“Singger Kayo ed Dios, et Sikato so Onsingger Naani ed Sikayo”

Antis tan Kayari​—Aromog To so Akapanguman ed Sikato

SI Sandra, a taga-Mexico, so aneskribe ed inkasikato bilang rebelde ed pamilya to. Aderal so bilay to bilang tin-edyer lapud sikatoy impulisay tan agto alikna so panangaro. Oniay inkuanto: “Dinmalan ak ed inkatayatdang tekep na permanentin inkabegtebegtew tan pirmin panduaruwa nipaakar ed kiwawalak tan ed bilay.”

Sanen wala ni’d haiskul, ginapoan la nen Sandra ya inumen so alak nen Tatay to a walad abung da. Asabi panaon et sikato lan mismo so mansasaliw na inumen to tan nagmaliw ya alkoholiko. “Anggapo lay ganas kon manbilay,” so inaksobi to. Lapud inkadesperado, si Sandra so ginmapon nandruga. Oniay inkuanto: “Say makakatulong labat ed siak pian nalingwanan ko iray problemak et say naynay ya akakarga ed melag a bag ko: sakey a bote, pigaran pilduras, odino daiset a marijuana.”

Kayari nen Sandra a nanaral na medisina, sikatoy pirmin nigalet ed alkoholismo. Sinali toy manbikkel. Balet ta abilay ni.

Ag-akaromog si Sandra na espiritual tan emosyonal a suporta manlapud dakel tan nanduruman relihyon. Lapud naandian la na ilalo, sikatoy mabetbet ya oneey-ey ed Dios: “Iner so kawalaan mo? Akin ya agmo ak tulongan?” Sinmabi la ed kapanpantokan so inkaandi na dilin-respeto to anggad sikatoy akatongtong na sakey ed saray Tasi nen Jehova. Nansumpal iya ed personal a panagaral ed Biblia. Apakiwas a tuloy si Sandra sanen naaralan ton ‘si Jehova so asingger ed saramay nabtagan na puso.’​—Salmo 34:18.

Say angiyaral na Biblia ed si Sandra so tinmulong ed sikaton natalosan a kabat nen Jehova a Dios a walaray kakapuyan tayo lapud atawir tayon kasalanan tan ag-inkayadyari ed si Adan. Amoria nen Sandra a natatalosan na Dios ya agtayo sigpot a nakapet iray matunong ya estandarte. (Salmo 51:5; Roma 3:23; 5:12, 18) Sikatoy maliket sanen naaralan ton ag-iteteen nen Jehova so imano to ed saray kakapuyan tayo, tan agto iilaloan ed sikatayon gawaen so agtayo nayarian. Oniay intepet na salmista: “No sika, Jehova, et uninengen mo so saray kasulitan, O Katawan, siopa kasi naani makaalagey?”​—Salmo 130:3.

Say importantin katuaan ed Biblia ya amaliket ed puso nen Sandra et say dondon bagat nen Jesu-Kristo. Diad panamegley na satan et mapangasin ipapagamor nen Jehova so maptek a talindeg ed saray matulok a totoo anggaman ag-ira ayadyari. (1 Juan 2:2; 4:9, 10) On, nagamoran tayo so “pakapaandian na saray kasalanan tayo” pian diad ontan et natalonaan tayo so antokaman a liknaan ya ag-inkamakana.​—Efeso 1:7.

Akaaral si Sandra na makana iran leksion ed alimbawa nen apostol Pablo. Pinablin tuloy nen Pablo so kaabigan na Dios diad mapangasin impamerdona ed apalabas iran lingo to tan diad impanulong na Dios ed sikato diad pibabakal to pian natalonaan iray tubat-tubat a kakapuyan to. (Roma 7:15-25; 1 Corinto 15:9, 10) Inuman nen Pablo so kurang na bilay to, a ‘nilewet to so laman to tan nampaaripen’ ta pian agnisuawi ed basbas ya inabobonan na Dios. (1 Corinto 9:27) Agto inabuloyan so inkasikaton magmaliw ya aripen na makasalanan a tendensia to.

 Saray kakapuyan nen Sandra so manasalot ed sikato, balet sikatoy nantultuloy ya akipuligesgesan ed saratan. Sikatoy masimoon a nampikasi ed si Jehova parad tulong pian natalonaan to iratan tan kinmerew na panangasi to. (Salmo 55:22; Santiago 4:8) Lapud nalilikna to so personal ya interes na Dios ed sikato, ayarian nen Sandra ya umanen so kabibilay to. “Siak so maliket ed sigpot-panaon a pangibabangat ko na Biblia ed arum,” so inkuan to. Tutulongan natan nen Sandra so atsi to tan yugtan ton bii a nakabat si Jehova. Sikato met so ‘manggagawa na maabig,’ diad pamboboluntaryo to, lapud medikal a dunong to, diad saray kombension na saray Tasi nen Jehova.​—Galacia 6:10.

Komustay nipaakar ed inkaadik nen Sandra? Oniay matalek ton inkuan: “Malinis so nonot ko. Agak la oniinum, mansisigarilyo, odino mandrudruga. Agko la kaukolan iratan. Aromog ko la so aanapen ko.”

[Blurb ed pahina 9]

“Aromog ko la so aanapen ko”

[Kahon ed pahina 9]

Makatulong Iran Prinsipyo na Biblia

Niraya so pigaran prinsipyo na Biblia ya akatulong ed dakel pian makalukpos ed marutak iran bisyo:

“Linisan tayo komon so inkasikatayon dili ed ami tilol na laman tan espiritu, a yadyarien itayo na kasantosan dia ed takot ed Dios.” (2 Corinto 7:1) Bebendisyonan na Dios iramay nilinisan da lay inkasikara manlapud karutakan, a papaliisan da so agmalinis ya agagamil.

“Say takot ed Jehova sikato so panggula ed mauges.” (Uliran 8:13) Say mapagalang a takot ed Dios so ontulong ed sakey a too pian makalukpos ed mauges a bisyo, pati say panag-abuso ed druga. Nilikud ed pamapaliket to ed si Jehova, say anguman a too so nasasalimbengan manlapud makapataktakot iran sakit.

‘Pauleyan tan ontulok kayo komon ed saray manuley tan walaay pakauley.’ (Tito 3:1) Diad dakel a pasen, say pangayarian odino pangusar na saray druga so isusumlang ed ley. Saray tuan Kristiano so agmangakayarian odino manguusar na saray ilegal a druga.