Seken Buk Blong Ol King 20:1-21
20 Long ol dei ya, Hesekia i sik we i sik we klosap i ded.+ Nao profet Aesea we i boe blong Amoj i kam mo i talem long hem se: “Hemia samting we Jehova i talem: ‘I gud yu talem sam samting long olgeta long haos blong yu, from we bambae yu ded, bambae yu no kam gud.’”+
2 Taem Hesekia i harem samting ya, hem i tanem fes blong hem i go long wol mo i prea long Jehova, i se:
3 “O Jehova, mi askem strong long yu se plis yu tingbaot mi. Mi mi wokbaot long fored blong yu we tingting blong mi i stap strong long yu, mo mi mekem olsem long fulhat blong mi. Mo mi mekem ol gudfala samting long fes blong yu.”+ Mo Hesekia i stat blong krae bigwan.
4 Taem Aesea i no kasem yet medel blong yad ya, tok blong Jehova i kam long hem, i se:+
5 “Yu gobak mo yu talem long Hesekia we i lida blong ol man blong mi, se: ‘Hemia samting we Jehova, God blong olfala blong yu Deved, i talem: “Mi mi harem prea blong yu finis. Mo mi luk wota blong ae blong yu.+ Naoia mi mi mekem yu yu kam gud bakegen.+ Nao long namba 3 dei bambae yu go antap long haos blong Jehova.+
6 Bambae mi mi ademap 15 moa yia long laef* blong yu, mo bambae mi tekemaot yu mo taon ya long han blong king blong Asiria,+ mo bambae mi difendem taon ya from nem blong mi mo from man blong wok blong mi Deved.”’”+
7 Nao Aesea i talem se: “Yufala i karem wan kek i kam we oli wokem long ol drae fig we oli flatem.” Ale oli tekem i kam mo oli putum long boela blong hem, nao sloslo hem i stap kam gud bakegen.+
8 Nao Hesekia i askem long Aesea se: “?Wanem saen+ nao bambae i soemaot se Jehova bambae i mekem mi mi kam gud bakegen, mo se long namba 3 dei, bambae mi go antap long haos blong Jehova?”
9 Nao Aesea i ansa se: “Hemia saen we i kam long Jehova, blong soemaot long yu se Jehova bambae i mekem samting we hem i bin talem: ?Yu yu wantem se sado blong san we i stap long step ya,* bambae i muv i go ten step long fored o i muv ten step i kambak?”+
10 Nao Hesekia i talem se: “I isi nomo blong sado i muv i go ten step long fored, be i no isi blong i arier i kambak ten step.”
11 Nao profet ya Aesea i singaot i go long Jehova, mo Hem i mekem sado blong san we i bin muv i godaon finis long step blong Ahas, i muv i kambak ten step.+
12 Long taem ya king blong Babilon, Berodak-baladan we i boe blong Baladan, i sanem ol leta mo wan presen i go long Hesekia, from we hem i harem se Hesekia i bin sik.+
13 Hesekia i welkamem* olgeta, mo i soemaot long olgeta, ful haos blong ol sas samting blong hem,+ hemia silva, gol, balsam oel mo ol narafala gudfala oel, ol tul blong faet blong hem, mo i soem evri samting we i stap long ol ples blong hem blong putumgud ol sas samting. Hesekia i soem evri samting long prapa haos* blong hem, mo evri samting long olgeta ples we hem i rul long hem. I no gat wan samting nating i stap we hem i no soemaot long olgeta.
14 Afta long samting ya, profet ya Aesea i kam luk King Hesekia mo i askem long hem se: “?Ol man ya oli talem wanem? ?Mo oli kam wea?” Nao Hesekia i talem se: “Oli kam long wan ples we i longwe, oli kam long Babilon.”+
15 Ale profet i gohed i askem se: “?Oli luk wanem long haos* blong yu?” Hesekia i ansa se: “Oli luk evri samting long haos* blong mi. Mi soem evri samting we i stap long ol ples blong mi blong putumgud ol sas samting. I no gat wan samting nating i stap we mi no soemaot long olgeta.”
16 Nao Aesea i talem long Hesekia se: “Yu harem tok blong Jehova.+
17 Jehova i talem se: ‘!Yu luk! I gat taem i stap kam we bambae evri samting insaed long haos* blong yu, wetem olgeta samting we ol bubu blong yu oli putumgud i stap kam kasem tede, bambae ol man oli karem i go long Babilon.+ Bambae i no gat wan samting nating i stap.
18 Mo sam long ol stret pikinini boe blong yu, we bambae yu kam papa blong olgeta, bambae ol man oli karem olgeta i go+ mo bambae oli kam ol haeman insaed long pales blong king blong Babilon.’”+
19 Ale Hesekia i talem long Aesea se: “Tok ya blong Jehova we yu talem, i gud.”+ Mo i gohed se: “I gud sipos long olgeta yia* we bambae mi laef i stap, bambae i gat pis mo ol samting oli stap gud, oli no jenis.”*+
20 Ol narafala stori blong Hesekia, mo ol bigfala samting we hem i mekem, mo olsem wanem hem i wokem pul blong wota,+ wetem rod blong wota ya blong i go kasem taon,+ oli raetemdaon long buk blong histri blong ol king blong Juda.
21 Biaen Hesekia i go spel wetem ol olfala blong hem,+ mo boe blong hem Manase+ i kam king long ples blong hem.+
