Kasin Ipilit Mo No Antoray Labay Mo?

WALAY duaran ugaw a manggagalaw. Siningkat na samay sakey so paborito ton gakgalaw manlapud samay kagalaw to, insan kinmelyaw, “Gawak iya!” Manlapud inkaugaw, say imperpekton too et wala lay inkasiblet to. (Gen. 8:21; Roma 3:23) Kaaruman ni, ilalagyat na sayan mundo so ugalin ‘siak-ni.’ Pian agnaalisan na ontan ya espiritu, nepeg tayoy mipuligesgesan ed makasarili iran tendensia. No agtayo itan gawaen, mainomay tayon nigapol so arum tan onkapuy so relasyon tayo’d si Jehova.​—Roma 7:21-23.

Papasesegen itayo nen apostol Pablo ya ikonsidera tayoy epekto ed arum na saray kiwas tayo, sanen insulat to: “Amin a bengatla niyabuloy, bangbalet aliwan amin et manepeg. Amin a bengatla niyabuloy; bangbalet ta aliwa ya amin da mamabiskeg.” Inyarum ni nen Pablo: “Agkayo mangiiter na sengeg na katiroran.” (1 Cor. 10:23, 32) Diad saray bengatlan manasaglawi ed no antoray personal a panlabayan tayo, makabat no tepetan tayoy inkasikatayo: ‘Mabulos ko kasin agla ipilit so kanepegan ko no napepeligro lay kareenan na kongregasyon? Akaparaan ak kasin ontumbok ed saray prinsipyo na Biblia, anggaman aliwan kombeniente ed siak so panggawa ed saratan?’

Diad Panagpili na Trabaho

Momoriaen na maslak a totoo a say panagpili na trabaho odino anapan et personal a desisyon  ya agtanto makaapekto odino agmakaapekto ni ingen ed arum. Balet konsideraen pa so eksperiensya na sakey a negosyante ed sakey a melag a baley diad Abalaten ya Amerika. Sikatoy bantog a sugarol tan buanges. Anggaman ontan, bilang resulta na panaaral toy Biblia ed saray Tasi nen Jehova, sikatoy inmaligwas ed espiritual tan inuman toy paraan na kabibilay to. (2 Cor. 7:1) Nen imbaga ton labay to lay manpulong a kaiba so kongregasyon, sikatoy mataktikan pinaseseg na sakey a matatken a nonoten ton maong so klase na anapan to. Sayan too et abayag lan manunan managsuplay na puro ya alak na unas​—sakey a produkton dakel so nayarin pakausaran to, balet diad lugar da et kaslakan lan lalaokan da iya na soft drink, tan inumen diad alenleneg a gagalan manbuek.

Atebek na sayan laki a no sikatoy magmaliw lan manangipalapag balet ta siansia nin manlalako na ontan a produkto, mangiter iya na kababaingan ed kongregasyon tan nayarin naderal so relasyon to ed Dios. Anggaman baleg so pamilyan lelegpeten to, intunda toy manlako na alak. Tan susuportaan to la natan so pamilya to diad panlalako na papel. Sayan laki, say asawa to, tan duara ed saray limaran anak da et bautismado la natan bilang Tasi nen Jehova. Maseseg iran makapanpupulong tekep na malinis a konsiensia.

Diad Panagpili na Kakaaro

Kasin say pililimog ed saramay agtayo kapananisiaan et personal a desisyon odino walaray nasasaglawin prinsipyo ed Biblia? Labay na sakey ya agin bii so onla ed party a kaibay sakey a kalangweran a laki ya aliwan agi. Anggaman pinasakbayan la ed saray peligro, liknaen ton sikato so walaay kanepegan a mandesisyon ed satan, kanian tinmuloy ni ed party. Ag-abayag kayari na insabi to, sikatoy inikdan na iinumen a walay laok ton druga a makapaugip. Kayari na pigaran oras, sikatoy abangon tan naamtaan ton sikatoy ni-rape na samay ipapasen ton kaaro.​—Ikompara so Genesis 34:2.

Say piuulop ed saray agkapananisiaan et agmet naynay a manreresulta’d ontan a trahedya, balet oniay ipapasakbay na Biblia: “Miulop ka ed saray makabat a totoo, et sika naani makabat; balet say kaiba na saray maatiw manlikna na segsegang.” (Uli. 13:20) Anggapoy duaruwa sirin a no pilien tayoy mauges a kaulop, niiyan itayo ed kapeligroan! “Say masimpit a too nanengneng to so mauges, tan iyamot to so inkasikato,” so ibabaga na Uliran 22:3, “balet say karaklan (odino andiay-eksperiensya) ontuloy, tan manlikna nipaakar ed sikato.” Saray piuulopan tayo et naapektoan da itayo tan say relasyon tayo ed Dios.​—1 Cor. 15:33; Sant. 4:4.

Diad Panangawes tan Panag-ayos

Mapmaples a manguuman iray uso. Balet, saray prinsipyo na Biblia nipaakar ed panangawes tan panag-ayos et agmanguuman. Pinaseseg nen Pablo iray bibii a “manpales ira na masimpit, a manparakep ira na mabinta tan madangka” ​—prinsipyon onaplika met ed saray lalaki. (1 Tim. 2:9) Agmangirerekomenda si Pablo na masyadon simpli a kawes, nisay ibabaga ton nepeg a parepareho na labay iray Kristiano. Anto sirin so kabaliksan na pagmaliw a masimpit? Impatalos na sakey a diksionaryo so inkasimpit bilang “aliwan malastog odino agmakasarili . . . duga ed panangawes, panagsalita, tan kakikiwas.”

Nepeg tayon tepetay inkasikatayo: ‘Nibagak kasin masimpit ak no ipipilit koy kanepegan kon manpili na kawes, anggano piimano ak laingen na arum? Kasin nakukuestion laingen so moralidad ko tan inkatook ed estilo na panagkawes ko?’ Napaliisan tayoy “mangiter na bengatlan kagapolan” nipaakar ed saya panamegley na “pangisentro na mata, aliwa labat a diad personal a pankaabigan na dilim a benga-bengatla, noagta diad pankaabigan met na arum.”​—2 Cor. 6:3; Fil. 2:4, NW.

Diad Saray Transaksion

Sanen linmesa ed kongregasyon na Corinto iray seryoson isyu nipaakar ed lingon pidedeneng odino panagpalikdo, oniay insulat nen Pablo: “Akin ta agyo nitepel ya unona so saol? Akin ta et agyo itepel ya unona so pakalames?” Sinimbawa nen Pablo iray Kristiano ya itepel da laray bengatla imbes ya ireklamo so sakey ya agi ed korte. (1 Cor. 6:1-7) Impapuso iya na sakey ya agin laki a taga Estados Unidos. Mandumaan so panmoria to tan samay Kristianon amo to nipaakar ed nepeg a sueldo to. Bilang panumbok ed Makasulatan iran totontonen, aminpiga iran nantongtong pian resolbien itan a problema, balet agda iya aresolbe. Kaunoran, impanon da iyan bengatla ‘ed kongregasyon,’ ya irerepresenta na saray Kristianon mamatatken.​—Mat. 18:15-17.

Makapaermen ta siansia nin ag-aresolbe so problema. Kayari na dakel a pikakasi, denesidi na sayan empleyado ya paulyanan la imay kuarta ya iisipen to a kanepegan ton sueldoen. Akin? Oniay imbaga to ed saginonor, “Sayan agpantatalosan et mangeekal la’d liket ko tan manguupot la’d mablin panaon a nayarin usaren komon ed espiritual a kimkimey.” Kayari na ontan a desisyon to, alikna na sayan agi ya ompapawil lay liket to, tan nalilikas ton bebendisyonan nen Jehova so panaglingkor to.

Anggan ed Angkekelag Iran Bengatla

Say agpangipilit ed no antoy labay tayo et mangiter met na bendisyon anggan ed angkekelag iran bengatla. Diad primeron agew na distriton kombension, asakbay a sinmabi so sanasawan payunir tan pinmuesto ira’d samay labalabay dan yurongan. Sanen onggapo lay programa, sakey a baleg a pamilya a walaan na dakel ya ananak so sinmabi tan manaapuran mananap na nayurongan ed napno lan istadyum. Nen naimano na sanasawan payunir a sayan pamilya et manaanap na magenap a nayurongan, impalugar day yurongan dan dua. Kanian akapan-aabay ed yurongan iyan sankapamilyaan. Pigaran agew kayari na kombension, akaawat iyan sanasawan payunir na sulat na pisasalamat manlapud saman a pamilya. Impaliwawa ra ed sulat ya adismaya ra sanen sinmabi iran atrasado. Balet ta satan a liknaan et asalatay liket tan pisasalamat makasengeg ed kamaongan na sanasawan payunir.

No walaray pankanawnawa, boluntaryo tayo komon ya isakripisyo so panlabayan tayo parad pakagunggonaan na arum. Diad pangipatnag tayoy aro ya “agto anapen so kien to,” makakatulong itayo ed pamasiansia na kareenan ed loob na kongregasyon tan ed kaparan totoo. (1 Cor. 13:5) Balet say sankaimportantian ed amin, napansiasiansia tayoy pikakaaro tayo ed si Jehova.

[Litrato ed pahina 20]

Mabulos mo kasin agla ipilit iray personal a panlabayan mo diad panagpili na kawes?

[Litrato ed pahina 20, 21]

Mabulos yo kasin ipalugar so yurongan yo ed saray agagi?