Hagae 2:1-23

  • Seken tempol we bambae i fulap long glori (1-9)

    • Bambae olgeta nesen i seksek (7)

    • Ol gudgudfala samting blong nesen oli kam insaed (7)

  • Oli kasem blesing taem oli wokem bakegen tempol (10-19)

    • No save mekem narafala samting i kam tabu (10-14)

  • Wan mesej blong Serubabel (20-23)

    • “Bambae mi mekem yu yu kam olsem wan spesel ring” (23)

2  Long namba 21 dei blong namba 7 manis, tok blong Jehova i kamtru long profet ya Hagae,+ i se:  “Plis yu askem long Serubabel+ boe blong Sealtiel we i hed gavman blong Juda,+ mo long Josua+ boe blong Jehosadak+ we i hae pris, mo ol narafala man se:  ‘?I gat sam long yufala long ples ya we oli bin luk haos* ya bifo, taem i naes yet?+ ?Naoia yufala i luk se i olsem wanem? ?Ating yufala i agri se hem i no sem mak nating long hemia bifo?’+  “Jehova i talem se: ‘Be naoia Serubabel, yu mas strong, mo yu Josua boe blong Jehosadak we i hae pris, yu mas strong.’ “‘Mo olgeta man long ples ya, yufala i mas strong’+ hemia nao tok blong Jehova, ‘mo yufala i wok.’ “‘From mi mi stap wetem yufala,’+ hemia nao tok blong Jehova komanda blong ol ami.  Yufala i mas tingbaot ol samting we mi promes long yufala taem yufala i kamaot long Ijip,+ mo spirit blong mi i stap yet wetem yufala.*+ Yufala i no mas fraet.’”+  “From hemia samting we Jehova komanda blong ol ami i talem, i se: ‘Wan moa taem bakegen—smol taem nomo yet—mo bambae mi seksekem heven mo wol mo solwota mo drae graon.’+  “‘Mo bambae mi seksekem olgeta nesen, nao ol gudgudfala* samting blong olgeta nesen bambae oli kam insaed,+ mo bambae haos blong mi i fulap long glori,’*+ hemia nao tok blong Jehova komanda blong ol ami.  “‘Silva i blong mi, mo gol i blong mi,’ hemia nao tok blong Jehova komanda blong ol ami.  “‘Long fiuja haos ya bambae i naes moa i bitim hemia bifo,’+ hemia nao tok blong Jehova komanda blong ol ami. “‘Mo bambae mi putum pis long ples ya,’+ hemia nao tok blong Jehova komanda blong ol ami.” 10  Long namba 24 dei blong namba 9 manis, long seken yia blong Darias, tok blong Jehova i kamtru long profet ya Hagae,+ i se: 11  “Hemia samting we Jehova komanda blong ol ami i talem, i se: ‘Plis, yu askem long ol pris long saed blong loa:+ 12  “Sipos wan man i karem mit we i tabu* long poket blong klos blong hem, mo klos blong hem i tajem bred o supsup o waen o oel o enikaen kakae, ?bambae samting ya i kam tabu?”’” Ol pris oli ansa se: “!Nogat!” 13  Biaen Hagae i askem se: “Sipos man we i no klin from i tajem wan dedbodi,* i kam tajem wan long ol samting ya, ?bambae samting ya i kam doti?”+ Ol pris oli ansa se: “Yes, bambae samting ya i kam doti.” 14  Nao Hagae i talem se: “‘Ol man ya oli olsemia nao, mo long fes blong mi, nesen ya i olsemia nao,’ hemia nao tok blong Jehova, ‘mo olgeta wok we oli mekem, i olsemia tu. Eni samting we oli kam givim long mi long ples ya, oli doti.’ 15  “‘Be naoia, plis, yufala i putum hat blong yufala* long samting ya stat tede i go: Taem oli no putum wan ston yet antap long wan ston long tempol blong Jehova,+ 16  ?ol samting i olsem wanem? Taem wan man i go long wan hip blong wit, hem i ting se bambae i fulumap 20 bag, be i fulumap 10 bag nomo, mo taem wan man i go long tang blong waen blong i kasem 50 jag waen long hol blong waen, be i fulumap 20 nomo.+ 17  Mi spolem gud yufala, yes evri wok blong yufala, long win we i hot we i hot mo long sik ya mildiu+ mo long ol ston blong aes, be i no gat wan long yufala i tanemraon i kam long mi,’ hemia nao tok blong Jehova. 18  “‘Plis yufala i putum hat blong yufala* long samting ya stat tede i go, stat long namba 24 dei blong namba 9 manis, stat long dei we oli putum fandesen blong tempol blong Jehova,+ i gud yufala i putum hat blong yufala long samting ya: 19  ?I gat ol sid yet long stohaos?+ ?Rop blong grep, figtri, mo grenadin, mo olif tri, oli karem frut finis? Stat tede bambae mi sanem wan blesing i kam.’”+ 20  Tok blong Jehova i kamtru long Hagae seken taem long namba 24 dei blong manis ya,+ i se: 21  “Yu talem long Serubabel we i hed gavman blong Juda se: ‘Bambae mi seksekem heven mo wol.+ 22  Bambae mi kafsaedem tron* blong ol kingdom mo mi finisim paoa blong ol kingdom blong olgeta nesen.+ Mo bambae mi winim ol jariot mo ol man we oli raed long olgeta, mo ol hos mo ol man we oli raed long olgeta bambae oli foldaon, yes bambae oli kilkilim olgeta bakegen long naef blong faet.’”+ 23  Jehova komanda blong ol ami i talem se: “‘Long dei ya bambae mi tekem yu, man blong wok blong mi Serubabel+ boe blong Sealtiel,’+ hemia nao tok blong Jehova, ‘mo bambae mi mekem yu yu kam olsem wan spesel ring, from we yu nao man we mi bin jusumaot,’ hemia nao tok blong Jehova komanda blong ol ami.”

Ol futnot

NT: “tempol.”
MNT: “mo taem spirit blong mi i stap stanap long medel blong yufala.”
NT: “sas.”
Yu luk Diksonari.
Hemia animol o mit we oli bin givim i go long God blong mekem sakrefaes long hem.
NT: “wan sol.”
PT: “Yufala i tingting gud.”
PT: “yufala i tingting gud.”
NT: “jea blong king.”