Joel 3:1-21
3 “!Yufala i luk! Long ol dei ya mo long taem ya,Taem mi tekembak ol man Juda mo Jerusalem we oli stap kalabus,+
2 Bambae mi hivimap olgeta nesen tu wanplesMo mi tekem olgeta i godaon long Vali* Blong Jehosafat.*Bambae mi tekem olgeta i go long kot long ples ya+Long bihaf blong ol man blong mi mo olting blong mi hemia Isrel,From oli mekem olgeta oli go stap wanwan olbaot long ol nesen ya,Mo oli seraotem graon blong mi i go long olgeta wanwan.+
3 Oli sakem ol spesel ston from ol man blong mi,+Oli salem wan boe, blong pem wan prostitutMo salem wan gel blong kasem waen blong dring.
4 ?Mo tu, yufala i gat wanem agensem mi,O Taea mo Saedon mo olgeta rijen blong Filistia??Yufala i stap givimbak long mi from wan samting?Sipos yufala i stap givimbak long mi,Bambae kwiktaem nomo mi mekem ol fasin ya i kasembak hed blong yufala.+
5 From we yufala i tekem silva mo gol blong mi,+Mo yufala i karem sas samting blong mi we i beswan, i go long ol tempol blong yufala.
6 Mo ol man Juda mo Jerusalem, yufala i salemaot olgeta finis i go long ol man Gris,+Blong tekemaot olgeta oli gowe long teritori blong olgeta.
7 Naoia mi pulum olgeta blong oli kamaot long ples ya we yufala i salem olgeta i go long hem,+Mo bambae mi mekem ol fasin ya i kasembak hed blong yufala.
8 Bambae mi salem ol boe mo ol dota blong yufala i go long ol man Juda,+Mo olgeta bambae oli salem olgeta i go long ol man Seba, long wan nesen longwe,Jehova nao i talem samting ya.
9 Yufala i talemaot samting ya long olgeta nesen se:+‘!Yufala i mekemrere blong* faet! !Yufala i singaot ol strong man blong faet!!I gud olgeta soldia oli kam klosap, i gud oli muv i go!+
10 Yufala i hamarem ol aean blong plao i kam ol naef blong faet, mo ol huknaef blong katem branj blong ol tri i kam ol spia.
I gud man we i slak i talem se: “Mi mi strong.”
11 !Olgeta nesen raonabaot, yufala i kam wanples, yufala i kam mo givhan!’”+O Jehova, yu sanem ol strong man* blong yu i kam daon long ples ya.
12 “I gud ol nesen oli girap mo oli kam long Vali* Blong Jehosafat,From long ples ya nao bambae mi sidaon blong jajem olgeta nesen raonabaot.+
13 Yufala i mas yusum wan huknaef, from ol kakae oli raep.
Yufala i kam mo yufala i stanstanap long ol grep, from ples blong mekem waen i fulap gud.+
Ol dram oli fulap gogo oli kafkafsaed, from we rabis fasin blong ol man i plante tumas.
14 Fulap man, fulap man oli stap long vali* blong desisen,From dei blong Jehova i kam klosap finis long vali* blong desisen.+
15 San mo mun bambae i kam tudak,Mo ol sta bambae oli no moa saen.
16 Mo Jehova bambae i stap long Saeon i singaot bigwan,Mo bambae i stap long Jerusalem, i leftemap voes blong hem.
Nao heven mo wol bambae i muvmuv strong,Be Jehova bambae i olsem sefples blong ol man blong hem,+Yes, wan strong sefples blong ol man Isrel.
17 Mo bambae yufala i mas save se mi mi Jehova, God blong yufala, mi stap long Saeon, bigfala hil blong mi we i tabu.+
Jerusalem bambae i kam wan holi ples,+Mo ol strenja* bambae oli no moa pastru long hem.+
18 Long dei ya, swit waen bambae i ronaot long ol bigfala hil,+Ol hil bambae oli fulap gud long melek,Mo ol springwota blong Juda bambae oli fulap gud long wota.
Wan springwota bambae i ronaot long haos blong Jehova,+Mo bambae i givim wota long Krik* Blong Ol Tri Ya Akasia.
19 Be Ijip bambae i kam emti,+Mo Edom bambae i kam wan draeples we i no gat samting long hem,+From rabis fasin we ol man oli mekem long ol man Juda,+We long graon blong olgeta, oli mekem blad blong ol gudfala man i ron.+
20 Be Juda, oltaem bambae i gat man i stap long hem,Mo long Jerusalem tu, long olgeta jeneresen we i kam.+
21 Bifo mi luk olgeta se oli gat fol from blad we oli mekem i ron, be bambae mi no moa luk se oli gat fol from blad ya,+Mo Jehova bambae i stap long Saeon.”+
Ol futnot
^ NT: “Levelples Long Medel Blong Ol Hil.”
^ Hemia i minim “Jehova i Jaj.”
^ NT: “Yufala i mekem yufala i tabu blong yufala i.”
^ NT: “ol strong man blong faet.”
^ NT: “Levelples Long Medel Blong Ol Hil.”
^ NT: “levelples long medel blong ol hil.”
^ NT: “levelples long medel blong ol hil.”
^ NT: “ol man blong narafala kantri.”
