Linma Iray Nangraduar ed Gilead Bilang Maseseg ya Umaani!

“DAKEL a tua so aanien, daiset ira balet so manani. Pikasi yo sirin ed Katawan na aanien, pian mangibaki na saray manani ed aanien to.” (Mateo 9:37, 38) Saratan a salita so walaan na nikaduman kabaliksan ed saray nangraduar ya estudyante na koma-116 a klase ed Watchtower Bible School of Gilead legan na pampaparaan dan onla ed saray asainmin da bilang misionaryo.

Nen Sabado, Marso 13, 2004, walay dagup a 6,684 a totoon nantitipon diad Watchtower Educational Center ed Patterson, New York, tan diad saray lugar ya impalabas so programa pian naimatonan so pangraduar da, a kaleganan na satan et akaawat na bilin a panamatanir tan panamaseseg so interon klase. Amin tayo so nagunggonaan ed niiter a simbawa, legan a maseseg itayon mankikimey diad espiritual a panag-ani.

Say manangilukas a paliwawa nen Theodore Jaracz, sakey a membro na Mananguley ya Ulop tan kabiangan ed komapiton klase a nangraduar ed Gilead, so angipabitar ed saray salita nen Jesus ya: “Onla kayo . . . tan manggawa kayo na saray babangatan ed amin a nasyones.” (Mateo 28:19, 20) Agaylan matukoy itan, lapud saray nangraduar so nibakin manlingkor diad 20 a nanduruman bansa! Pinanonotan to iray estudyante a say instruksion a nanlapud Salitay Dios et sigpot ya anginlong ed sikara bilang maseseg a komikimey diad sankaimportantian ya espiritual a panag-ani.​—Mateo 5:16.

No Panon so Pagmaliw a Maaligwas ya Umaani

Say inmunan espiker diad programa et si Robert Wallen, a maapit a mitutulongan ed Gilead School ed loob na dakel lan taon. Diad impangipaliwawa to ed teman “Say Karakpan na Panangabagey,” oniay inkuan to ed saray estudyante: “Say panangabagey et lenguahe a narengel na anggan saray telek tan nanengneng na anggan saray bulag.” Kabat a tuloy nen Jesus so kagogonigon na arum tan nanggunaetan ton pakepaen itan. (Mateo 9:36) Dakel so pankanawnawa na saray nangraduar pian nipatnag da met itan​—diad kimey a panagpulong, diad kongregasyon, diad ayaman na misionaryo, tan diad mismon asawa ra. Oniay impaseseg ed sikara na espiker: “Komon ta say karakpan na panangabagey so napatnagan ed bilay yo legan yon manlilingkor ed arum. Say sankaabigan ya awawey yo lambengat et magenap la parad inagew-agew a pambilay yo diad ayaman na saray misionaryo. Kanian, determinado kayo komon a kawesan so inkasikayo na panangabagey.”​—Colosas 3:12.

Insan si Gerrit Lösch, sakey a membro na Mananguley ya Ulop tan kabiangan ed koma-41 a klase a nangraduar ed Gilead, so anibukel ed teman “Saray Manangiyabawag na Kilalaban.” (Isaias 52:7) Pian niliktar so totoo sano naderal so peles a sistema na bengabengatla, nepeg a sikaray nawalaan na suston pikakabat manlapud Salitay Dios, mangiyabawag ed pananisia ra diad publiko, tan manpabautismo. (Roma 10:10; 2 Timoteo 3:15; 1 Pedro 3:21) Balet, say manunan rason ed pangiyabawag na kilalaban et, aliwan say  pangisalba ed totoo, noagta say pangitarok na dayew ed Dios. Kanian, oniay imbilin nen Brother Lösch ed saray prospektibon misionaryo: “Ipasabi yo so mensahe na Panarian angga ed sankasampotan iran parte na dalin, tan magmaliw kayon maseseg a manangiyabawag na kilalaban, parad kirayewan nen Jehova.”​—Roma 10:18.

Say tepet a “Panon Yon Isisindag so Espiritual a Liwawa?” so inyarap na instruktor ed Gilead a si Lawrence Bowen. Tinukoy to iray salita nen Jesus a nikurit diad Mateo 6:22 tan pinaseseg to iray nangraduar ya estudyante a pansiansiaen dan “maralus” odino simpli so mata ra ta pian “nisindag da so espiritual a liwawa a mangigloria ed si Jehova tan mangunggona ed kapara ran totoo.” Diad kagapo na ministeryo to, inletneg nen Jesus so ayadyarin ehemplo nipaakar ed saya diad impangiteen to lawas na imano to ed panggaway linawa na Dios. Say impandalepdep nen Jesus ed alay abig iran bengatla ya imbangat ed sikato nen Ama to diad tawen so tinmulong ed sikato pian nasungdoan iray subok nen Satanas diad kalawakan. (Mateo 3:16; 4:1-11) Impatnag nen Jesus so sigpot a panagmatalek ed si Jehova diad impanumpal to ed kimey ya impagawa na Dios ed sikato. Ontan met, ta pian nasungdoan da iray subok ed arapen, nepeg ya itultuloy na saray misionaryo so maabig ya ugalin panagaral ed Biblia tan sigpot a manmatalek ed si Jehova.

Sarayan nantutumbokan a paliwawa so sinampotan nen Mark Noumair, sakey ya instruktor ed Gilead tan kabiangan ed koma-77 klase a nangraduar  ed Gilead, diad impangipaliwawa to ed teman “Wala Kami ed Limam.” (Josue 9:25) Pinaseseg to iray estudyante ya aligen so awawey na saray kadaanan a Gibeonita. Anggaman say Gibeon et ‘baleg a syudad tan makapanyari so amin a lalaki ditan,’ saray Gibeonita so agkinmerew na panamidbir odino nanilalon nawalaan na saray bengatla unong ed panlabayan da. (Josue 10:2) Sikaray mabulos ya akitulongan ed saray Levita bilang “bomebelang na kiew tan umaasol na danum” pian suportaan so panagdayew ed si Jehova. (Josue 9:27) Singano oniay ibabaga met na saray estudyanten nangraduar ed Babaleg a Josue, si Jesu-Kristo, “Wala kami ed limam.” Natan ta awaten da lay asainmin da ed arum a bansa, kaukolan dan awaten so antokaman a kimey a pagagawa ed sikara na Babaleg a Josue.

Saray Eksperiensya tan Interbio

Say teman “Sigpot Yon Lukasan so Kasulatan” so siningbat nen Wallace Liverance, a kabiangan na koma-61 klase a nangraduar ed Gilead tan sakey ed saray instruktor, kaiba so sakey a grupo na saray estudyante. Insalaysay tan inyakto da iray eksperiensyan nanggayagaan da diad lawak na kimeyan legan iran manaaral diad eskuelaan. Mapatnag a say maseet ya impanaral da ed Kasulatan diad apalabas a limay bulan a panangipasal so anabi ed puso ra tan amakiwas ed sikaran inabang ed arum so naaralan da. (Lucas 24:32) Legan na limay-bulan a kurso, innabang na sakey ya estudyante ed yugtan ton laki iray naaaralan to. Saya so amaseseg ed agi to ya anapen so kongregasyon ed lugar da tan ginmapon nanaral ed Biblia. Sikatoy kinmualipika la bilang agbautismadon manangipalapag.

Kayari na sarayan eksperiensya, indaulo nen Richard Ashe tan si John Gibbard so impanginterbio ed pigaran abayag lan matoor a lingkor nen Jehova, a kabiangan met iray ombiabiahen manangasikaso, a makakaawat na espisyal a panangipasal diad Watchtower Educational Center. Kabiangan ira ed saray inmuunan klase a nangraduar ed Gilead School. Anonotan na sakey ya oniay inkuan nen Brother Knorr legan na klase ra: “Dakdakel so aralen yo diad Gilead. Balet no magmaliw kayon malastog, onsaew itayo. Kaliktan min nawalaan kayo na mabunlok a puso.” Binilin na saray ombiabiahen agagi iray peles ya estudyante a magmaliw iran maimano ed totoo tan ed saray pankaukolan da, mideneng ed arum a singa ed impideneng nen Kristo, tan mapaabeban mangawat ed antokaman a niiter ed sikaran asainmin. Say pangiyaplika ed sayan simbawa et seguradon makatulong ed saray balon misionaryo a magmaliw a mabunga diad saray asainmin da.

Onla Kayo Bilang Maseseg ya Umaani!

Awalaan na pankanawnawa iray inmatendi ya ondengel ed paliwawa nen Stephen Lett, sananey nin membro na Mananguley ya Ulop. Impresenta to so pinagkateman paliwawa ed programa, ya apauloan na “Onla Kayo Bilang Maseseg ya Umaani!” (Mateo 9:38) Diad literal a panag-ani et antiktikey la so panaon parad panani ed aanien. Saray umaani so nakaukolan a mankimey ya impasya. Agaylan mas importante itan legan na kasampotan na sayan sistema na bengabengatla! Diad baleg ya espiritual a panag-ani, dakel a bilay so napepeligro. (Mateo 13:39) Pinaseseg nen Brother Lett iray nangraduar ya, ag-ira ‘manngiras ed kimey da,’ noagta magmaliw iran “marlang ed espiritu” tan “panlingkoran [da] so Katawan” diad sayan agla naulit a kimey a panag-ani. (Roma 12:11) Inaon na espiker iray salita nen Jesus: “Itangwa yo’ray mata yo, tan nengneng yo so kaumaan, ya amputi la ran maparaan ed panag-ani.” (Juan 4:35) Insan to pinaseseg iray nangraduar ya ipatnag day seseg da ed kimey a panag-ani diad masimoon a pansagpot da pian sabien iray totoo kapiganman tan inerman so kawalaan da tan diad panganamot da ed amin a pankanawnawa pian mantasin impormal. Say inka-alerton mamalesa na saray pankanawnawa so mamainomay ed panggawa na epektibon panagtasi. Si Jehova so maseseg a Dios, tan iilaloan to ya amin tayo so mangalig ed sikato tan mankimey ya impasya diad espiritual a panag-ani.​—2 Arari 19:31; Juan 5:17.

Diad sampot na programa, innabang na tsirman, a si Brother Jaracz, iray pabano a nanlalapud dakel a sangan opisina tan inyawat to ed saray estudyante iray diploma ra. Imbasa na sakey ed saray nangraduar so sulat a nanlapud klase, a mangibabalikas na aralem ya apresasyon da ed naawat dan panangipasal. Mapatnag a say programa ed impangraduar na koma-116 a klase so lalon amaseseg ed amin ya inmatendi ya onla bilang maseseg ya umaani.

[Kahon ed pahina 25]

SARAY ESTADISTIKA NA KLASE

Bilang na saray nirepresentan bansa: 6

Bilang na saray bansan angiyasainan: 20

Bilang na saray estudyante: 46

Promedyon edad: 34.2

Promedyon taon ed katuaan: 17.2

Promedyon taon ed sigpot-panaon a ministeryo: 13.9

[Litrato ed pahina 26]

Koma-116 a Klase a Nangraduar ed Watchtower Bible School of Gilead

Diad listaan ed leksab, saray dasig so anumeroan manlapud arap a pabeneg, tan saray ngaran so akalista manlapud kawigi a manpakawanan ed kada dasig.

(1) Ceansu, R.; Sparks, T.; Piña, C.; Turner, P.; Cheney, L. (2) Suardy, M.; Sjöqvist, Å.; Amadori, L.; Smith, N.; Jordan, A.; Boissonneault, L. (3) Matlock, J.; Ruiz, C.; Dular, L.; Vigneron, M.; Henry, K. (4) Sjöqvist, H.; Laux, J.; Ruzzo, J.; Gustafsson, K.; Boissonneault, R.; Jordan, M. (5) Henry, D.; Turner, D.; Kirwin, S.; Florit, K.; Ceansu, S. (6) Amadori, S.; Cheney, J.; Ross, R.; Nelson, J.; Ruiz, J.; Vigneron, M. (7) Florit, J.; Matlock, D.; Ross, B.; Laux, C.; Ruzzo, T.; Dular, D.; Kirwin, N. (8) Gustafsson, A.; Nelson, D.; Suardy, W.; Piña, M.; Smith, C.; Sparks, T.