Tshenolo e e Yang Kwa go Johane 17:1-18

  • “Babelona yo Mogolo” o a atlholwa (1-18)

    • Seaka se segolo se ntse mo sebataneng se sehibidu (1-3)

    • Sebatana “se ne se le teng, mme jaanong ga se tlhole se le teng, le fa go ntse jalo, se tloga se tswa mo khuting e e kwa tengteng” (8)

    • Dinaka tse di lesome di tla lwa le Kwana (12-14)

    • Dinaka tse di lesome di tla tlhoa seaka (16, 17)

17  Mongwe wa baengele ba ba supa ba ba neng ba tshotse dikotlele tse supa+ o ne a tla a bo a nthaya a re: “Tla, mme ke tla go bontsha katlholo e seaka* se segolo se se nnang mo metsing a mantsi se tla e amogelang,+  se dikgosi tsa lefatshe di neng tsa dira boitsholo jo bo sa siamang jwa tlhakanelodikobo le sone,+ mme batho ba ba nnang mo lefatsheng bone ba ne ba tagwa ke beine ya sone e e emelang boitsholo jwa sone jo bo sa siamang jwa tlhakanelodikobo.”*+  Mme moengele yoo o ne a nkisa kwa nageng a dirisa moya o o boitshepo. Mme ke ne ka bona mosadi a ntse mo sebataneng se sehibidu* se se neng se tletse maina a tlhapatso e bile se na le ditlhogo di le supa le dinaka di le lesome.  Mosadi yoo o ne a apere seaparo se se phepole+ le se sehibidu, e bile o ne a kgabile ka gauta le maje a a tlhwatlhwakgolo le diperela,+ mme mo seatleng sa gagwe o ne a tshotse senwelo sa gauta se se neng se tletse dilo tse di ferosang sebete le dilo tse di seng phepa tsa boitsholo jwa gagwe jo bo sa siamang jwa tlhakanelodikobo.*  Mo phatleng ya gagwe go ne go kwadilwe leina leno le le sa itsiweng: “Babelona yo Mogolo, mmadiaka+ le mmadilo tse di ferosang sebete tsa lefatshe.”+  Mme ke ne ka lemoga gore mosadi yoo o ne a tagilwe ke madi a ba ba boitshepo le a basupi ba ga Jesu.+ E rile ke mmona, ke ne ka gakgamala fela thata.  Ka jalo, moengele yoo o ne a nthaya a re: “Ke ka ntlha yang fa o ne o gakgamala? Ke tla go bolelela sephiri ka mosadi yono+ le ka sebatana se a se palameng, se se nang le ditlhogo di le supa le dinaka di le lesome:+  Sebatana se o neng wa se bona se ne se le teng, mme jaanong ga se tlhole se le teng, le fa go ntse jalo, se tloga se tswa mo khuting e e kwa tengteng,*+ mme se tla senngwa. Mme batho ba ba nnang mo lefatsheng, ba maina a bone a sa kwalwang mo momenong wa botshelo+ go tloga fa e sa le batho ba bopiwa,* ba tla gakgamala fa ba bona gore sebatana seo se ne se le teng, mme jaanong ga se tlhole se le teng, le fa go ntse jalo, se tla nna teng gape.  “Gore motho a tlhaloganye seno, o tshwanetse a bo a le botlhale: Ditlhogo tse supa+ di kaya dithaba tse supa, tse mosadi a nnang mo godimo ga tsone. 10  Mme go na le dikgosi di le supa: Di le tlhano di ole, e le nngwe e gone, mme e nngwe ga e ise e goroge; le fa go ntse jalo fa e goroga, e tla nna teng ka lobakanyana. 11  Mme sebatana se se neng se le teng mme jaanong se sa tlhole se le teng,+ le sone ke kgosi ya borobedi, mme e tswa mo go tse supa, mme e tla senngwa. 12  “Dinaka tse di lesome tse o di boneng di kaya dikgosi di le lesome tse di iseng di amogele bogosi, mme di tla amogela taolo ya gore di buse e le dikgosi ka ura e le nngwe le sebatana. 13  Dikgosi tseno di na le boikaelelo bo le bongwe, ka jalo, di naya sebatana maatla le taolo ya tsone. 14  Tseno di tla lwa le Kwana,+ mme e re ka Kwana e le Morena wa barena le Kgosi ya dikgosi,+ o tla di fenya.+ Gape, ba ba nang le ene ba ba biditsweng le ba ba tlhophilweng le ba ba ikanyegang le bone ba tla fenya.”+ 15  O ne a nthaya a re: “Metsi a o a boneng, a seaka se ntseng mo go one, a kaya merafe le boidiidi jwa batho le ditšhaba le dipuo* tse di farologaneng.+ 16  Mme dinaka tseno tse di lesome+ tse o di boneng mmogo le sebatana,+ di tla tlhoa seaka seo,+ di tla se senya di bo di se tlogela se sa apara, mme di tla ja nama ya sone di bo di se ja ka molelo.+ 17  Gonne Modimo o tsentse seo mo dipelong tsa tsone gore di diragatse kakanyo e le nngwe e tsotlhe di nang le yone, e tota e leng kakanyo ya gagwe,+ ka go naya sebatana bogosi jwa tsone,+ go fitlha mafoko a Modimo a diragadiwa. 18  Mme mosadi+ yo o mmoneng o kaya motse o mogolo o o laolang dikgosi tsa lefatshe.”

Dintlha Tse di Kwa Tlase

Kgotsa “mogwebakammele.”
Ka Segerika, por·nei′a. Bona Ditlhaloso Tsa Mafoko.
Kgotsa “bohibidu jo bo galotseng.”
Ka Segerika, por·nei′a. Bona Ditlhaloso Tsa Mafoko.
Bona ntlh. mo go Mat 25:34.
Seger., “diteme.”