Juan 9:1-41
9 Natan sanen sikatoy ondadalan, anengneng toy sakey a toon bulag manlapu la ed inkianak to.
2 Et sikatoy tinepetan na saray disipulo to: “Rabbi, siopay nankasalanan, sayan too odino saray ateng to, kanian sikatoy nianak a bulag?”
3 Inmebat si Jesus: “Aliwan sayan too odino saray ateng to so nankasalanan, balet oniay kipapasen to pian nipatnag iray gawa na Dios.
4 Nepeg tayon gawaen iray kimey na samay angibaki ed siak legan ya agew ni; onsabi so labi sano anggapo lay toon makapankimey.
5 Legan a wadia ak ed mundo, siak so liwawa ed mundo.”
6 Kayari ton imbaga iraya, sikatoy linmutda ed dalin tan diad panamegley na ilol et sikatoy nanggawa na pitek, tan inyan to itan ed saray mata na samay too
7 tan inkuan to ed sikato: “La ka tan mandilamos ka diad panagtiponan na danum na Siloam” (ya impatalos a ‘Nibaki’). Kanian sikatoy linma tan nandilamos, tan pinmawil a makanengneng la.
8 Diad saman et inkuan na saray kakaabay tan saramay datin makakanengneng a sikatoy sakey a mipapayabol: “Agta saya imay toon datin akayurong tan mipapayabol?”
9 Walaray mangibabaga: “Saya iman.” Say kuan na arum: “Andi, kaparpara to labat.” Et inkuan na samay too: “Siak iman.”
10 Kanian inkuan da ed sikato: “Panon sirin ya alukasan iray matam?”
11 Sikatoy inmebat: “Samay toon tatawagen a Jesus et nanggaway pitek tan impurapor to ed saray matak tan imbaga to ed siak, ‘La ka ed Siloam tan mandilamos ka.’ Kanian linma ak a nandilamos tan akanengneng ak la.”
12 Diad saya et inkuan da ed sikato: “Kawalaan na saman a too?” Inkuan to: “Agko amta.”
13 Inyakar da ed saray Fariseo so datin bulag a too.
14 Nibanbana ya agew na Sabaton ed saman sanen si Jesus et nanggawa na pitek tan nilukasan to iray mata na saman a too.
15 Kanian, diad sayan pankanawnawa et sikatoy tinepetan met na saray Fariseo no panon a sikatoy akanengneng. Inkuan to ed sikara: “Sikatoy angiyan na pitek ed saray matak, tan nandilamos ak tan akanengneng ak la.”
16 Kanian inkuan na arum ed saray Fariseo: “Sayan too et agnanlapud Dios ta agto ngingilinan so Sabaton.” Et inkuan na arum: “Panon a makapanggawa na ontan iran klase na tanda so sakey a toon managkasalanan?” Kanian naapag ira.
17 Lapud saya et inkuan da lamet ed bulag a too: “Antoy nibagam ed sikato, lapud nilukasan to iray matam?” Inkuan na too: “Sikatoy sakey a propeta.”
18 Balet, ag-anisia iray Judio a sikatoy datin bulag tan makanengneng la, anggad impatawag da iray ateng na sayan too.
19 Tan tinepetan da ra: “Saya imay anak yo ya ibabaga yon nianak a bulag? Panon balet a sikatoy makanengneng la natan?”
20 Et inmebat iray ateng to, a kuan da: “Amta mi a saya so anak mi tan sikatoy nianak a bulag.
21 Balet agmi amta no panon a sikatoy makanengneng la, odino agmi amta no siopa so angilukas ed saray mata to. Tepetan yo, ta wala la’d edad. Nepeg a sikaton mismoy pansalita yo.”
22 Imbaga iraya na atateng to lapud natatakot ira ed saray Judio, ta nampapaknaan la na saray Judio a siopaman a mangipatua ed sikato bilang Kristo et nepeg a papawayen* ed sinagoga.*
23 Saya so makasengeg no akin ya imbaga na saray ateng to: “Sikatoy wala la’d edad. Sikatoy tepetan yo.”
24 Kanian, diad komaduan pankanawnawa et tinawag da so too a datin bulag tan inkuan da ed sikato: “Igloriam so Dios; amta mi a sayan too et sakey a managkasalanan.”
25 Et sikatoy inmebat: “Agko amta no sikatoy sakey a managkasalanan. Say amtak et sakey ak a bulag nensaman tan natan et makanengneng ak la.”
26 Kanian inkuan da ed sikato: “Antoy ginawa to ed sika? Panon ton nilukasan iray matam?”
27 Sikatoy inmebat ed sikara: “Imbagak la ed sikayo, balet agkayo dinmengel. Akin et labay yo lamet a narengel? Labay yo met so magmaliw a disipulo to?”
28 Lapud saya et sikatoy pinabaingan da: “Sakey kan disipulo na saman a too, balet sikami et disipulo nen Moises.
29 Amta mi ya akitongtong so Dios ed si Moises, balet sayan too et agmi amtay nanlapuan to.”
30 Sikatoy inmebat ed sikara: “Makapakelkelaw iya, ta agyo amtay nanlapuan to, balet ta nilukasan to iray matak.
31 Amta tayo ya agdedengelen na Dios iray pikakasi na saray managkasalanan, balet siopaman ya ontatakot ed Dios tan manggagawa na linawa to et dedengelen to.
32 Manlapu la nensaman et anggapo nin balot so nadngelan a nilukasan toy mata na sakey a nianak a bulag.
33 No sayan too et agnanlapud Dios, anggapon balot so nagawaan to.”
34 Inmebat ira ed sikato: “Anta nianak ka lan makasalanan, babangatan mo kami?” Et sikatoy pinapaway* da!
35 Nadngelan nen Jesus a sikatoy pinapaway da, tan sanen sikatoy aromog to, inkuan to: “Kasin manisia ka ed Anak na too?”
36 Sikatoy inmebat: “Siopa iman, Katawan, ta pian manisia ak ed sikato?”
37 Inkuan nen Jesus ed sikato: “Sikatoy anengneng mo la, tan sakey ni, sayay mitotongtong ed sika et sikato iman.”
38 Diad saman et inkuan to: “Manisia ak ed sikato, Katawan.” Tan sikatoy dinmakmomo ed sikato.
39 Et inkuan nen Jesus: “Linma ak diad sayan mundo pian mangiter na basiyan parad sayan panangukom: a saramay agmakanengneng et makanengneng la tan saramay makanengneng et magmaliw a bulag.”
40 Sarayan bengatla et nadngel na saramay wadman a Fariseo, tan inkuan da ed sikato: “Bulag kami met sirin?”
41 Et inkuan nen Jesus ed sikara: “No bulag kayo, anggapoy kasalanan yo. Balet natan et ibabaga yon, ‘Makanengneng kami.’ Wala nin siansiay kasalanan yo.”
