasanna, pinaasidegna dagiti pamilia iti tribu ni Juda ket ti pamilia dagiti Zeraita+ ti napili. Pinaasidegna dagiti Zeraita, ket ti pamilia ni Zabdi ti napili. 18  Idi kuan, pinaasidegna dagiti miembro ti pamilia ni Zabdi, ket napili ni Acan nga anak ni Carmi ken apoko ni Zabdi iti pamilia ni Zera, iti tribu ni Juda.+ 19  Kinuna ni Josue ken Acan: “Anakko, pangngaasim, padayawam ni Jehova a Dios ti Israel ket agpudnoka kenkuana. Pangngaasim ta ibagam kaniak ti inaramidmo. Dika aglibak.” 20  Kinuna ni Acan: “Agpayso a siak ti nagbasol ken Jehova a Dios ti Israel, ket kastoy ti inaramidko. 21  Idi nakakitaak iti nakapimpintas a bado a naggapu idiay Sinar+ ken 200 a siklo* a pirak ken maysa a bareta a balitok a 50 a siklo ti kadagsenna, nagustuak dagita isu nga innalak. Inkalik dagita iti daga iti uneg ti toldak, a dagiti kuarta ti makin-uneg.” 22  Dagus a nangibaon ni Josue iti lallaki ket nagtatarayda a napan iti tolda. Nasarakanda ti naikali a bado agraman ti kuarta, nga adda iti makin-uneg. 23  Inruarda dagita iti tolda ket impanda ken Josue ken iti amin nga Israelita sada indisso iti imatang ni Jehova. 24  Kalpasanna, innala ni Josue ken dagiti Israelita ni Acan+ iti pamilia ni Zera. Innalada met ti pirak, ti bado, ken ti bareta a balitok,+ agraman ti annakna a lallaki ken babbai, ken dagiti baka, asno, ken karnerona, kasta met ti toldana ken ti amin nga adda kenkuana. Impanda ida idiay Tanap* ti Akor.+ 25  Kinuna ni Josue: “Apay a nangaramidka iti pakadadaelanmi?*+ Ita nga aldaw, dadaelennaka met ni Jehova.” Gapuna, inubor isuna+ dagiti Israelita, sa pinuoranda ida.+ Inuborda amin ida. 26  Ginaburanda iti bato ti bangkay ni Acan. Agingga ita, adda pay laeng dagita a bato. Ket bimmaaw ti unget ni Jehova.+ Isu nga agingga ita, ti nagan ti lugar ket Tanap ti Akor.*

Footnotes

Kaipapananna, “Dagiti Pagtebbagan iti Bato.”
Lit., “a narunaw ti puso dagiti tattao ken nagbalin a kasla danum.”
Wenno “Soberano.”
Kayatna a sawen, iti daya.
Ti 1 siklo ket 11.4 g. Kitaem ti App. B14.
Wenno “Kapatagan.”
Wenno “pakadidigraanmi.”
Kaipapananna, “Pannakailaksid; Riribuk.”