Josue 22:1-34

  • Agawid dagiti tribu nga adda iti daya (1-8)

  • Altar a naibangon idiay Jordan (9-12)

  • Nailawlawag ti kaipapanan ti altar (13-29)

  • Nasolbar ti di pagkikinnaawatan (30-34)

22  Kalpasanna, pinaayaban ni Josue dagiti Rubenita, Gadita, ken ti kagudua ti tribu ni Manases  ket kinunana kadakuada: “Inaramidyo amin nga imbilin kadakayo ni Moises nga adipen ni Jehova,+ ket tinungpalyo ti amin nga imbilinko kadakayo.+  Pulos a diyo binaybay-an dagiti kakabsatyo agingga ita;+ ket kanayon a tinungpalyo ti bilin ni Jehova a Diosyo.+  Ket ita, pinagbalin ni Jehova a Diosyo a natalna ti kasasaad dagiti kakabsatyo, kas iti inkarina kadakuada.+ Mabalinyon ti agsubli kadagiti toldayo iti daga nga inted kadakayo ni Moises nga adipen ni Jehova iti bangir* ti Jordan.+  Isuna laeng ta siguraduenyo a tungpalen ti amin a bilin ken ti Linteg nga inted kadakayo ni Moises nga adipen ni Jehova,+ babaen ti panagayat ken Jehova a Diosyo,+ pannagna iti amin a dalanna,+ kanayon a panagtulnog kadagiti bilinna,+ panagbalin a matalek kenkuana,+ ken panagserbi kenkuana+ iti amin a puso ken iti amin a kararuayo.”*+  Kalpasan a binendisionan ida ni Josue, pinagawidna ida ket napandan kadagiti toldada.  Ti kagudua ti tribu ni Manases ket inikkan ni Moises iti tawid idiay Basan.+ Ti met sabali a kagudua dayta a tribu agraman dagiti kakabsatda ket inikkan ni Josue iti daga idiay laud ti Jordan.+ Idi pinagawid ida ni Josue kadagiti toldada, binendisionanna ida  ket imbagana: “Nabaknangkayo nga agsubli kadagiti toldayo. Nagadu ti iyawidyo a kinabaknang ken taraken, agraman pirak, balitok, gambang, landok, ken nakaad-adu a bado.+ Ibingayanyo dagiti kakabsatyo iti bambanag a naalayo+ kadagiti kabusoryo.”  Kalpasanna, manipud Shilo iti daga ti Canaan, nagawiden dagiti Rubenita, Gadita, ken ti kagudua ti tribu ni Manases ket pinanawanda ti dadduma nga Israelita. Nagsublida iti daga ti Gilead,+ ti tawidda a daga a pagyananda kas imbilin ni Jehova babaen ken Moises.+ 10  Idi nakadanon dagiti Rubenita, Gadita, ken ti kagudua ti tribu ni Manases iti asideg ti Jordan iti daga ti Canaan, nangibangonda sadiay iti nakadakdakkel nga altar iti abay ti Jordan. 11  Kalpasanna, nadamag dayta+ ti dadduma nga Israelita ket imbagada: “Dagiti Rubenita, Gadita, ken ti kagudua ti tribu ni Manases ket nangibangon iti altar iti maysa a paset ti daga ti Canaan iti asideg ti Jordan a kukuatayo.” 12  Idi naammuan dayta dagiti Israelita, nagtitiponda amin idiay Shilo+ tapno mapanda ida gubaten. 13  Imbaon dagiti Israelita ni Finehas+ nga anak ni Eleazar a padi a mapan kadagiti Rubenita, Gadita, ken iti kagudua ti tribu ni Manases iti daga ti Gilead. 14  Kaduana ti 10 a panguluen, maysa iti tunggal tribu ti Israel. Aminda ket ulo ti pamilia iti sangakabbalayan ni amada a karaman kadagiti rinibu* ti Israel.+ 15  Idi nakadanonda iti ayan dagiti Rubenita, Gadita, ken ti kagudua ti tribu ni Manases iti daga ti Gilead, imbagada kadakuada: 16  “Daytoy ti kinuna ti intero a nasion ni Jehova, ‘Ania daytoy dakes nga inaramidyo? Apay a saankayo a matalek iti Dios ti Israel?+ Timmallikudkayo ken Jehova ta nangaramidkayo iti altar. Simmukirkayo ken Jehova.+ 17  Kurang pay la kadi ti basoltayo idiay Peor? Nalipatanyo kadin ti pannakadidigra dagiti tattao ni Jehova? Adda pay laeng dagiti epekto dayta a basol.+ 18  Taltallikudanyo itan ni Jehova! No sukirenyo ni Jehova ita nga aldaw, makapungtotto iti intero a nasion ti Israel inton bigat.+ 19  Ita, no ibilangyo a narugit ti tawidyo a daga, bumallasiwkayo iti daga a kukua ni Jehova+ nga ayan ti tabernakulo ni Jehova,+ ket makipagyankayo kadakami. Ngem saankayo a sumuksukir ken Jehova. Saandakami met a pagbalinen a nasukir babaen ti panangaramidyo iti altar a nayon ti altar ni Jehova a Diostayo.+ 20  Idi sinukir ni Acan+ nga anak ni Zera ti bilin maipapan kadagiti banag a masapul a madadael, saan aya a nadusa ti intero a nasion ti Israel?+ Saan la a ni Acan ti natay gapu iti basolna.’”+ 21  Kinuna dagiti Rubenita, Gadita, ken ti kagudua ti tribu ni Manases kadagiti panguluen ti rinibu* ti Israel:+ 22  “Ni Jehova a Dios dagiti dios!* Ni Jehova a Dios dagiti dios!+ Ammona, ket maammuanto met ti Israel. No simmukirkami ken saankami a matalek ken Jehova, patayendakamin ita nga aldaw. 23  No nangaramidkami iti altar tapno tallikudanmi ni Jehova ken tapno agidatonkami kadagiti daton a mapuoran, daton a bukbukel, ken daton a pakikappia, dusaennakaminto ni Jehova.+ 24  Inaramidmi daytoy saan a gapu iti sabali a panggep, ta madanagankami nga addanto aldaw nga ibaga dagiti annakyo kadagiti annakmi: “Ania ti karbenganyo a makipagdaydayaw kadakami ken Jehova a Dios ti Israel?* 25  Ti Jordan ti pinagbalin ni Jehova a nagbaetan ti teritoriatayo, dakayo a Rubenita ken Gadita. Awan bingayyo ken Jehova.” Dagiti annakmi ket sigurado a paritanto dagiti annakyo nga agdaydayaw* ken Jehova. 26  “Isu nga imbagami, ‘Agaramidtayo iti altar, saan a tapno pagpuoran iti daton wenno dadduma pay a daton, 27  no di ket kas saksi iti nagbaetantayo+ ken iti nagbaetan dagiti annaktayo* nga itultuloytayo ti agserbi ken Jehova ken mangipaay kenkuana kadagiti datontayo a mapuoran, daton a pakikappia,+ ken dadduma pay a daton, tapno saanto nga ibaga dagiti annakyo kadagiti annakmi: “Awan bingayyo ken Jehova.”’ 28  Isu a kinunami, ‘No ibagadanto dayta kadatayo ken kadagiti agbalinto nga annaktayo,* isungbattayto: “Kitaenyo ti kaasping ti altar ni Jehova nga inaramid dagiti ammami, saan a para iti daton a mapuoran wenno dadduma pay a daton, no di ket agserbi kas saksi iti nagbaetantayo.”’ 29  Saankami a pulos a sumukir ken Jehova ken tumallikud ken Jehova+ babaen ti panangibangon iti altar para iti daton a mapuoran, daton a bukbukel, ken dadduma pay a daton malaksid iti altar ni Jehova a Diostayo nga adda iti sango ti tabernakulona!”+ 30  Napnek ni Finehas a padi, dagiti panguluen dagiti Israelita, ken dagiti panguluen ti rinibu* ti Israel a kimmuyog kenkuana idi nangngegda ti imbaga dagiti annak ni Ruben, Gad, ken Manases.+ 31  Isu a kinuna ni Finehas nga anak ni Eleazar a padi kadagiti annak ni Ruben, Gad, ken Manases: “Ita ammomin nga adda kadatayo ni Jehova, gapu ta saankayo a simmukir ken Jehova. Saannatayto a dusaen ni Jehova.” 32  Manipud Gilead a pagnanaedan dagiti Rubenita ken Gadita, nagsubli idiay Canaan ni Finehas nga anak ni Eleazar a padi ken dagiti panguluen tapno ipakaammoda iti dadduma nga Israelita ti napasamak. 33  Napnek dagiti Israelita iti nangngegda ket indaydayawda ti Dios. Saandan nga intuloy ti panggepda a manggubat kadagiti Rubenita ken Gadita ken mangdadael iti pagnanaedanda. 34  Pinanaganan dagiti Rubenita ken Gadita ti altar* ket kinunada, “Maysa dayta a saksi iti nagbabaetantayo a ni Jehova ti pudno a Dios.”

Footnotes

Kayatna a sawen, iti daya.
Kitaem ti Glosario.
Wenno “pamilia.”
Wenno “pamilia.”
Wenno “Ti Maysa a Nasantuan, Dios a Jehova.”
Wenno, “Ania ti bibiangyo ken Jehova a Dios ti Israel?”
Lit., “agbuteng.”
Lit., “henerasiontayo.”
Lit., “henerasiontayo.”
Wenno “pamilia.”
Sigun iti pannakailawlawagna, mabalin a Saksi ti naipanagan iti altar.