Kaukolan Mo ni Kasin Usisaen so Arum a Relihyon?

NATENDIAN koray Kristianon miting ed ngalngali sakey taon, tan nanggayagaan koy impangibalita na Panarian na Dios ed arum,” so inkuan nen Miguel, a sakey la natan ed saray Tastasi nen Jehova diad Abalaten ya Amerika. “Insan ginapoan koy ondengel na saray relihyoson programa ed radyo tan nambantay na relihyoso iran managkalar diad telebisyon. Abaloan kon makatulong ed siak iratan a programa pian lalon natalosan iray totoon duma iray relihyon da. Amtak a saray bangat da et agmitunosan ed Biblia, balet ta labay kon usisaen.”

Si Jorge, a taga’d saman lanlamang a bansa, so maseseg a mangibabangat ed arum nipaakar ed tuan panagdayew. Ingen, aminsan et ginapoan to met so ondengel na saray relihyoson programa ed radyo tan telebisyon. “Kaukolan mon amtaen so kaisipan na arum,” so naynay ton ibaga. Sano natepetan nipaakar ed posibli iran kapeligroan na saratan a pandedengel ed palso iran bangat, oniay iyebat to: “Anggapoy makaderal ed pananisia na sakey a kabat to lay katuaan na Biblia.” Sarayan eksperiensia so mamalesa na importantin tepet, Kasin makabat so pandengel nipaakar ed sisiaen na arum?

Pakabidbiran ed Tuan Inkakristiano

Kayari impatey na saray apostol, say tuan panagdayew so alaokan na tuloytuloy ya inkatibukel na dakel a nengneng na alig-alig ya Inkakristiano. Lapud pakaamta lan unona ed saya, imparungtal nen Jesus so sakey a dalan pian nibiig irayan palson nengneng na Inkakristiano manlapud tuan Inkakristiano. Unona, impasakbay to: “Manalwar kayo ed saray aliwan tuan propetas, ya onla’rad sikayo a sikakawes na kawes na karnero, balet dia ed loob da sikaray lobon mangasiba.” Insan inyarum to: “Napatnagan yo ra lapud saray bunga ra.” (Mateo 7:15-23) Aagamilen na tuan papatumbok nen Jesus so imbangat to, tan mainomay iran nabidbiran diad panamegley na  maabig iran bunga ra. Singa ginawa a mismo nen Jesus, bibisitaen daray totoo pian ipaliwawa so Panarian na Dios manlapud Kasulatan. Diad pangaalig ed ehemplo nen Jesus, sikaray ontatalindeg a biig manlapud saray politika na mundo tan saray isyu ed sosyedad. Panisiaan da so Biblia bilang Salita na Dios tan rerespetoen da itan bilang katuaan. Ipapaamta ra so ngaran na Dios. Tan lapud pambabanikelan dan agamilen so aro ya ibabangat na Dios, ag-ira mibibiang ed saray bakal. Imbes, tratratoen day sakey tan sakey bilang agagi.​—Lucas 4:43; 10:1-9; Juan 13:34, 35; 17:16, 17, 26.

Unong ed Kasulatan, posiblin ‘nibiig so matunong tan marelmeng, say manlilingkor ed Dios tan say agmanlilingkor ed sikato.’ (Malaquias 3:18) Saray tuan managdayew natan so nankakasakey ed kanonotan tan gawa, a singa met ed inmunan-siglo iran Kristiano. (Efeso 4:4-6) Bektan abidbiran yo lay ontan ya ulop na puron Kristianos, akin a kaukolan yo nin amtaen odino usisaen iray sisiaen na arum?

Manalwar ed Palso Iran Managbangat

Bibidbiren na Biblia a kayari ingen ya impakaaral ed katuaan na Biblia, wala so kapeligroan na pakarutakan ed espiritual manlapud palso iran bangat. Impasakbay nen apostol Pablo: “Manasikaso kayo ta ompan wala so manggawa na deral ed sikayo lapu ed pilosopiya to tan andi kakanaan a panamalingo, unong na daan ya ugali na totoo, unong ed saray dinaralin a bangat na mundo, tan aliwan unong ed Kristo.” (Colosas 2:8) Agaylan malinew so impangilitrato na sayan teksto! Singa saray maatap ya ayayep a malabay a manibar tan mangakmon ed sikayo, saray palson managbangat so makapangipaarap na peteg a kapeligroan.

Tua, inimano nen Pablo so sinisia na arum. Aminsan et inggapo toy diskurso diad impangikuan to: “Lalakin taga Atenas, dia ed amin a bengatla, nanengneng ko a mapagalang kayon tuloy ed pidiosan. Ta diad inlabas ko tan innengneng ko ed saray pikakasian yo, aromog ko so sakey ya altar met a kawalaan na sayan sulat: Dia ed Sakey a Dios ya Ag-amta.” (Gawa 17:22, 23) Balet, aglawas a pinano nen Pablo so kaisipan to na saray pilosopiya na saray Griegon managtalumpati.

Walay pidumaan na pakaantam na daiset ed saray gapoan tan sisiaen na saray palson relihyon ed say kisentro la na kanonotan mo ed saratan. * Tinuro nen Jehova so “matoor tan makabat ya aripen” pian mangitarya na bangat a nibase ed Salita to. (Mateo 4:4; 24:45) Insulat a mismo nen Pablo: “Agyo nayari minabang ed dulang na Katawan, tan say dulang na saray demonyos. [Odino] naragdag tayo kasi Katawan a mangimon?”​—1 Corinto 10:20-22.

Arum a palson managbangat so nayarin datin tuan Kristianos, balet ta sikaray binmeneg manlapud katuaan tan dinmapag ira ed palso. (Judas 4, 11) Agtayo la pankelawan iya. Kayarin tinukoy so “matoor tan makabat ya aripen” a mangilalaman ed ulop na alanaan a Kristianos, sinalita nen Jesus so “mauges ya aripen,” sakey a klase a mangirereklamoy, “say katawan ko manbayag,” tan ginmapon mamekpek ed saray kapara ton aripen. (Mateo 24:48, 49) Mabetbet, sarayan indibidual tan saray patumbok da so andian na malinew iran bangat; sikaray interesado labat ed paneral ed pananisia na arum. Nipaakar ed sikara, onia so insulat nen apostol Juan: “No wala so onsabi ed sikayo, et agto tarok so sayan bangat, agyo aakoen ed abung yo tan agyo itday pabano.”​—2 Juan 10; 2 Corinto 11:3, 4, 13-15.

Maabig no konsideraen a maong na saray masimoon a totoo a manaanap na katuaan so narerengel da manlapud nanduruman relihyon. Nasabi panaon, bendisionan na Dios iray matuan-impanpuso a manaanap na katuaan. Onia so ibabaga na Biblia nipaakar ed maridios a kakabatan: “No sikato so anapen mo a singa pilak, tan sikato so usisaen mo a singa saray inyamot a kayamanan . . . naromog mo so pikakabat ed Dios.” (Uliran 2:4, 5) Diad impakaromog ed sayan pikakabat na Dios panamegley na Biblia tan say Kristianon kongregasyon tan diad pakakaimano no panon a bebendisionan nen Jehova iraman so iwawanwan na satan a pikakabat, saray tuan Kristiano so agla ondedengel ed palso iran relihyoson bangat.​—2 Timoteo 3:14.

[Paimano ed Leksab]