Juan 13:1-38
13 Sakbay na piesta na paskua et amta la nen Jesus a sinmabi lay oras na itaynan to ed sayan mundo pian onla ed Ama. Tan lapud inaro to iray disipulo to a walad mundo, intultuloy ton impatnag so panangaro to ed sikara anggad kasampotan.
2 Kanian legan na panamangdem, inyan na Diablo ed puso nen Judas Iscariote, ya anak nen Simon, so pangiyawat ed si Jesus.
3 Lapud amta nen Jesus ya inter la na Ama ed saray lima to so amin a bengatla tan sikatoy nanlapud Dios tan onla la ed Dios,
4 sikatoy inmalagey legan niran manpapangdem tan inyan to ed pireg so ilalatop ton kawes. Insan angala na tuwalya tan imbalkes to.
5 Kayari na satan, sikatoy angibales na danum ed sakey a palanggana insan inurasan to iray sali na saray disipulo tan pinunasan to iratan na tuwalya ya akabalkes ed sikato.
6 Diad saman et inasinggeran toy Simon Pedro. Kanian inkuan nen Pedro ed sikato: “Katawan, urasan mo iray salik?”
7 Inmebat si Jesus: “Agmo ni natalosan natan so gagawaen ko, balet natalosan mo naani kayari na sarayan bengatla.”
8 Inkuan nen Pedro: “Agmo nepeg ya urasan iray salik.” Inmebat si Jesus ed sikato: “No agta ka urasan, agka nayarin magmaliw a kaibak.”
9 Et inkuan nen Simon Pedro ed sikato: “Katawan, aliwan saray salik labat sirin, pati saray limak tan say ulok met.”
10 Inkuan nen Jesus ed sikato: “Samay nanames la et malinis lay interon laman to, kanian saray sali to labat so kaukolan ya urasan. Tan malinis kayo la, balet ta aliwan amin ed sikayo.”
11 Diad tua et kabat to imay toon mangiyawat ed sikato. Kanian imbaga ton: “Aliwan amin ed sikayo et malinis.”
12 Natan, sanen naurasan to la iray sali ra tan nisulong to lay ilalatop ton kawes tan dinmungo lamet ed lamisaan, inkuan to ed sikara: “Amta yo no antoy ginawak ed sikayo?
13 Tatawagen yo ak a, ‘Managbangat,’ tan, ‘Katawan,’ tan duga kayo, ta ontan ak.
14 Kanian no siak, a Katawan tan Managbangat, et inurasan ko iray sali yo, nepeg ya urasan yo met iray sali na balang sakey.
15 Ta angitilak ak na aligen yo, a no antoy ginawak ed sikayo et ontan met so nepeg yon gawaen.
16 Tua kuan ko ed sikayo, Say aripen et aliwan babaleg nen say katawan to, tan samay imbaki et aliwan babaleg nen samay angibaki ed sikato.
17 Lapud amta yo la irayan bengatla, maliket kayo no gawaen yo iraya.
18 Aliwan sikayon amin so tutukoyen ko; kabat ko iramay pinilik. On, pian nasumpal so Kasulatan, ‘Samay mamangan ed tinapay ko et inmalagey sumpad siak.’*
19 Natan et ibagak la ed sikayo sakbay itan a nagawa, ta pian sano nagawa la itan et manisia kayo a siak iman.
20 Tua kuan ko ed sikayo, Samay mangaawat ed siopaman ya ibakik et mangaawat met ed siak. Ontan met, samay mangaawat ed siak et mangaawat met ed samay angibaki ed siak.”
21 Kayarin imbaga nen Jesus irayan bengatla, sikatoy agonigon a maong, tan inyabawag to: “Tua kuan ko ed sikayo, Sakey ed sikayo so mangiyawat ed siak.”
22 Nannenengnengan iray disipulo, ta agda amta no siopa so tutukoyen to.
23 Akarungo ed abay nen Jesus so sakey ed saray disipulo to, tan sikatoy inar-aro nen Jesus.
24 Kanian saya so tinangeran nen Simon Pedro tan inkuan to ed sikato: “Ibagam no siopa iyay tutukoyen to.”
25 Et saya so sinmaral ed pagew nen Jesus tan inkuan to: “Katawan, siopa ’man?”
26 Kanian inmebat si Jesus: “Samay pangiteran ko na pisag a tinapay ya idelnet ko.” Tan sikatoy angala na pisag a tinapay tan indelnet to, insan inter to ed si Judas, say anak nen Simon Iscariote.
27 Tan kapangawat to ed pisag a tinapay, linmoob ed sikato si Satanas. Kanian inkuan nen Jesus ed sikato: “Sumpal mo lan tampol no anto so gagawaen mo.”
28 Balet, anggapoy makaamta ed saramay akarungo ed lamisaan no akin ya imbaga to iya ed sikato.
29 Diad tua, lapud si Judas so mamebemben ed kahon na kuarta, inisip na arum a say ibabaga nen Jesus ed sikato et: “Manaliw ka na saray bengatlan nakaukolan tayo parad piesta,” odino nepeg ya ikdan to iray mairap-bilay.
30 Kanian, sanen naawat to lay pisag a tinapay, sikatoy pinmaway a tampol. Tan labi la ed saman.
31 Sanen sikatoy akapaway la, inkuan nen Jesus: “Natan et niglogloria so Anak na too, tan diad panamegley to et niglogloria so Dios.
32 Tan sikatoy igloria na Dios a mismo, tan igloria ton tampol.
33 Ananak ya angkekelag, nakaiba yo ak ed daiset nin panaon. Anapen yo ak, tan singa imbagak la ed saray Judio, ‘Diman ed laen ko et agkayo makakar,’ ibagak lamet natan ed sikayo.
34 Iter ko ed sikayo so sakey a balon ganggan, a manaaroan kayo; no panon so impangarok ed sikayo, ontan met so panaaroan yo.
35 Diad saya et naamtaan na amin a sikayo iray disipulok, no manaaroan kayo.”
36 Inkuan nen Simon Pedro ed sikato: “Katawan, iner so laen mo?” Inmebat si Jesus: “Diman ed laen ko et agmo ak nayarian a tumboken natan, balet ontumbok ka naani.”
37 Inkuan nen Pedro ed sikato: “Katawan, akin et agtaka nayarian a tumboken natan? Iter ko so kamarerwak nisengeg ed sika.”
38 Inmebat si Jesus: “Nayarian mon iter so kamarerwam nisengeg ed siak? Tua kuan ko ed sika, Agbalot onkukaok so sakey a lalong anggad niburim ak lan mamitlo.”
