“SAY talagan agko nalinglingwanan, amay kaabigan ya impanengneng ed siak na saray Tasi,” so kuan nen Lisa. * Atan kuno so rason no akin ya nagmaliw ya interesado ya manaral na Biblia. Ontan met so naeksperiensya nen Anne. Oniay imbaga to: “Sineryosok so panaaral koy Biblia ed saray Tasi, aliwa labat ya lapud saray ibabangat da, noagta lapud anengneng ko ya maomaong ira.” Siempre natan, labalabay la na sarayan sister so manaral na Biblia tan mandalepdep, pero baleg so epekto na kaabigan ya impanengneng ed sikara na saray Tasi.

Panon tayon naipanengneng so kaabigan diad paraan ya napakiwas met so arum? Walay duaran paraan. Nagawaan tayo itan diad saray ibabaga tan gagawaen tayo. Amtaen tayo met no siopa ray panengnengan tayo na kaabigan.

Diad Proverbio kapitulo 31, say maong ya nanay tan asawan bii et adeskribin “walad dila to so ganggan na kaabigan.” (Pro. 31:26) Kada no mansalita, sankanonot to itan ya “ganggan.” Aalwaran toy panagsalita to, tan pipilien ton maong no anto ray salitan ibaga to. Nepeg met ya tandaan na saray tatay iyan “ganggan.” No saray atateng et mapaspasnok tan ansakit so panagsalita ra, onarawi so liknaan na ananak da, tan ompan agda ra italtalek. Kanian no labay na atateng ya respetoen tan unoren ira na saray ananak da, dapat maabig so paraan na pitongtong da.

Antoy gawaen mo pian naaralan moy mansalita na maabig, balanglan pamilyado ka la o andi ni? Say ebat et nabasa lanlamang diad gapo na Proverbio 31:26: “Say sangi to et mansasalita na karunongan.” Nibagan say sangi tayo et “mansasalita na karunongan” no pilien tayo iray salitan usaren tayo tan apipigeren tayo pati tono na boses tayo. Antis tayon mansalita, tepetan tayo ni sarili tayo, ‘Kasin diad sayay ibagak et onkalma so katongtong ko, odino onsyodot laingen?’ (Pro. 15:1) On, mas marakep no mannonot tayo nin maong antis tayon mansalita.

Onia met so nabasa ed Proverbio 12:18: “Say salitan agla ninonot et singa saray saksak na espada.” No nonoten tayoy epekto na panagsalita tayo, mas mainomay tayon kontrolen so dila tayo, tan naiwasan tayoy mansalita na ansakit o makapainsulto. (Efe. 4:31, 32) No sankanonot tayo so liknaan na arum, makapaseseg tan maaro so pitongtong tayod sikara. Balibalin aligen imay ginawa nen Jehova nen natatakot so lingkor ton si Elias. Samay anghel ya imbaki nen Jehova et nansalita diad “kalmado tan makalnan boses” pian ombiskeg so liknaan nen Elias. (1 Ara. 19:12) Pero siempre, nipanengneng tayoy kaabigan aliwa labat ya diad panagsalita tayo, noagta pati diad saray gagawaen tayo.

Naalig tayoy Jehova no maabig so panagsalita tayo tan pati ugali tayo. (Efe. 4:32; 5:1, 2) Si Lisa ya abitla ed gapo et oniay inistorya to ya ginawa na saray Tasi ya agto nalinglingwanan:  “Nen biglaan kamin pinaekal ed panaayaman mi tan kaukolan mi onalis na abung, walay duaran sanasawa ed kongregasyon ya nan-day off pian natulongan day pamilya mi ya man-impake. Aga ak ni Bible study ed saman ah!” Lapud kaabigan na saraman ya agagi, apakiwas si Lisa ya manpa-Bible study.

Si Anne ya abitla ed gapo et agto met nalingwanan so kaabigan ya impanengneng ed sikato na saray Tasi. Oniay imbaga to: “Dakel so kabat ko ya aliwliway ugali ra, kanian aga ak basta-basta mantitiwala ed arum. Nen akabat ko ray Tasi, mandududa ak akin et mabaibait ira. Say kuan kod sarilik, ‘Akin kasi et interesado iran maong ed siak?’ Pero alikas ko ya aliwan pakitang-tao labat so kaabigan to imay mangiyaaral ed siak. Kanian sineryosok so pamba-Bible study’k.”

Nen anengneng ya mismo nen Lisa tan Anne so kaabigan tan panangaro na agagi ed kongregasyon, diman ira nagmaliw ya interesado ed katuaan. Inmapit ira ed si Jehova tan nagmaliw ya palagay so loob da ed saray Tasi lapud kaabigan ya impanengneng na kongregasyon.

Say arum et malumanay ya mansalita, maimis, tan marespeto ira ta atan so kultura da odino ontan ya talagay inkatoo ra. Pero no atan labat so rason no akin ya maabig so ugali tayo, ompan agtayo naipanengneng so kaabigan na Dios.—Ikompara so Gawa 28:2.

Naalig tayoy kaabigan na Dios no walad sikatayo so masanton espiritu to. (Gal. 5:22, 23) Kanian dapat manpaigiya tayo ed espiritu na Dios diad saray iisipen tan gagawaen tayo. Aaligen tayoy Jehova tan Jesus no ontan so gawaen tayo. Tan gagawaen tayo itan ta sankanonot tayoy pankaabigan na arum. Kanian say rason no akin ya manggagawa tayoy kaabigan et lapud inaro tayoy Jehova’n Dios tan say kapara tayon too. No ontan ya klase na kaabigan so ipanengneng tayo, napaliket tayo so Dios tan maabig so epekto tod arum.

Natural labat ya maabig so pantrato tayo ed saramay mabait ed sikatayo odino ed saramay kabat tayo la. (2 Sam. 2:6) Misatsalamat tayon maong no walay mangipanengneng na kaabigan ed sikatayo. (Col. 3:15) Pero panon to no aliwliway ugali na sakey ya too? Kasin agtayo la panengnengan na kaabigan?

Makaaral tayo ed si Aman Jehova. Diad Biblia, dakel so naaralan tayo tungkol ed kaabigan to. Diad Kristianon Griegon Kasulatan, aminpigapigan inusar so termino ya “agnaparaan a kaabigan” pian idanet so kaabigan ya ipapanengneng na Dios anggano ag-itan kanepegan na totoo. Panon itan ya ipapanengneng na Dios?

Iiter nen Jehova so amin ya nakaukolan na minilyon ya totoo pian mansiansia ran mabilay. (Mat. 5:45) Diad tua, anggan nen agtayo ni manlilingkor ed si Jehova, impanengneng to lay kaabigan ed sikatayo. (Efe. 2:4, 5, 8) Singa bilang, inter toy alenleneg tan inar-aro ton Anak parad amin ya totoo. Insulat nen apostol Pablo ya inter nen Aman Jehova so dondon ta “daakan [so] agnaparaan a kaabigan na Dios.” (Efe. 1:7) Sakey ni, anggano makakagawa tayoy kasalanan tan napapaermen tayoy Jehova, sikatoy ag-onsasawa ya mangigiya tan mangibangat ed sikatayo. Saray bilin tan salita to et makaparepresko ya “singa makalnan uran.” (Deu. 32:2) On, diad karakel na kaabigan ya ipapanengneng nen Jehova ed sikatayo, agtayo iratan nabales ya amin. Tan diad tua, say bilay tayo ed arapen et akadepende nin siansia ed kaabigan nen Jehova.—Ikompara so 1 Pedro 1:13.

On, no isipen tayoy kaabigan nen Jehova, sikatoy lalo tayon naaro tan napakiwas tayo ya ipanengneng met so kaabigan ed arum. Kanian imbes ya pilien tayo labat no siopa ray panengnengan tayoy kaabigan, aligen tayoy Jehova. Diad inagew-agew, manisip tayoy paraan no panon tayon natulongan tan napaseseg so arum. (1 Tes. 5:15) Say kaabigan et singa ampetapetang ya apoy diad panaoy ambetel. Kanian no ipanengneng tayo itan ed saray kapamilya, kaagian, katrabaho, kaklase, tan kakaabay tayo—naligliwa tan nainawaan ira.

Wala tay naisip mo ya kapamilyam o kakongregasyon mo ya mankaukolay tulong tan panamaseseg? Marakep no manisip kay paraan no panon mon naipanengneng so kaabigan ed sikara. Singa bilang, ompan walay kakongregasyon mo ya kaukolan toy tulong diad pititindaan, o diad panlinis ed abung tan sular da? Tan panon to no walay napulongan mo ya kaukolan to manayay tulong? Kasin ipanengneng moy kaabigan tan mangiter kay praktikal ya tulong?

Komon ta aligen tayoy Jehova, tan lanang tayon ipanengneng diad salita tan diad gawa ya uunoren tayo so “ganggan na kaabigan.”