Josue 5:1-15

  • Panangkugit idiay Gilgal (1-9)

  • Panangselebrar iti Paskua; awanen ti manna (10-12)

  • Prinsipe ti armada ni Jehova (13-15)

5  Pinasardeng ni Jehova ti ayus ti Jordan iti sanguanan dagiti Israelita agingga a nakaballasiwda. Idi nadamag ti amin nga ar-ari dagiti Amoreo+ iti laud* ti Jordan ken ti amin nga ar-ari dagiti Canaanita+ nga adda iti igid ti baybay, nagbutengda*+ ken awanen ti turedda* gapu kadagiti Israelita.+  Iti dayta a tiempo, imbaga ni Jehova ken Josue: “Mangaramidka kadagiti kutsilio a bato* ket kugitem+ manen dagiti lallaki nga Israelita iti maikadua a gundaway.”  Isu a nagaramid ni Josue kadagiti kutsilio a bato ket kinugitna dagiti lallaki nga Israelita idiay Gibeat-haaralot.*+  Kinugit ida ni Josue ta natayen ti amin a lallaki a rimmuar idiay Egipto, dagiti lallaki a mannakigubat,* bayat ti panagyanda idiay let-ang kalpasan a pimmanawda idiay Egipto.+  Nakugit ti amin a lallaki a rimmuar idiay Egipto ngem saan a nakugit dagiti nayanak idiay let-ang kalpasan a naggapu dagiti Israelita idiay Egipto.  Bayat a nagnagna dagiti Israelita iti 40 a tawen+ idiay let-ang, natay dagiti mannakigubat a lallaki a rimmuar idi idiay Egipto ta saanda a nagtulnog ken Jehova.+ Imbaga ni Jehova kadakuada a saanda a pulos makita ti daga+ nga inkari ni Jehova kadagidi ammada nga ited kadagiti tattaona,*+ maysa a daga a pagay-ayusan ti gatas ken diro.+  Isu a dagiti annakda ti nakadanon iti dayta a daga.+ Kinugit ida ni Josue ta saanda a nakugit kabayatan ti kaaddada idiay let-ang.  Kalpasan a nakugit dagitoy nga Israelita, saanda a rimrimmuar iti kampoda agingga nga immimbagda.  Kinuna ni Jehova ken Josue: “Ita nga aldaw, inikkatkon kadakayo ti panangibabain ti Egipto.”* Isu a Gilgal*+ ti naipanagan iti lugar agingga ita nga aldaw. 10  Intultuloy dagiti Israelita ti nagkampo idiay Gilgal iti kapatagan ti Jerico ket sinelebraranda ti Paskua iti rabii ti maika-14 nga aldaw ti bulan.+ 11  Iti aldaw kalpasan ti Paskua, nanganda kadagiti apit iti daga, tinapay nga awan lebadurana,+ ken kinirog a bukbukel. 12  Idi nakapanganen dagiti Israelita iti sumagmamano nga apit iti daga iti dayta nga aldaw, awanen ti makitada a manna.+ Nanganda kadagiti apit iti daga ti Canaan iti dayta a tawen.+ 13  Idi adda ni Josue iti asideg ti Jerico, pagammuan ta nakakita iti lalaki+ nga agtaktakder iti sanguananna a nakaiggem iti espada.+ Inasitgan ni Josue ket dinamagna: “Kaduadaka kadi wenno kalabanmi?” 14  Kinuna ti lalaki: “Saan, immayak a kas prinsipe* ti armada ni Jehova.”+ Gapu iti dayta, nagrukob ni Josue iti daga ken nagruknoy iti lalaki ket kinunana: “Ania ti ibaga ti apok iti adipenna?” 15  Insungbat ti prinsipe ti armada ni Jehova: “Ikkatem dagiti sandaliasmo ta nasantuan a disso ti pagtaktakderam.” Dagus a nagtulnog ni Josue.+

Footnotes

Lit., “iti bangir nga agpabaybay.”
Lit., “narunaw ti pusoda.”
Lit., “awanen ti espiritu kadakuada.”
Wenno “pamulinawen.”
Kaipapananna, “Turod a Pagkugitan.”
Wenno “dagiti lallaki a nadanondan ti tawen ti panagsoldado.”
Lit., “kadatayo.”
Lit., “intulidkon manipud kadakayo ti panangibabain ti Egipto.”
Kaipapananna, “Panangipatulid; Panangitulid.”
Wenno “panguluen.”