Ang mga gasa nga gihatag sa Diyos ngadto sa mga tawo maoy kapahayagan sa iyang dili-takos nga kalulot. Ang mismong pulong nga khaʹri·sma (sa literal, gasa sa pagkamapuangoron), nga makita sa 17 ka higayon diha sa Kristohanon Gregong Kasulatan, nagpasabot sa usa ka gasa nga naglangkit sa “dili-takos nga kalulot” (khaʹris) sa Diyos. (Rom 6:​23, ftn sa Rbi8; 1Co 12:4; 2Ti 1:6; 1Pe 4:10) Busa, haom lamang nga ang mga gasa nga nadawat gikan kang Jehova gamiton alang sa kaayohan sa mga isigkatawo ug sa kahimayaan sa Diyos nga maghahatag niini. (1Pe 4:​10, 11) Kini nga mga gasa maoy dili alang sa hinakog nga kaayohan sa nagadawat. Sanglit ang maong tawo ‘nakadawat nga walay bayad,’ siya obligado ‘sa paghatag nga walay bayad.’​—Mat 10:8.

“Ang matag maayong gasa ug matag hingpit nga regalo naggikan sa itaas.” (San 1:17) Si Jehova madagayaon sa paghatag, nga nagtugot sa matarong ug sa daotan nga makabenepisyo sa init sa adlaw ug sa ulan. Ngani, siya “naghatag ngadto sa tanang tawo ug kinabuhi ug gininhawa ug tanang butang.” Ang mga gasa sa Diyos, lakip ang pagkaon ug ilimnon ug ang pagpahimulos ug maayo sa tanan niyang kahago, maoy alang sa kalipay sa tawo. (Mat 5:45; Buh 17:​24, 25; Ecc 3:​12, 13; 5:19; 1Ti 6:17) Ang pagkatagsaanon ug ang kaminyoon maoy mga gasa gikan sa Diyos, nga pahimuslan sulod sa mga kinutoban sa iyang gilatid nga mga kinahanglanon. Sanglit ang tawong dili minyo mas gawasnon sa pagdeboto sa iyang kaugalingon sa pag-alagad kang Jehova nga walay kabaldahan, ang pagkatagsaanon mao ang mas maayo tali niining duha ka gasa.​—Pr 18:22; Mat 19:​11, 12; 1Co 7:​7, 17, 32-38; Heb 13:4.

Ang Gasa sa Diyos Pinaagi sa Halad ni Jesus. Ang dili-takos nga kalulot ni Jehova sa pagtagana sa iyang Anak ingong usa ka halad lukat maoy bililhon kaayo nga gasa, ug tungod niana kadtong magpasundayag ug pagtuo sa halad ni Jesu-Kristo makabaton sa gasa nga kinabuhing walay kataposan. (Rom 6:23; Ju 3:16) Ang “dili-mahubit nga walay bayad nga gasa” sa Diyos dayag nga naglakip sa tanang pagkamaayo ug mahigugmaong-kalulot nga gihatag sa Diyos ngadto sa iyang katawhan pinaagi kang Jesu-Kristo.​—2Co 9:15; itandi ang Rom 5:15-17.

Balaang Espiritu. Ang Diyos naghatag sa iyang espiritu ingong usa ka gasa ngadto sa iyang katawhan, nga makatabang kanila sa paglikay sa makadaot nga mga buhat sa unod ug sa pag-ugmad sa bunga sa espiritu, nga mao, ang gugma, kalipay, pakigdait, hataas-nga-pailob, kalulot, pagkamaayo, pagtuo, kalumo, ug pagpugong-sa-kaugalingon. (Buh 2:38; Rom 8:2-10; Gal 5:16-25) Ang espiritu ni Jehova maoy usa ka tinong giya ug naghatag ug gahom nga labaw sa kasarangan, nga motabang sa usa ka Kristohanon sa pagtuman sa iyang hinatag-sa-Diyos nga mga buluhaton bisan pa sa mga pagpit-os kaniya. (Ju 16:13; 2Co 4:7-10) Gipasaligan ni Jesus ang iyang mga tinun-an nga ang espiritu sa Diyos motudlo kanila sa tanang butang, magpahinumdom kanila sa mga butang nga iyang gitudlo kanila, ug motabang kanila sa pagdepensa bisan sa atubangan sa mga magmamando.​—Ju 14:26; Mar 13:9-11.

Kaalam ug Kahibalo. Ang matuod nga kaalam ug kahibalo maoy mga gasa gikan sa Diyos. Sa pagkatinuod gidapit ni Jehova ang iyang mga alagad sa pag-ampo alang sa kaalam ug kahibalo, sama sa gihimo ni Solomon. (San 1:5; 2Cr 1:8-12) Bisan pa niana, aron makabaton ug kahibalo, gikinahanglan ang paningkamot sa pagtuon kon unsay gitagana sa Diyos pinaagi sa gasa sa iyang Pulong. (Pr 2:1-6; 2Ti 2:15; 3:15) Apan ang pagtuon lamang sa Pulong sa Diyos dili garantiya nga madawat ang mga gasa nga kahibalo ug kaalam. Ang tinuod nga kahibalo ug kaalam mabatonan lamang pinaagi kang Jesu-Kristo ug sa tabang sa espiritu sa Diyos.​—1Co 2:10-16; Col 2:3.

Ang kaalam sa Diyos nagsilbing usa ka proteksiyon ug usa ka giya diha sa mga dalan sa kinabuhi. (Ecc 7:12; Pr 4:5-7) Ang kaalam nga naggikan sa Diyos lahi kaayo sa kalibotanong kaalam, nga maoy kabuangan sa panglantaw ni Jehova ug makadaot  usab tungod kay kini nagsalikway sa Diyos. (1Co 1:18-21) “Apan ang kaalam nga gikan sa itaas maoy una sa tanan putli, unya makigdaiton, makataronganon, andam mosunod, tugob sa kaluoy ug maayong mga bunga, dili mapihigpihigon, dili salingkapaw.”​—San 3:17.

Ang tukmang kahibalo bahin sa kabubut-on ni Jehova motabang sa naghupot niini nga “matino ang mas hinungdanong mga butang,” aron dili makapandol sa uban, ug “magalakaw nga takos kang Jehova aron bug-os nga makapahimuot kaniya.” (Flp 1:9-11; Col 1:​9, 10) Dugang pa, ang kahibalo maoy usa sa mga butang nga makatabang sa Kristohanon nga magmaaktibo ug magmabungahon sa iyang pag-alagad sa Diyos. (2Pe 1:5-8) Kini nga gasa gikan sa Diyos naglangkit ug labaw pa kay sa pagkahibalo lamang sa mga kamatuoran. Kini naglakip sa pagsabot niini nga mga kamatuoran ug sa pagkahibalo kon unsaon kini paggamit aron sa “pagtubag sa matag usa.”​—Col 4:6.

Mga Gasa sa Pag-alagad ug “mga Gasa nga mga Lalaki.” Ang mga buluhaton sa pag-alagad diha sa yutan-ong kahikayan sa Diyos maoy mga gasa gayod gikan kang Jehova. (Num 18:7; Rom 12:6-8; Efe 3:​2, 7) Kadtong gihatagag mga buluhaton sa pag-alagad tungod sa dili-takos nga kalulot sa Diyos gitawag usab nga “mga gasa nga mga lalaki,” ug si Jesu-Kristo, ingong hawas sa Diyos ug ulo sa kongregasyon, naghatag niini ngadto sa kongregasyon aron ang tagsatagsa ka membro niini mapalig-on ug modangat sa pagkahamtong. (Efe 4:​8, 11, 12) Aron matinumanong makatuman sa iyang mga responsibilidad ug mahimong panalangin sa uban, ang usa nga nagbaton sa gasa kinahanglang magpadayon sa pag-ugmad niini, dili gayod magpasagad niini. (1Ti 4:14; 2Ti 1:6) Uban sa tabang ni Jehova, ang bisan kinsa, pinaagi sa paghimog determinadong mga paningkamot aron bug-os nga magamit ang iyang mga katakos ug mabuntog ang mga kababagan nga hayan motungha, makaugmad sa katakos sa paghimo sa bisan unsang tinudlo-sa-Diyos nga pag-alagad.​—Flp 4:13.

Mga Gasa sa Espiritu. Sa unang siglo K.P., inubanag milagrosong mga gasa ang bawtismo pinaagi sa balaang espiritu. Kini nagsilbing mga ilhanan nga wala na gamita sa Diyos ang Hudiyohanong kongregasyon sa pag-alagad kaniya, hinunoa ang iyang pag-uyon gihatag na nganha sa Kristohanong kongregasyon nga gitukod sa iyang Anak. (Heb 2:2-4) Sa adlaw sa Pentekostes, ang pagbubo sa balaang espiritu giduyogan ug milagrosong mga gasa, ug sa matag higayon human niadto nga gihisgotan diha sa Kasulatan ang paghatag ug milagrosong mga gasa sa espiritu, labing menos presente ang usa sa 12 ka apostoles o kaha si Pablo, kinsa direktang gipili ni Jesus. (Buh 2:​1, 4, 14; 8:9-20; 10:44-46; 19:6) Dayag, sa dihang namatay ang mga apostoles, natapos ang paghatag sa mga gasa sa espiritu, ug ang milagrosong mga gasa sa espiritu natapos sa tingob sanglit kadtong nakadawat niini nga mga gasa nangamatay na.

Ang dayag nga paghimog milagrosong mga buhat dili mismo pamatuod sa pag-awtorisar sa Diyos, ni ang pagkawalay katakos sa mga alagad sa Diyos sa paghimog mga milagro uban sa tabang sa espiritu sa Diyos magpaduhaduha sa kamatuoran nga sila gigamit sa Diyos. (Mat 7:21-23) Dili tanang Kristohanon sa unang siglo ang makahimog gamhanang mga buhat, makapang-ayo, makasultig lainlaing mga pinulongan, ug makahubad. Si Pablo, ug sa walay duhaduha ang uban pa, pinaagi sa dili-takos nga kalulot sa Diyos gihatagan ug ubay-ubay niini nga mga gasa sa espiritu. Apan kini nga milagrosong mga gasa maoy timaan nga bata pa ang Kristohanong kongregasyon ug gitagna nga mahunong ra. Ngani, bisan si Jesus nagpakita nga ang iyang mga sumusunod mailhan, dili pinaagi sa ilang paghimog gamhanang mga buhat, kondili pinaagi sa ilang gugma sa matag usa.​—1Co 12:​29, 30; 13:​2, 8-13; Ju 13:35.

Gihisgotan ni Pablo ang siyam ka lainlaing mga pagpadayag o mga paglihok sa espiritu: (1) pulong sa kaalam, (2) pulong sa kahibalo, (3) pagtuo, (4) mga gasa sa pagpang-ayo, (5) gamhanang mga buhat, (6) pagpanagna, (7) pag-ila sa inspiradong mga pulong, (8) pagsultig lainlaing mga pinulongan, ug (9) paghubad sa mga pinulongan. Kining tanan nga mga gasa sa espiritu nagsilbi ug usa ka mapuslanong katuyoan nga dili lamang nakaamot sa pag-uswag sa gidaghanon sa kongregasyon kondili nakahatag usab ug espirituwal nga pagpalig-on niini.​—1Co 12:7-11; 14:24-26.

“Pulong sa kaalam.” Bisan tuod ang kaalam mabatonan pinaagi sa pagtuon, pagpadapat, ug sa kasinatian, ang “pulong sa kaalam” nga gihisgotan dinhi dayag nga maoy usa ka milagrosong katakos sa pagpadapat sa kahibalo sa malamposong paagi sa pagsulbad sa mga suliran nga motungha diha sa kongregasyon. (1Co 12:8) Si Pablo nagsulat ug mga sulat nga nahimong bahin sa inspiradong Pulong sa Diyos “sumala sa kaalam nga gihatag kaniya.” (2Pe 3:​15, 16) Kini nga gasa mopatim-awng nadayag usab diha sa katakos sa indibiduwal sa paghimog depensa nga dili masupak o malalis sa mga magsusupak.​—Buh 6:​9, 10.

“Pulong sa kahibalo” ug “pagtuo.” Ang tanan sa unang-siglong Kristohanon nga kongregasyon nakabaton ug paninugdang kahibalo bahin kang Jehova ug sa iyang Anak ingon man sa kabubut-on sa Diyos ug sa iyang mga kinahanglanon  alang sa kinabuhi. Busa, ang “pulong sa kahibalo” maoy usa ka kahibalo nga labaw ug saylo pa sa kahibalo nga nabatonan sa mga Kristohanon sa katibuk-an; kadto maoy usa ka milagrosong kahibalo. Mao man usab ang “pagtuo” ingong usa ka gasa sa espiritu dayag nga maoy usa ka milagrosong pagtuo nga nakatabang sa indibiduwal sa pagbuntog sa samag-bukid nga mga kababagan nga makapugong sa pag-alagad sa Diyos.​—1Co 12:​8, 9; 13:2.

“Mga pagpang-ayo.” Ang gasa sa pagpang-ayo nadayag kanhi pinaagi sa katakos sa bug-os nga pag-ayo sa mga sakit, bisan unsang matanga sa balatian. (Buh 5:​15, 16; 9:​33, 34; 28:​8, 9) Sa wala pa ang Pentekostes, ang pagpang-ayo gihimo ni Jesus ug sa iyang mga tinun-an. Bisan tuod ang ubang mga tawo nga nangaayo nagpakita gayod ug dayag nga pagtuo, wala kinahanglana alang sa may balatian ang pagpakitag kapahayagan sa pagtuo aron mamaayo. (Itandi ang Ju 5:5-9, 13.) Sa usa ka higayon, si Jesus nagbutyag kon nganong ang iyang mga tinun-an wala makaayo sa usa ka patolon, dili tungod sa kawalay pagtuo sa tawo nga mihangyo nga ayohon ang iyang anak, kondili tungod sa kagamay sa pagtuo sa iyang mga tinun-an. (Mat 17:14-16, 18-20) Wala gayod maghisgot ang Kasulatan ug usa ka panghitabo diin si Jesus o ang iyang mga apostoles wala makaayo sa uban tungod sa kawalay pagtuo sa mga mihangyo nga ayohon. Dugang pa, inay nga gamiton ang gasa sa pagpang-ayo sa pag-ayo kang Timoteo sa sakit sa iyang tiyan o sa pagpasangil sa iyang subsob nga pagkasakit tungod sa iyang kawalay pagtuo, girekomendar ni apostol Pablo nga si Timoteo moinom ug diyutayng bino alang sa iyang tiyan.​—1Ti 5:23; tan-awa ang PAGTUO; PAGPANG-AYO.

“Gamhanang mga buhat.” Ang gamhanang mga buhat naglakip sa pagbanhaw sa patayng mga tawo, paghingilin sa mga demonyo, ug gani sa pagbuta sa mga magsusupak. (1Co 12:10) Pinaagi sa pagpasundayag sa maong gamhanang mga buhat nadugangan ang mga magtutuo sa kongregasyon.​—Buh 9:​40, 42; 13:8-12; 19:​11, 12, 20.

“Pagpanagna.” Ang pagpanagna maoy mas labaw nga gasa kay sa pagsultig lainlaing mga pinulongan, sanglit kini nakapalig-on sa kongregasyon. Dugang pa, ang mga dili magtutuo natabangan sa pag-ila nga ang Diyos anaa gayod sa taliwala sa mga Kristohanon. (1Co 14:3-5, 24, 25) Ang tanan diha sa Kristohanong kongregasyon naghisgot bahin sa katumanan sa mga tagna nga natala diha sa Pulong sa Diyos. (Buh 2:​17, 18) Apan ang partikular nga mga tawo nga adunay milagrosong gasa sa pagtagna nakahimo sa pagtagna sa umaabot nga mga panghitabo, sama sa gihimo ni Agabo.​—Buh 11:​27, 28; tan-awa ang TAGNA; MANALAGNA (Mga Manalagna Diha sa Kristohanon Gregong Kasulatan).

“Pag-ila sa inspiradong mga pulong.” Ang pag-ila sa inspiradong mga pulong dayag nga naglangkit sa katakos sa pag-ila kon ang inspiradong pulong naggikan ba sa Diyos o dili. (1Co 12:10) Kini nga gasa magpanalipod sa naghupot niini nga dili malimbongan ug mapahisalaag gikan sa kamatuoran ug magpanalipod sa kongregasyon gikan sa mini nga mga manalagna.​—1Ju 4:1; itandi ang 2Co 11:​3, 4.

“Mga pinulongan.” Duyog sa pagbubo sa espiritu sa Diyos niadtong Pentekostes 33 K.P. mao ang milagrosong gasa sa pagsultig lainlaing mga pinulongan. Tungod niana ang mga 120 ka tinun-an nga nagtigom sa usa ka lawak sa itaas (lagmit duol sa templo) nakahimo sa pagsulti bahin “sa halangdong mga butang sa Diyos” diha sa lumad nga mga pinulongan sa mga Hudiyo ug sa mga kinabig nga nangadto sa Jerusalem gikan sa halayong mga dapit alang sa pagsaulog sa pista. Kining katumanan sa tagna ni Joel nagpamatuod nga gigamit sa Diyos ang bag-ong Kristohanong kongregasyon ug dili na ang Hudiyohanong kongregasyon. Aron makadawat sa libreng gasa sa balaang espiritu, ang mga Hudiyo ug mga kinabig kinahanglang maghinulsol ug mabawtismohan sa ngalan ni Jesus.​—Buh 1:13-15; 2:1-47.

Ang gasa sa pagsultig lainlaing mga pinulongan nakatabang pag-ayo sa unang-siglong mga Kristohanon sa pagwali niadtong nagsulti ug laing mga pinulongan. Kadto maoy usa gayod ka ilhanan alang sa mga dili-magtutuo. Apan si Pablo, sa pagsulat ngadto sa Kristohanong kongregasyon sa Corinto, nagsugo nga sa dihang magtigom, dili ang tanan magsulti ug lainlaing mga pinulongan, kay ang mga estranyo ug mga dili-magtutuo nga mosulod ug dili makasabot makaingon unya nga sila nangabuang. Girekomendar usab niya nga ang pagsultig lainlaing mga pinulongan ‘limitehan sa duha o tulo ang kinadaghanan, ug magturnohay.’ Apan, kon walay usa nga makamaong mohubad, nan ang tawo nga nagsultig laing pinulongan kinahanglang maghilom diha sa kongregasyon, nga magsulti sa iyang kaugalingon ug ngadto sa Diyos. (1Co 14:22-33) Kon walay mohubad, ang iyang pagsultig laing pinulongan dili makapalig-on sa uban, kay walay usa nga magpatalinghog sa iyang isulti tungod kay kini walay pulos alang niadtong dili makasabot niini.​—1Co 14:​2, 4.

Kon ang tawo nga nagsultig laing pinulongan dili arang makahubad, nan wala siya makasabot sa kon unsay iyang gisulti ni masabtan kini sa uban nga dili pamilyar sa maong pinulongan. Busa, gidasig ni Pablo kadtong adunay gasa sa pagsultig  lainlaing mga pinulongan sa pag-ampo nga sila usab unta makahubad ug sa ingon makapalig-on sa tanang mamiminaw. Pinasukad sa nahisgotan, dayag kon nganong, ubos sa pag-inspirar, giisip ni Pablo ang pagsultig lainlaing mga pinulongan ingong mas ubos nga gasa ug kon nganong iyang gipunting nga diha sa kongregasyon mas palabihon pa niyang mosulti ug lima ka pulong uban sa iyang hunahuna (pagsabot) kay sa 10,000 ka pulong sa laing pinulongan.​—1Co 14:​11, 13-19.

“Paghubad sa mga pinulongan.” Ang gasa sa paghubad sa mga pinulongan nadayag sa dihang ang usa ka tawo makamaong mohubad sa usa ka pinulongan nga kanhi wala mahibaloi sa usa nga nagbaton niini nga gasa. (1Co 12:10) Kini nga gasa sa pagkatinuod nakapauswag sa gasa sa pagsultig lainlaing mga pinulongan, sanglit ang tibuok kongregasyon mapalig-on pinaagi sa pagkadungog sa hubad.​—1Co 14:5.

Ubang mga Paglihok sa Espiritu. Sa dihang naghisgot sa pipila ka paglihok sa espiritu maylabot sa pagpahiluna sa indibiduwal nga mga membro sa lawas ni Kristo, si Pablo miingon: “Gipahiluna sa Diyos kini sila diha sa kongregasyon, una, mga apostoles; ikaduha, mga manalagna; ikatulo, mga magtutudlo; unya gamhanang mga buhat; unya mga gasa sa pagpang-ayo; makatabang nga pagpang-alagad, katakos sa pagdumala, pagsultig lainlaing mga pinulongan.” (1Co 12:​27, 28) Ang “makatabang nga pagpang-alagad” lagmit naglakip sa organisadong mga kahikayan sa pagtabang sa mga igsoon nga kabos sa materyal, sama sa pagpang-apod-apod ug pagkaon ngadto sa kabos nga mga babayeng balo, nga alang niini may pito ka lalaki nga “puno sa espiritu ug kaalam” ang gitudlo didto sa kongregasyon sa Jerusalem. (Buh 6:1-6) Ang ‘mga katakos sa pagdumala’ gikinahanglan aron matuman ang buluhaton nga gilatid ni Jesus sa paghimog mga tinun-an. (Mat 28:​19, 20) Ang misyonaryong buluhaton maingon man ang pagtukod ug bag-ong mga kongregasyon ug dayon ang paggiya sa mga kalihokan niini nga mga kongregasyon nagkinahanglan ug batid nga pagdumala. Niining bahina, makaiikag nga si Pablo, maylabot sa iyang bahin sa programa sa Diyos sa pagpanukod, naghisgot sa iyang kaugalingon ingong “maalamon nga tagdumala sa mga buluhaton.”​—1Co 3:10.

Pagkontrolar sa mga Gasa sa Espiritu. Dayag nga kadtong adunay mga gasa sa espiritu makahimo lamang sa paggamit niini kon ang espiritu ni Jehova molihok nganha kanila aron sa pagpasundayag sa maong gasa. Pananglitan, didto sa Cesarea, bisan tuod si Pablo miestar sa balay ni Felipe, nga “may upat ka anak nga babaye, mga ulay, nga nanagna,” dili ang usa niini nga mga anak nga babaye kondili si Agabo, usa ka manalagna nga naggikan sa Judea, ang mitagna bahin sa pagdakop kang Pablo. (Buh 21:8-11) Sa panagkatigom sa kongregasyon, ang usa ka manalagna makadawat ug pinadayag samtang ang laing manalagna nagsulti; apan kadtong adunay mga gasa sa espiritu makakontrolar niini sa dihang ang espiritu sa Diyos mogahom kanila, nga mao, sila makapugong sa pagsulti hangtod nga kahatagan ug kahigayonan. Busa, ang pagpanagna, pagsultig lainlaing mga pinulongan, ug ang paghubad mahimo sa hapsay nga paagi diha sa kongregasyon, alang sa pagpalig-on sa tanan.​—1Co 14:26-33.