Tshenolo e e Yang Kwa go Johane 6:1-17
-
Kwana o bula dikano tsa ntlha tse thataro (1-17)
-
Mofenyi o palame pitse e tshweu (1, 2)
-
Mopalami wa pitse e e bohibidu jwa molelo o tshwanetse go tlosa kagiso (3, 4)
-
Mopalami wa pitse e ntsho o tshwanetse go tlisa leuba (5, 6)
-
Mopalami wa pitse e tshetlha o bidiwa Loso (7, 8)
-
Ba ba bolailweng ba ka fa tlase ga sebeso (9-11)
-
Thoromo e kgolo ya lefatshe (12-17)
-
6 Mme fa Kwana+ a bula sekano* sa ntlha mo go tse supa,+ ke ne ka bona setshedi sa ntlha mo ditsheding tse nnê+ e bile ke ne ka se utlwa se bua ka lentswe le le utlwalang jaaka tumo ya maru, se re: “Tla!”
2 Ke ne ka bona pitse e tshweu,+ mme yo o e palameng o ne a tshotse bora. Modimo o ne a mo naya serwalo,+ mme o ne a tsamaya a fenya baba ba gagwe a bo a digela phenyo ya gagwe.+
3 E rile a bula sekano* sa bobedi, ke ne ka utlwa setshedi sa bobedi+ se re: “Tla!”
4 Mme ke ne ka bona pitse e nngwe e e bohibidu jwa molelo e tla, mme yo o e palameng o ne a newa taolo ya go tlosa kagiso mo lefatsheng gore batho ba bolaane, mme o ne a newa tšhaka e kgolo.+
5 E rile a bula sekano sa boraro,+ ke ne ka utlwa setshedi sa boraro+ se re: “Tla!” Mme ke ne ka bona pitse e ntsho, mme yo o e palameng o ne a tshotse sekale ka seatla.
6 Mme ke ne ka utlwa lentswe le tswa mo gare ga ditshedi tse nnê le re: “Kilogerama* ya korong ke denario*+ le dikilogerama di le tharo tsa barele* ke denario; mme o se ka wa senya leokwane la motlhware le beine.”+
7 E rile a bula sekano sa bonê, ke ne ka utlwa lentswe la setshedi sa bonê+ le re: “Tla!”
8 Ke ne ka bona pitse e tshetlha, mme leina la yo o e palameng e ne e le Loso. Lebitla* le ne le mo setse morago le le gaufi thata. Mme di ne tsa newa taolo mo karolong ya bonê* ya lefatshe, gore di bolaye batho ka tšhaka e telele le ka tlhaelo ya dijo+ le ka bolwetse jwa leroborobo le ka dibatana tsa naga tsa lefatshe.+
9 E rile a bula sekano sa botlhano, ke ne ka bona madi*+ a ba ba bolailweng ka ntlha ya lefoko la Modimo le ka ntlha ya tiro ya go rera e ba neng ba e dira+ a le ka fa tlase ga sebeso.+
10 Madi a batho bano a ne a goa ka lentswe le le kwa godimo a re: “Morena Molaodimogolo yo o boitshepo le yo o boammaaruri,+ o tla tswelela o letile go fitlha leng pele ga o atlhola le go busolosetsa madi a rona mo go ba ba nnang mo lefatsheng?”+
11 Mme mongwe le mongwe wa bone o ne a newa seaparo se setelele se sesweu,+ mme ba ne ba bolelelwa gore ba ikhutse ka lobakanyana go fitlha palo ya batlhankammogo le bone le bomorwarraabone e felela; le bone ba tloga ba bolawa fela jaaka bano ba bolailwe.+
12 E rile a bula sekano sa borataro, ke ne ka bona thoromo e kgolo ya lefatshe; mme letsatsi le ne la nna lentsho jaaka letsela le lentsho,* mme ngwedi e ne ya nna khibidu jaaka madi,+
13 le dinaledi tsa legodimo di ne tsa wela mo lefatsheng jaaka fa setlhare sa mofeige se se tshikhinngwang ke phefo e e maatla se tlhotlhora difeige tsa sone tse di sa butswang.
14 Legodimo le ne la menwa jaaka momeno le bo le nyelela,+ mme thaba nngwe le nngwe le setlhaketlhake sengwe le sengwe di ne tsa tlosiwa mo lefelong la tsone.+
15 Foo dikgosi tsa lefatshe, balaodibagolo, balaodi ba masole, bahumi, ba ba nonofileng, batlhanka botlhe le batho botlhe ba e seng batlhanka ba ne ba iphitlha mo dikgageng le mo gare ga mafika a dithaba.+
16 Mme ba ne ba nna ba raya dithaba le mafika ba re: “Welang mo godimo ga rona+ lo bo lo re fitlhele sefatlhego sa Ene yo o ntseng mo setulong sa bogosi+ le mo bogaleng jwa Kwana,+
17 ka gonne letsatsi le legolo la bogale jwa gagwe le gorogile,+ mme ke mang yo o ka kgonang go le itshokela?”+
Dintlha Tse di Kwa Tlase
^ Bona Ditlhaloso Tsa Mafoko.
^ Bona Ditlhaloso Tsa Mafoko.
^ Seger., “Kwatara.” Bona Dintlha B14.
^ Ledi la tshipi la selefera la kwa Roma le le lekanang le tuelo ya modiri ya letsatsi le le lengwe. Bona Dintlha B14.
^ Semela se se tshwanang le korong.
^ Seger., “mo nngwennêng (1/4).”
^ Kgotsa “Hadese.” Bona Ditlhaloso Tsa Mafoko.
^ Go lebega go tewa madi a bone a a ileng a tshololelwa kwa sebesong.
^ Gantsi mofuta ono wa letsela le lentsho o ne o dirwa ka boboa jwa podi.
