Josue 9:1-27

  • Makikappia dagiti masirib a Gibeonita (1-15)

  • Naibutaktak ti panangallilaw dagiti Gibeonita (16-21)

  • Agbalin dagiti Gibeonita a paraurnong kadagiti kayo ken parasakdo (22-27)

9  Nadamag dayta ti amin nga ari iti laud ti Jordan+ iti kabambantayan ken idiay Sefela ken iti intero nga igid ti Dakkel a Baybay*+ ken iti sanguanan ti Lebanon—ti ar-ari dagiti Heteo, Amoreo, Canaanita, Perizeo, Heveo, ken Jebuseo.+  Gapu iti dayta, nagtutulagda a gubatenda ni Josue ken dagiti Israelita.+  Nangngeg met dagiti umili iti Gibeon+ ti inaramid ni Josue iti Jerico+ ken Ai.+  Nakapanunotda iti nasayaat nga aramidenda. Nangikargada iti balonda kadagiti daan a sako sa insakayda kadagiti asnoda, agraman dagiti napigis ngem natakupan a daan a lalat a pagkargaan iti arak.  Nagisuotda met kadagiti daan ken natakupan a sandalias ken rutrot a bado. Natangken ken maburburboren ti amin a balonda a tinapay.  Kalpasanna, napanda iti kampo da Josue idiay Gilgal+ ket kinunada kenkuana ken kadagiti Israelita: “Nagadayo ti naggapuanmi, isu nga ipakpakaasimi a makitulagkayo kadakami.”  Ngem kinuna dagiti lallaki nga Israelita kadagiti Heveo:+ “Siguro, asideg laeng ti naggapuanyo. Apay koma a makitulagkami kadakayo?”+  Imbagada ken Josue: “Sidadaankami nga agpaadipen* kadakayo.” Insaludsod ni Josue: “Siasinokayo, ken naggapuanyo?”  Insungbatda: “Nagadayo ti naggapuan dagiti adipenyo.+ Immaykami ta agdindinamag ti nagan ni Jehova a Diosyo ken ti amin nga inaramidna idiay Egipto,+ 10  ken ti amin nga inaramidna iti dua nga ari dagiti Amoreo iti bangir* ti Jordan a da Ari Sihon+ iti Hesbon ken ni Ari Og+ ti Basan, nga adda idi idiay Astarot. 11  Isu nga imbaga kadakami dagiti panglakayenmi ken ti amin a kailianmi, ‘Agbalonkayo ket mapanyo ibaga kadakuada: “Sidadaankami nga agpaadipen kadakayo;+ ipakpakaasimi a makitulagkayo kadakami.”’+ 12  Kitaenyo dagiti balonmi a tinapay. Kalluto pay laeng idi agrubbuatkami nga umay ditoy. Ngem natangken ken maburburboren.+ 13  Idi kargaanmi iti arak dagitoy a lalat, baroda pay laeng. Ita, nabnabtakdan.+ Kitaenyo dagiti bado ken sandaliasmi, dimmaandan gapu iti kaadayo ti pinagnami.” 14  Innala* dagiti lallaki nga Israelita ti dadduma a balon dagiti immay ngem saanda a nagkonsulta ken Jehova.+ 15  Isu a nangaramid ni Josue iti katulagan ti pannakikappia+ ken inkarina a saanna ida a patayen. Kasta met ti inkari kadakuada dagiti panguluen dagiti Israelita.+ 16  Iti maikatlo nga aldaw kalpasan ti panagtutulagda, naammuan dagiti Israelita nga asideg la gayam ti pagnanaedan dagiti immay a lallaki. 17  Isu a nagrubbuat dagiti Israelita ket iti maikatlo nga aldaw, nakadanonda kadagiti siudad dagita a lallaki: ti Gibeon,+ Kefira, Beerot, ken Kiriat-jearim.+ 18  Ngem saan ida a pinatay dagiti Israelita ta kasta ti inkari kadakuada dagiti panguluen dagiti Israelita iti imatang ni Jehova+ a Dios ti Israel. Isu a nagtantanabutob ti amin nga Israelita kontra kadagiti panguluen. 19  Imbaga ti amin a panguluen kadagiti Israelita: “Saanmi a mabalin a dangran ida ta kasta ti inkarimi iti imatang ni Jehova a Dios ti Israel. 20  Isu a saanmi ida nga iramraman a patayen tapno saankami a madusa gapu iti kari nga insapatami kadakuada.”+ 21  Innayon dagiti panguluen: “Saantay ida a dangdangran. Pagbalinentay ida a paraurnong iti kayo ken parasakdo.” Kasta ti inkari dagiti panguluen kadagiti Gibeonita. 22  Inayaban ni Josue dagiti immay a lallaki ket kinunana kadakuada: “Apay nga inallilawdakami? Kinunayo, ‘Nagadayo ti naggapuanmi,’ idinto ta nakaas-asideg gayam ti pagnanaedanyo!+ 23  Manipud ita, mailunodkayo.+ Kanayonto nga agserbikayo kas paraurnong iti kayo ken parasakdo para iti balay ti Diosko.” 24  Insungbatda ken Josue: “Silalawag ngamin a naibaga kadakami nga ad-adipenyo nga imbilin ni Jehova a Diosyo ken ni Moises nga adipenna nga itedna kadakayo ti intero a daga ken papatayenyo amin nga agnanaed ditoy.+ Nagbutengkami gapu kadakayo+ amangan no patayendakami isu a kastoy ti inaramidmi.+ 25  Makaammokan kadakami.* Aramidem kadakami ti pagarupem a nasayaat ken umiso.” 26  Kasta ti inaramid ni Josue. Insalakanna ida iti ima dagiti Israelita, ket saanda ida a pinatay. 27  Manipud idin, pinagbalin ida ni Josue a paraurnong iti kayo ken parasakdo para iti amin nga Israelita+ ken iti lugar a pilien ni Jehova a pangikabilanna iti altarna.+ Kasta ti ar-aramiden dagiti Gibeonita agingga ita.+

Footnotes

Kayatna a sawen, ti Mediteraneo.
Wenno “agserbi.”
Kayatna a sawen, iti daya.
Wenno “Sinukimat.”
Lit., “Addakamin kadagiti imam.”