Tshenolo e e Yang Kwa go Johane 14:1-20

  • Kwana le ba ba 144 000 (1-5)

  • Melaetsa e e tswang kwa baengeleng ba bararo (6-12)

    • Moengele yo o fofang mo gare ga legodimo a tshotse dikgang tse di molemo (6, 7)

  • Go itumela ba ba swang ba le seoposengwe le Morena (13)

  • Dithobo tse pedi tsa lefatshe (14-20)

14  Go tswa foo, ke ne ka bona Kwana+ a eme mo Thabeng ya Siona,+ a na le ba le 144 000+ ba ba kwadilweng leina la gagwe le leina la ga Rraagwe+ mo diphatleng tsa bone.  Ke ne ka utlwa modumo o tswa kwa legodimong o utlwala jaaka mosumo wa metsi a mantsi e bile o utlwala jaaka tumo e kgolo ya maru; mme modumo o ke neng ka o utlwa e ne e kete wa baopedi ba letsa diharepa tsa bone.  Mme ba ne ba opela se e keteng pina e ntšha+ fa pele ga setulo sa bogosi le fa pele ga ditshedi tse nnê+ le bagolwane,+ mme go ne go se na ope yo o kgonang go ithuta pina eo kwantle ga ba ba 144 000,+ ba ba rekilweng mo lefatsheng.  Bano ga ba a ka ba dira boitsholo jo bo sa siamang jwa tlhakanelodikobo le basadi; tota e bile, ga ba ise ba ko ba tlhakanele dikobo le ope.*+ Ba nna ba sala Kwana morago gongwe le gongwe kwa a yang gone.+ Ba rekilwe+ mo bathong e le mabutswapele+ a Modimo le a Kwana,  mme ga ba a ka ba bua sepe se se tsietsang; ga ba na molato.+  Ke ne ka bona moengele yo mongwe a fofa kwa legodimong,* mme o ne a tshotse dikgang tse di molemo tsa bosakhutleng gore a di bolelele ba ba nnang mo lefatsheng, a di bolelele batho ba ditšhaba tsotlhe le ba ditso tsotlhe le ba dipuo* tsotlhe le ba merafe yotlhe.+  O ne a bua ka lentswe le le kwa godimo a re: “Boifang Modimo lo bo lo mo galaletse, ka gonne nako ya gagwe ya go atlhola e gorogile,+ ka jalo obamelang Ene yo o dirileng legodimo le lefatshe le lewatle+ le metswedi ya metsi.”  Moengele wa bobedi o ne a latela a bo a re: “O ole! Babelona yo Mogolo+ o ole!+ O ne a dira gore ditšhaba tsotlhe di nwe beine ya gagwe, e leng keletso* ya gagwe e kgolo ya go dira boitsholo jo bo sa siamang jwa tlhakanelodikobo!”*+  Mme moengele wa boraro o ne a ba sala morago, a bua ka lentswe le le kwa godimo a re: “Fa mongwe a obamela sebatana+ le setshwantsho sa sone e bile a itetla go tshwaiwa mo phatleng kgotsa mo seatleng,+ 10  le ene o tla nwa beine ya Modimo, e e emelang bogale jwa Gagwe. Eno ke beine e e bogale e Modimo a e tshelang mo senwelong sa bogale jwa Gagwe,+ mme o tla bogisiwa ka molelo le sulefera+ fa pele ga baengele ba ba boitshepo le Kwana. 11  Mme mosi o o tswang mo molelong o o bogisang ba ba obamelang sebatana le setshwantsho sa sone le ope fela yo o amogelang letshwao la leina la sone,+ o tla tswelela o tlhatloga ka bosakhutleng le go ya go ile,+ mme ga ba kitla ba ikhutsa bosigo le motshegare. 12  Ke gone ka moo, ba ba boitshepo ba ba bolokang ditaelo tsa Modimo le ba ba ngangatlelang tumelo mo go Jesu,+ ba tshwanetseng go itshoka.” 13  Mme ke ne ka utlwa lentswe le tswa kwa legodimong le re, “Kwala o re: Go itumela batho ba ba swang ba le seoposengwe le Morena+ go tloga mo nakong eno go ya pele. Moya o o boitshepo wa re, ee, a ba ikhutse mo ditirong tsa bone tsa bonatla, ka gonne dilo tse ba di dirileng ga di kitla di lebalwa.”* 14  Go tswa foo, ke ne ka bona leru le lesweu, mme mongwe yo o tshwanang le morwa motho+ o ne a ntse mo go lone, a rwele serwalo sa gauta mo tlhogong e bile a tshwere sekele e e bogale ka seatla. 15  Moengele yo mongwe o ne a tlhaga a tswa kwa lefelong le le boitshepo la tempele, a tlhaeletsa yo o ntseng mo lerung ka lentswe le le kwa godimo a re: “Tsenya sekele ya gago mme o robe, ka gonne nako ya go roba e gorogile le thobo ya lefatshe e budule.”+ 16  Foo yo o ntseng mo lerung o ne a tsenya sekele ya gagwe mo lefatsheng, mme lefatshe la rojwa. 17  Mme moengele yo mongwe gape o ne a tlhaga a tswa mo lefelong le le boitshepo la tempele le le kwa legodimong, mme le ene o ne a tshwere sekele e e bogale. 18  Moengele yo mongwe gape o ne a tlhaga a tswa mo sebesong mme o ne a na le taolo ya go laola molelo. O ne a tlhaeletsa yo o neng a tshotse sekele e e bogale ka lentswe le le kwa godimo a re: “Tsenya sekele ya gago e e bogale mme o phuthe morara* wa lefatshe, ka gonne morara oo jaanong o budule.”+ 19  Moengele o ne a tsenya sekele ya gagwe mo lefatsheng a bo a phutha morara wa lefatshe, mme o ne a o latlhela mo segatisetsong se segolo sa beine se se emelang bogale jwa Modimo.+ 20  Dipitse di ne tsa gata morara o o neng o le mo segatisetsong sa beine ka kwa ntle ga motse, mme madi a a neng a tswa mo go sone a ne a fitlha kwa ditomong tsa dipitse, mme a ne a le sekgala sa dikilometara di ka nna 296.*

Dintlha Tse di Kwa Tlase

Seger., “ke makgarebane.”
Kgotsa “kwa loaping.”
Seger., “diteme.”
Kgotsa “bogale.”
Ka Segerika, por·nei′a. Bona Ditlhaloso Tsa Mafoko.
Seger., “dilo tse ba di dirileng di tsamaya le bone.”
Kgotsa “diterebe; moretlwa.”
Seger., “ditadiamo di le 1 600. Setadiamo se lekana le 185 m. Bona Dintlha B14.