Juan 1:1-51
1 Diad gapo et wala lay Salita, tan say Salita et kaiba na Dios, tan say Salita et sakey a dios.
2 Sikatoy kaiba la na Dios diad gapo.
3 Amin a bengatla et apalsa diad panamegley to, tan ag-apalsa so anggan sakey a bengatla no aliwan diad panamegley to.
Say apalsa
4 diad panamegley to et bilay, tan say bilay et liwawa na totoo.
5 Tan say liwawa et onsisinag ed kabilungetan, tan ag-itan adaeg na kabilungetan.
6 Walay sakey a toon imbaki na Dios, a say ngaran to et Juan.
7 Sayan too et sinmabi pian mantasi, ta pian paneknekan to so nipaakar ed liwawa, pian manisia so amin a klase na totoo diad panamegley to.
8 Aliwan sikato imay liwawa, balet sikatoy linma dia pian tasian to so nipaakar ed satan a liwawa.
9 Say tuan liwawa ya onsinag ed amin a klase na too et ngalngali la onsabi ed mundo.
10 Sikatoy walad mundo nensaman, tan apalsa so mundo diad panamegley to, balet sikatoy agkabat na mundo.
11 Sikatoy sinmabi ed dilin baley to, balet ag-inawat na saray kabaleyan to.
12 Anggaman ontan, amin ya angawat ed sikato et inikdan toy kanepegan a magmaliw ya ananak na Dios, lapud ipapatnag day pananisia ed ngaran to,
13 tan nianak ira unong ed panlabayan na Dios, aliwan diad panamegley na dala odino diad panlabayan na atateng odino panlabayan na too.
14 Kanian say Salita et nagmaliw a too* tan akiayam ed sikatayo, tan anengneng tayo so gloria to, sakey a gloria ya aawaten na bogbogtong ya anak manlapud ama; tan sikatoy napno na agnaparaan a kaabigan tan katuaan.
15 (Si Juan so nantasi nipaakar ed sikato, a kinmelyaw ni ingen. Si Juan imay angibaga: “Samay onsasabi ed benegan ko et akauna la nen siak, ta sikatoy wala la sakbay ko.”)
16 Lapud sikatoy napno na agnaparaan a kaabigan, angawat itayon amin na daakan ya agnaparaan a kaabigan manlapud sikato.
17 Lapud niiter so Ganggan diad panamegley nen Moises, niwala so agnaparaan a kaabigan tan say katuaan diad panamegley nen Jesu-Kristo.
18 Anggapo so toon akanengneng ed Dios anggan kapigan; say bogbogtong ya anak a singa Dios a walad abay na Ama so angipaliwawa nipaakar ed sikato.
19 Natan, onia so impantasi nen Juan sanen imbaki na saray Judio iray saserdote tan saray Levita a nanlapud Jerusalem pian tepeten da: “Siopa ka?”
20 Tan imbaga toy tua tan agto imburi, a kuan ton: “Aliwan siak so Kristo.”
21 Kanian tinepetan da: “Siopa ka sirin? Si Elias?” Inkuan to: “Aliwan siak.” “Sika imay Propeta?” Et sikatoy inmebat: “Andi!”
22 Kanian inkuan da ed sikato: “Siopa ka sirin? Ibagam ed sikami pian amta mi ibaga mi ed saramay angibaki ed sikami. Antoy nibagam nipaakar ed inkasika?”
23 Inkuan to: “Siak imay boses ya onkekelyaw diad kalawakan, ‘Gawa yon maptek so dalanen nen Jehova,’ unong ya imbaga nen propetan Isaias.”
24 Natan, saramay imbaki et nanlapud saray Fariseo.
25 Kanian oniay intepet da ed sikato: “Akin sirin et manbabautismo ka no aliwan sika so Kristo odino si Elias odino Say Propeta?”
26 Et inmebat si Juan ed sikara: “Siak so manbabautismo ed danum. Balet walay sakey ed pegley yo agyo kabat,
27 samay onsasabi ed benegan ko, balet ta agak makanepegan a mangukbar ed singer na sandalyas to.”
28 Agawa iraya ed Betania diad nibaliw na Jordan, a pambabautismoan nen Juan.
29 Diad tinmumbok ya agew et anengneng toy Jesus ya onaasingger ed sikato, tan inkuan to: “Nengneng yo, say Kordero na Dios a mangekal ed kasalanan na mundo!
30 Saya imay tutukoyen kon, Diad benegan ko et walay lakin onsasabi ya akauna la nen siak, ta sikatoy wala la sakbay ko.
31 Anggan siak et sikatoy agko kabat nensaman, ingen say rason no akin a manbabautismo ak ed danum et pian sikatoy niparungtal ed Israel.”
32 Tan tinasian met nen Juan, a kuan to: “Anengneng koy espiritu ya onleleksab a singa sakey a malapati a nanlapud tawen, tan dinmapo itan ed sikato.
33 Anggan siak et sikatoy agko kabat nensaman, balet say Dios ya angibaki ed siak a manbautismo ed danum et inkuan to ed siak, ‘Siopaman a nanengneng mon leksaban tan dapoan na espiritu, sikato so manbautismo ed panamegley na masanton espiritu.’
34 Et anengneng ko itan, tan tinasian ko a sikato so Anak na Dios.”
35 Diad tinmumbok lamet ya agew, si Juan et akaalagey a kaiba toy duara ed saray disipulo to,
36 tan legan a sankanengneng toy Jesus a manaakar, inkuan to: “Nengneng yo, say Kordero na Dios!”
37 Tan nadngel na duaran disipulo iyan imbaga to, tan tinumbok day Jesus.
38 Insan linmingaw si Jesus, tan sanen anengneng to ra ya ontutumbok et tinepetan to ra: “Antoy aanapen yo?” Inkuan da ed sikato: “Rabbi, (a no ipatalos et mankabaliksay, Managbangat,) iner so panaayaman mo?”
39 Inkuan to ed sikara: “Mila kayo, pian nanengneng yo.” Kanian akila ra tan anengneng day panaayaman to, tan akiulop ira ed sikato ed saman ya agew; diad saman et komasamplo lan oras.*
40 Si Andres ya agi nen Simon Pedro so sakey ed samay duaran akadngel ed imbaga nen Juan tan tinmumbok ed si Jesus.
41 Unona et aromog na saya so agi ton si Simon, tan inkuan to ed sikato: “Aromog mi lay Mesias” (a no ipatalos et mankabaliksay, Kristo).
42 Sikatoy inyakar to ed si Jesus. Sanen sikatoy anengneng nen Jesus, inkuan to: “Sika si Simon ya anak nen Juan; sika so tawagen a Cefas” (ya impatalos a Pedro).
43 Diad tinmumbok ya agew et labay nen Jesus so onla ed Galilea. Tan aromog toy Felipe tan inkuan to: “Magmaliw kan patumbok ko.”
44 Si Felipe et taga Betsaida, diad syudad nen Andres tan si Pedro.
45 Aromog nen Felipe si Natanael tan inkuan to ed sikato: “Aromog mi la imay tutukoyen ed saray sulat nen Moises, diad Ganggan, tan ed saray sulat na saray Propeta, salanti, si Jesus, ya anak nen Jose, a taga Nazaret.”
46 Balet inkuan nen Natanael ed sikato: “Wala ta’y maong a too a manlapud Nazaret?” Inkuan nen Felipe: “Gala ta nengneng mo.”
47 Anengneng nen Jesus si Natanael ya onaasingger, tan oniay inkuan to nipaakar ed sikato: “Nengneng yo, sakey a peteg ya Israelita, ya agmamapalikdo.”
48 Inkuan nen Natanael ed sikato: “Panoy pakapikabat mo ed siak?” Et inmebat si Jesus: “Antis kan tawagen nen Felipe, sanen wala ka ed silong na kiew ya igos, anengneng ta ka la.”
49 Et inkuan nen Natanael ed sikato: “Rabbi, sika so Anak na Dios, sika so Ari na Israel.”
50 Inmebat si Jesus ed sikato: “Lapud imbagak ya anengneng ta ka ed silong na kiew ya igos, manisia ka la? Makanengneng ka ni na angkakabaleg a bengatla nen saraya.”
51 Inkuan to ni ed sikato: “Tua kuan ko ed sikayo, Nanengneng yon akalukas so tawen tan saray anghel na Dios et onsesegep tan oneepas ed Anak na too.”
