Josue 3:1-17

  • Ballasiwen dagiti Israelita ti Jordan (1-17)

3  Kalpasanna, bimmangon ni Josue a nasapa iti bigat. Kaduana ti amin nga Israelita* a pimmanaw idiay Sitim+ ket nakadanonda idiay Jordan. Imyanda sadiay sakbay a bimmallasiwda.  Tallo nga aldaw kalpasanna, sinursor dagiti opisial+ ti intero a kampo  ket binilinda dagiti tattao: “Inton makitayo a bagkaten dagiti papadi a Levita ti lakasa ti tulag ni Jehova a Diosyo,+ pumanawkayo iti ayanyo ket surotenyo dayta.  Ngem masapul nga agarup 2,000 a kasiko* ti kaadayoyo iti lakasa. Dikay unay umas-asideg tapno makitayo ti dalan a papananyo, ta damoyo ti magna iti daytoy a dalan.”  Kinuna ni Josue kadagiti tattao: “Pagbalinenyo a nasantuan ti bagiyo+ ta inton bigat, nakaskasdaaw dagiti aramiden kadakayo ni Jehova.”+  Kalpasanna, imbaga ni Josue kadagiti papadi: “Bagkatenyo ti lakasa+ ti tulag ket magnakayo nga umun-una ngem kadagiti tattao.” Isu a binagkatda ti lakasa ti tulag ket nagnada nga immun-una.  Kinuna ni Jehova ken ni Josue: “Ita nga aldaw, padayawanka iti imatang ti amin nga Israelita,+ tapno maammuanda nga addaak kenka+ a kas iti kaaddak idi ken Moises.+  Ibilinmo kadagiti papadi a mangbagbagkat iti lakasa ti tulag: ‘Apaman a makadanonkayo iti igid ti Jordan, masapul nga agtalinaedkayo a nakatakder.’”+  Kinuna ni Josue kadagiti Israelita: “Umaykayo ditoy ket denggenyo ti ibaga ni Jehova a Diosyo.” 10  Kalpasanna, imbaga ni Josue: “Maammuanyonto nga adda kadakayo ti sibibiag a Dios,+ ket sigurado a papanawennanto iti sanguananyo dagiti Canaanita, Heteo, Heveo, Perizeo, Girgaseo, Amoreo, ken Jebuseo.+ 11  Kitaenyo! Ti lakasa ti tulag ti Apo ti intero a daga ket umun-una ngem dakayo iti Jordan. 12  Mangpilikayo iti 12 a lallaki, maysa iti tunggal tribu ti Israel,+ 13  ket apaman a tumapog* iti danum ti Jordan dagiti saka dagiti papadi a mangbagbagkat iti Lakasa ni Jehova nga Apo ti intero a daga, agsardengto ti ayus ti Jordan ket ti danumna iti surong agbalinto a kasla pader* a bangen.”+ 14  Idi panawan dagiti Israelita ti kampoda tapno ballasiwenda ti Jordan, nagna nga immun-una dagiti papadi a mangbagbagkat iti lakasa+ ti tulag. 15  Apaman a nadanon dagiti papadi ti igid ti karayan ken intapogda dagiti sakada iti danum, (agliplippias idi ti Jordan+ iti amin nga aldaw ti panagani), 16  nagsardeng ti ayus ti karayan idiay surong. Nagbalin a kasla pader* dagiti danumna iti batog ti nakaad-adayo a siudad ti Adan, iti asideg ti Zaretan. Naatianan met ti danum iti baba ti karayan agingga iti Baybay ti Araba, ti Asin a Baybay.* Nagsardeng ti ayus ti karayan ket nakaballasiw dagiti Israelita agingga iti Jerico. 17  Dagiti papadi a mangbagbagkat iti lakasa ti tulag ni Jehova ket nagtalinaed a sitatakder iti namaga a daga+ iti tengnga ti Jordan, bayat a nagna dagiti Israelita iti namaga a daga+ agingga a nakaballasiwda amin.

Footnotes

Lit., “annak ni Israel.”
Agarup 890 m. Kitaem ti App. B14.
Lit., “nga agdisso.”
Wenno “dam.”
Wenno “dam.”
Kayatna a sawen, ti Natay a Baybay.