Tshenolo e e Yang Kwa go Johane 19:1-21
19 Morago ga moo, ke ne ka utlwa lentswe le le kwa godimo le e keteng la boidiidi jo bogolo kwa legodimong. Ba ne ba re: “Bakang Jah!*+ Modimo wa rona ke Mmoloki; o a galalela e bile o maatla,
2 ka gonne dikatlholo tsa gagwe di boammaaruri e bile di siame.+ Gonne o otlhaile seaka* se segolo se se neng sa senya lefatshe ka boitsholo jwa sone jo bo sa siamang jwa tlhakanelodikobo,* e bile o busoloseditse madi a batlhanka ba gagwe a a mo diatleng tsa sone.”*+
3 Gone fela foo, ba ne ba bua lekgetlo la bobedi ba re: “Bakang Jah!*+ Gonne mosi o o tswang mo go sone fa se ntse se sha o tswelela o tlhatloga ka bosakhutleng le go ya go ile.”+
4 Mme bagolwane ba ba 24+ le ditshedi tse nnê+ ba ne ba khubama ba bo ba obamela Modimo yo o ntseng mo setulong sa bogosi ba re: “Amen! Bakang Jah!”*+
5 Gape, go ne ga tswa lentswe mo setulong sa bogosi le re: “Bakang Modimo wa rona, lona lotlhe batlhanka ba gagwe+ ba lo mmoifang, ba bannye le ba bagolo.”+
6 Mme ke ne ka utlwa modumo o o utlwalang jaaka lentswe la boidiidi jo bogolo le o o utlwalang jaaka mosumo wa metsi a mantsi e bile o utlwala jaaka modumo wa tumo e kgolo ya maru. Ba ne ba re: “Bakang Jah,*+ ka gonne Jehofa* Modimo wa rona, Mothatayotlhe,+ o simolotse go busa e le kgosi!+
7 A re itumeleng thata re bo re mo galaletse, ka gonne lenyalo la Kwana le gorogile e bile mosadi wa gagwe o ipaakantse.
8 Eleruri, o neilwe tshiamelo ya gore a apare letsela le le phatsimang, le le phepa, le le boleta, ka gonne letsela le le boleta le emela ditiro tse di siameng tsa ba ba boitshepo.”+
9 Mme o ne a nthaya a re, “Kwala o re: Go itumela ba ba laleditsweng kwa dijong tsa maitseboa tsa lenyalo la Kwana.”+ Gape o ne a nthaya a re: “Mafoko ano a Modimo a boammaaruri.”
10 Foo ke ne ka khubama fa dinaong tsa gagwe gore ke mo obamele. Le fa go ntse jalo, o ne a nthaya a re: “Nnyaa! O se ka wa dira jalo!+ Le nna ke motlhanka fela jaaka wena le bakaulengwe ba gago ba ba nayang bosupi ka Jesu.+ Obamela Modimo!+ Gonne bosupi jo bo buang ka Jesu ke jone jo bo dirang gore go nne le boporofeti.”+
11 Ke ne ka bona legodimo le bulega mme ka bona pitse e tshweu.+ Yo o ntseng mo go yone o bidiwa Boikanyego+ le Boammaaruri,+ mme o atlhola ka tsela e e siameng e bile o tswelela a lwa ka tsela e e siameng.+
12 Matlho a gagwe a tshwana le kgabo ya molelo,+ mme mo tlhogong ya gagwe go na le dirwalo tsa segosi di le dintsi. O kwadilwe leina le go seng ope yo o le itseng fa e se ene fela,
13 e bile o apere seaparo sa ka fa ntle se se tshasegetsweng ke madi,* mme leina le a bidiwang ka lone ke Lefoko+ la Modimo.
14 Gape masomosomo a a kwa legodimong a ne a mo setse morago a palame dipitse tse ditshweu, mme a ne a apere letsela le lesweu, le le phepa, le le boleta.
15 Mme mo molomong wa gagwe go tswa tšhaka e e bogale e telele,+ e a tla otlhayang ditšhaba ka yone, mme o tla di busa ka thobane ya tshipi.+ Mo godimo ga moo, o gata segatisetso sa beine sa Modimo Mothatayotlhe, se se tshwantshetsang bogale jwa Gagwe.+
16 Mo seaparong sa gagwe sa ka fa ntle, tota mo seropeng sa gagwe, go kwadilwe leina le le reng, Kgosi ya dikgosi le Morena wa barena.+
17 Gape ke ne ka bona moengele a eme mo letsatsing, mme o ne a goa ka lentswe le le kwa godimo a raya dinonyane tsotlhe tse di fofang kwa legodimong* a re: “Tlang kwano, phuthegelang kwa moletlong o mogolo wa dijo tsa maitseboa tsa Modimo,+
18 gore lo tle lo je nama ya dikgosi le nama ya balaodi ba masole le nama ya banna ba ba nonofileng+ le nama ya dipitse le ya ba ba di palameng,+ le nama ya batho botlhe, ya ba e seng batlhanka mmogo le ya batlhanka le ya ba bannye le ba bagolo.”
19 Mme ke ne ka bona sebatana le dikgosi tsa lefatshe le masole a tsone a phuthegile mmogo gore a lwe le yo o palameng pitse le masole a gagwe.+
20 Mme sebatana seo se ne sa tshwarwa. Gape go ne ga tshwarwa le moporofeti wa maaka+ yo o neng a dira ditshupo fa pele ga sone tse a neng a tsietsa batho ba ba ileng ba amogela letshwao la sebatana ka tsone+ le ba ba obamelang setshwantsho sa sone.+ Boobabedi ba ne ba latlhelwa mo letšheng le le tukang molelo o mogolo ba ntse ba tshela.+
21 Le fa go ntse jalo, ba bangwe botlhe ba ne ba bolawa ka tšhaka e telele e e tswang mo molomong wa yo o palameng pitse.+ Mme dinonyane tsotlhe di ne tsa kgora nama ya bone.+
Dintlha Tse di Kwa Tlase
^ Kgotsa “Halelujah!” “Jah” ke khutshwafatso ya leina Jehofa.
^ Kgotsa “mogwebakammele.”
^ Ka Segerika, por·nei′a. Bona Ditlhaloso Tsa Mafoko.
^ Seger., “mo seatleng sa sone.”
^ Kgotsa “Halelujah!” “Jah” ke khutshwafatso ya leina Jehofa.
^ Kgotsa “Halelujah!” “Jah” ke khutshwafatso ya leina Jehofa.
^ Kgotsa “Halelujah!” “Jah” ke khutshwafatso ya leina Jehofa.
^ Bona Dintlha A5.
^ Kgotsa gongwe “se se kgatšhitsweng madi.”
^ Kgotsa “kwa loaping.”
