Josue 23:1-16

  • Pammakada ni Josue kadagiti lider ti Israel (1-16)

    • Awan uray maysa a sao ni Jehova a saan a natungpal (14)

23  Adu a tawen ti limmabas kalpasan a pinagbalin ni Jehova a natalna ti Israel+ ken saanen a riniribuk ti amin a kabusorda iti aglawlaw, idi lakay unayen ni Josue,+  pinaayabanna ti amin nga Israelita,+ dagiti panglakayen, panguluen, ukom, ken opisial,+ ket imbagana kadakuada: “Lakayak unayen.  Nakitayo ti amin nga inaramid ni Jehova a Diosyo kadagitoy amin a nasion para kadakayo, ta ni Jehova a Diosyo ti makigubgubat idi para kadakayo.+  Babaen ti binnunot,+ intedko ti daga a kukua dagiti nabatbati a nasion a kas tawid dagiti tribuyo,+ ken amin a nasion a dinadaelko+ manipud Jordan agingga iti Dakkel a Baybay* iti laud.*  Ni Jehova a Diosyo ti kanayon a nangpaatras kadakuada iti sanguananyo,+ ket pinapanawna ida gapu kadakayo tapno kukuayon ti dagada, kas iti inkari kadakayo ni Jehova a Diosyo.+  “Ita, masapul nga agbalinkayo a nakaturtured a mangtungpal ken mangaramid iti amin a naisurat iti libro ti Linteg+ ni Moises. Saanyo a sukiren ti aniaman a linteg.+  Dikay pulos makilangen kadagiti nabatbati a tattao kadagitoy a nasion.+ Diyo met ibalbalikas ti nagan dagiti diosda+ wenno pagsapata dagiti naganda. Diyo pulos pagserbian wenno pagruknoyan ida.+  Agtalinaedkayo ketdi ken Jehova a Diosyo,+ kas iti ar-aramidenyo agingga ita.  Pagtalawento ni Jehova iti sanguananyo dagiti dadakkel ken nabibileg a nasion,+ ta awan ti tao a makapagtakder a kumontra kadakayo agingga ita.+ 10  Sangaribu a tao ti kamatento ti maysa laeng kadakayo,+ ta ni Jehova a Diosyo ti makigubgubat para kadakayo,+ kas iti inkarina.+ 11  Masapul a kanayon nga ayatenyo ni Jehova a Diosyo tapno masaluadanyo ti biagyo.*+ 12  “Ngem no sumukirkayo ken makilangenkayo latta kadagiti nabatbati a tattao kadagitoy a nasion+ ken makialiansakayo babaen ti panagasawa*+ ken makikaduakayo kadakuada ket makikaduada kadakayo, 13  laglagipenyo a saanto nga itultuloy ni Jehova a Diosyo a pagtalawen dagita a nasion maipaay kadakayo.+ Agbalindanto kas appan ken silo ken saplit iti bakrangyo+ ken sisiit kadagiti matayo agingga a madadaelkayo iti daytoy nasayaat a daga nga inted kadakayo ni Jehova a Diosyo. 14  “Ita kitaenyo! Dandaniakon matay,* ket ammoyo iti amin a puso ken iti amin a kararuayo* nga awan uray maysa a sao a saan a natungpal kadagiti naimbag nga inkari kadakayo ni Jehova a Diosyo. Pimmudnoda amin para kadakayo. Awan uray maysa a sao a di natungpal.+ 15  Ngem no kasano a tungpalen ni Jehova a Diosyo ti amin a naimbag nga inkarina kadakayo,+ ipaayto met ni Jehova dagiti didigra nga inkarina* ket pukawennakayto iti daytoy nasayaat a daga nga inted kadakayo ni Jehova a Diosyo.+ 16  No sukirenyo ti tulag ni Jehova a Diosyo nga imbilinna a tungpalenyo ken no agserbi ken agruknoykayo iti sabali a dios, sumgedto ti pungtot ni Jehova kadakayo+ ket dagus a madadaelkayo iti daytoy nasayaat a daga nga intedna kadakayo.”+

Footnotes

Kayatna a sawen, ti Mediteraneo.
Wenno “paglennekan ti init.”
Wenno “mabantayanyo a naimbag ti kararuayo.”
Wenno “makiinnasawakayo.”
Lit., “Agturongakon iti papanan ti amin a tattao ditoy daga.”
Kitaem ti Glosario.
Wenno “ti amin a dakes a sao.”