Biblu xlɛ́ ɖɔ bo na dó wà jlǒ Mawu tɔn ɔ, wɛnsagun lɛ cyɔn alɔ Mawu sɛntɔ́ nugbǒ lɛ jí ɖó bǎ ɖé mɛ ɖò hweɖelɛnu. (Ðɛhan 34:8) Kpɔ́ndéwú ɖé lɛ ɖíe:

• Hwenu e Jehovah ɖò kún na sú dó nú toxo nyanya Sodɔmu kpo Gomɔ́ɔ kpo wɛ é ɔ, wɛnsagun lɛ d’alɔ nǔjlɔjlɔwatɔ́ Lɔti kpo xwédo tɔn kpo bɔ ye hɔn.​—Bǐbɛ̌mɛ 19:1, 15-26.

• Hwenu e è ɖó kúhwɛ́ nú dɔnkpɛvu Eblée atɔn bo bɛ́ ye kɔn nyì myɔ ɖaxó ɖé mɛ ɖò Babilɔnu hwexónu tɔn mɛ é ɔ, Mawu “sɛ́ wɛnsagun tɔn dó, bɔ é wá hwlɛn mɛsɛntɔ́ tɔn lɛ gán.”​—Daniyɛli 3:19-28.

• Ee nya nǔjlɔjlɔwatɔ́ Daniyɛli nɔ kinnikinni domɛ bɔ ayǐ hɔ́n é ɔ, é tinmɛ ɖɔ emi gán ɖ’emɛ ɖó “Mawu . . . sɛ́ wɛnsagun tɔn dó, bɔ é wá sú kinnikinni lɛ sín nu.”​—Daniyɛli 6:17, 23.

Hweɖelɛnu ɔ, wɛnsagun Mawu tɔn lɛ ɖ’alɔ ɖò azɔ̌ agun Klisanwun tɔn bǐbɛ̌mɛ tɔn ɔ tɔn lɛ mɛ, hwenu e mɔ̌ wiwa ɖò dandan bonu linlin Jehovah tɔn ni jɛnu é. Kpɔ́ndéwú ɖé lɛ ɖíe:

• Wɛnsagun ɖé hun gankpa ɖé sín hɔn lɛ nú mɛsɛ́dó lɛ bo ɖegbe nú ye ɖɔ ye ni gbɛkan dó wɛnɖagbejijla ɔ nu ɖò tɛmpli ɔ mɛ.​—Mɛsɛ́dó 5:17-21.

• Wɛnsagun ɖé ɖɔ nú wɛnɖagbejlatɔ́ Filipu ɖɔ é ni yì gbetótló li e gosin Jeluzalɛmu yì Gaza é jí bo ɖɔ Mawuxó nú Etiopíinu e wá yì sɛ̀n Mawu ɖò Jeluzalɛmu bo lɛkɔ é ɖé.​—Mɛsɛ́dó 8:26-33.

• Hwenu e gan ɔ xò nú Mawu bɔ mɛ e ma nyí Jwifu ǎ lɛ é na huzu Klisanwun é ɔ, wɛnsagun Mawu tɔn ɖé tɔ́n dó ahwangán Hlɔmanu Kɔnɛyi jí ɖò nǔmimɔ ɖé mɛ, bo ɖɔ n’i ɖɔ é ni ylɔ mɛsɛ́dó Piyɛ́ɛ wá xwé tɔn gbè.​—Mɛsɛ́dó 10:3-5.

• Hwenu e mɛsɛ́dó Piyɛ́ɛ ɖò gankpa mɛ é ɔ, wɛnsagun ɖé tɔ́n dó jǐ tɔn, lobo kplá ɛ sín gankpa ɔ mɛ.​—Mɛsɛ́dó 12:1-11.

Mawu sɔ́ nɔ zán wɛnsagun lɛ ɖò nùjiwǔ linu dó d’alɔ mɛ lɛ lee Biblu ɖexlɛ́ gbɔn é ɖò égbé bonu kúnnuɖenú ɖé xlɛ́ ǎ. É ɖò mɔ̌ có, Jezu ɖɔ dó hwenu mǐtɔn wu ɖɔ: “È na jla axɔsuɖuɖu Mawu tɔn sín wɛnɖagbe gbɔn gbɛ̀ ɔ bǐ mɛ, bonu é na nyí kúnnuɖiɖe nú gbɛtɔ́ lɛ bǐ. Enɛ ɔ gudo ɔ, gbɛ̀ ɔ na vɔ.” (Matie 24:14) A ka tuùn ɖɔ ahwanvu Klisu tɔn lɛ ɖò azɔ̌ enɛ wà wɛ ɖò alixlɛ́mɛ wɛnsagun lɛ tɔn glɔ à?

Wema Nǔɖexlɛ́mɛ tɔn ɖexlɛ́ ɖɔ wɛnsagun lɛ na ɖò alɔ dó gbɛtɔ́ lɛ wɛ ɖò ayikúngban ɔ bǐ jí, bonu ye na kplɔ́n nǔ dó Jehovah Mawu kpo linlin e é ɖó nú gbɛtɔ́ lɛ é kpo wu. Mɛsɛ́dó Jaan wlan ɖɔ: “Un mɔ wɛnsagun ɖevo, bɔ é ɖò zinzɔn wɛ gbɔn jɔhɔn mɛ aga; é ɖó Wɛnɖagbe mavɔmavɔ ɖé bo na dó mɛ e ɖò ayikúngban jí lɛ; é na dó wɛn ɔ tò bǐ, akɔta bǐ, gbè bǐ kpodo togun bǐ kpo. Wɛnsagun ɔ zé gbè yì jǐ bo ɖɔ: ‘Mi ɖó sísí nú Mawu, bo kpa susu n’i! Ðó hwenu e é na ɖɔhwɛ xá gbɛtɔ́ lɛ dó ɔ sù. Mi sɛ̀n mɛ e bló jixwé, bo bló ayikúngban, bo bló xù kpo tɔjɔtɛn lɛ kpo é!’” (Nǔɖexlɛ́mɛ 14:6, 7) Nǔ e nɔ jɛ égbé lɛ é gègě nyí kúnnuɖenú ɖɔ wɛnsagun lɛ ɖò gudo nú Axɔsuɖuto ɔ jijla gbɔn gbɛ̀ ɔ bǐ mɛ sín azɔ̌ ɔ. Nugbǒ ɔ, enyi hwɛhutɔ́ ɖé jó hwɛ tɔn lɛ dó bo lɛkɔ wá Jehovah gɔ́n ɔ, “wɛnsagun Mawu tɔn lɛ nɔ j’awǎ.”​—Luki 15:10.

Etɛ ka na jɛ hwenu e wɛnɖagbejijlazɔ́ ɔ na fó é? Enɛ gudo ɔ, “ahwangɔnu jixwé tɔn lɛ” na nɔ gudo nú Jezu Klisu, Axɔsu axɔsu lɛ tɔn ɔ bo na fun “ahwan e ye na fun ɖò Mawu Nǔbǐwukpétɔ́ ɔ sín azǎn ɖaxó ɔ gbè,” bɔ è nɔ ylɔ ɖɔ Haamagedɔni é. (Nǔɖexlɛ́mɛ 16:14-16; 19:14-16) Wɛnsagun hlɔnhlɔnnɔ lɛ na gɔ́ nú Aklunɔ Jezu bo “na dɔn tó nú mɛ e . . . ma nɔ setónú nú wɛnɖagbe e ɖɔ xó dó Aklunɔ mǐtɔn Jezu wu ǎ lɛ.”​—2 Tɛsalonikinu lɛ 1:7, 8.

Enɛ wu ɔ, kudeji ɖɔ nǔ towe nɔ ɖu ayi mɛ nú wɛnsagun lɛ. Ye nɔ lin ganjininɔ mɛ e jló na sɛ̀n Mawu lɛ é tɔn tawun, bɔ Jehovah ko zán ye azɔn gègě dó dó wusyɛn lanmɛ nú mɛsɛntɔ́ tɔn gbejinɔtɔ́ e ɖò ayikúngban jí lɛ é bo lɛ́ cyɔn alɔ ye jí.​—Eblée lɛ 1:14.

Enɛ wu ɔ, ɖokpo ɖokpo mǐtɔn ɖó na wá gbeta taji ɖé kɔn. Mǐ ka na ɖótó wɛnɖagbe e jla wɛ è ɖè lɛlɛ̌ dó gbɛ̀ ɔ bǐ é lobo setónú na à? Kúnnuɖetɔ́ Jehovah tɔn e ɖò xá towe mɛ lɛ é na hun xomɛ bo kplɔ́n nǔ xá we bɔ a na ɖu alɔdo wanyiyinɔ wɛnsagun Mawu tɔn hlɔnhlɔnnɔ lɛ tɔn sín lè.