Josue 17:1-18

  • Tawid ni Manases iti laud (1-13)

  • Kanayonan a daga para kadagiti kaputotan ni Jose (14-18)

17  Adda paset ti daga a naited+ iti tribu ni Manases+ ta isu ti inauna nga anak ni Jose.+ Natured a mannakigubat ni Makir+ nga inauna nga anak ni Manases ken ama ni Gilead, isu a naited kenkuana ti Gilead ken Basan.+  Adda met daga a naited iti dadduma pay a kaputotan ni Manases sigun kadagiti pamiliada, para kadagiti annak ni Abi-ezer,+ annak ni Helek, annak ni Asriel, annak ni Sikem, annak ni Hefer, ken kadagiti annak ni Semida. Dagita ti lallaki a kaputotan ni Manases nga anak ni Jose, sigun kadagiti pamiliada.+  Ngem awan ti lallaki nga annak ni Zelofehad+ nga anak ni Hefer, nga anak ni Gilead, nga anak ni Makir, nga anak ni Manases. Babbai amin nga annakna ket dagitoy ti naganda: Mala, Noe, Hogla, Milca, ken Tirza.  Gapu iti dayta, napanda imbaga ken ni Eleazar+ a padi ken ni Josue nga anak ni Nun ken kadagiti panguluen: “Imbilin ni Jehova ken ni Moises nga ikkannakami iti tawid a kas kadagiti kabagianmi a lallaki.”+ Isu a kas iti imbilin ni Jehova, inikkanna ida iti tawid a kas met laeng kadagiti kabagianda a lallaki iti pamilia ni amada.+  Adda pay 10 a bingay a naited ken Manases malaksid iti daga ti Gilead ken Basan, nga adda iti bangir* ti Jordan,+  ta adda met naipatawid kadagiti annak a babbai ni Manases a kas kadagiti annakna a lallaki. Ti daga ti Gilead ket nagbalin a kukua ti dadduma pay nga annak ni Manases.  Ti tawid ni Manases ket mangrugi iti Aser agingga iti Mikmetat,+ a sumango iti Sikem,+ ken agdirdiretso iti abagatan* iti daga dagiti agnanaed iti En-Tapua.  Nagbalin a kukua ni Manases ti daga ti Tapua,+ ngem ti Tapua nga adda iti pagpatinggaan ti teritoria ti tawid ni Manases ket naited iti annak ni Efraim.  Bumaba dayta nga agpaabagatan agingga iti Karayan* ti Kana. Adda dagiti siudad a kukua ni Efraim iti tengnga dagiti siudad ni Manases.+ Ti pagpatinggaan dagiti daga a kukua ni Manases ket iti amianan ti karayan ken agpatingga iti baybay.+ 10  Kukua ni Efraim ti abagatan. Kukua met ni Manases ti amianan, ket ti baybay ti pagpatinggaan ti teritoria ni Manases;+ ket iti amianan, agpatingga ti teritoriada* idiay Aser, ket iti daya, agpatingga idiay Isacar. 11  Adda dagiti paset iti teritoria ti tribu da Isacar ken Aser a naited ken Manases: ti Bet-sean ken dagiti ili iti aglawlawna, ti Ibleam+ ken dagiti ili iti aglawlawna, dagiti agnanaed idiay Dor+ ken dagiti ili iti aglawlawna, dagiti agnanaed idiay En-dor+ ken dagiti ili iti aglawlawna, ken dagiti agnanaed idiay Taanak+ ken dagiti ili iti aglawlawna, ken dagiti agnanaed idiay Megiddo ken dagiti ili iti aglawlawna, tallo a katurturodan. 12  Ngem saan a natagikua dagiti annak ni Manases dagitoy a siudad; ta nagtalinaed dagiti Canaanita iti daytoy a daga.+ 13  Idi bimmileg dagiti Israelita, dagiti Canaanita ti nagtrabaho iti nadagsen,+ ngem saanda a pinapanaw amin ida.+ 14  Imbaga dagiti kaputotan ni Jose ken ni Josue: “Apay a maymaysa a lugar ti intedmo a tawidmi?+ Nakaad-adukami ta bembendisionannakami ni Jehova agingga ita.”+ 15  Kinuna kadakuada ni Josue: “No nakaad-adukayo, inkayo iti kabakiran iti daga dagiti Perizeo+ ken Refaim,+ ket pukanenyo dagiti kayo sadiay tapno adda daga a pagnaedanyo, ta saanen a makaanay kadakayo ti kabambantayan ti Efraim.”+ 16  Kinuna dagiti kaputotan ni Jose: “Kurang kadakami ti kabambantayan. Sa amin a Canaanita nga agnanaed iti tanap,* agpadpada dagidiay adda idiay Bet-sean+ ken kadagiti ili iti aglawlawna ken dagidiay adda idiay Tanap* ti Jezreel,+ ket addaan kadagiti karuahe a pakigubat+ a nakabitan iti kasla kumpay dagiti pilidda.”* 17  Isu a kinuna ni Josue iti tribu da Efraim ken Manases nga annak ni Jose: “Nakaad-adukayo ken nakabilbilegkayo. Saan a maymaysa a lugar ti maipatawid kadakayo.+ 18  Kukuayonto met ti kabambantayan.+ Uray kabakiran dayta, pukanenyonto dagiti kayona tapno mainayon iti tawidyo. Papanawenyonto dagiti Canaanita, uray no nabilegda ken addaanda kadagiti karuahe a pakigubat a nakabitan iti kasla kumpay dagiti pilidda.”*+

Footnotes

Kayatna a sawen, iti daya.
Lit., “iti kannawan.”
Karayan a maaddaan laeng iti danum no panagtutudo.
Kayatna a sawen, ti tribu ni Manases wenno teritoria ni Manases.
Wenno “kapatagan.”
Wenno “Kapatagan.”
Lit., “karuahe a landok.”
Lit., “karuahe a landok.”