Juan 5:1-47
5 Kayari na sarayan bengatla et walay sakey a piesta na saray Judio, tan tinmatdang si Jesus ed Jerusalem.
2 Natan, diman ed Jerusalem diad asingger ed puerta na saray karnero, walay sakey a panagtiponan na danum a tinawag ed Hebreo a Bethzatha,* a walaan na limaran naatepan a dadalanan.*
3 Diad saratan et akarukol so amayamay a mansasakit, bulag, piley tan saramay kinmekebet so lima odino sali ra.
4* ——
5 Balet walay sakey a too ditan a talomplo tan waloy taon lan mansasakit.
6 Sanen anengneng nen Jesus iyan too ya akarukol, tan amta to ya abayag la iyan mansasakit, inkuan to ed sikato: “Labay moy onabig?”
7 Inmebat ed sikato so toon mansasakit: “Katawan, anggapo so toon mangilasur ed siak diad panagtiponan na danum sano nakikimbog la itan; balet sano onlasur ak la et walay sananey a makauna ed siak.”
8 Inkuan nen Jesus ed sikato: “Alagey ka, libit moy dukolan mo tan akar ka.”
9 Diad saman et tampol ya inmabig so too, tan nilibit toy dukolan to tan akaakar la.
Diad saman et agew na sabaton.
10 Kanian imbaga na saray Judio ed apaabig a too: “Sabaton natan, tan agmanepeg a manlibit kay dukolan.”
11 Balet sikatoy inmebat ed sikara: “Samay amaabig ed siak et inkuan ton, ‘Libit moy dukolan mo tan akar ka.’”
12 Sikatoy tinepetan da: “Siopay angibaga ed sikan, ‘Libit mo itan tan akar ka’?”
13 Balet agkabat na toon pinaabig no siopa iman, ta inmarawi lay Jesus, lapud dakdakel so totoo ed saman a pasen.
14 Kayari na saraya, sikatoy anengneng nen Jesus diad templo tan inkuan to ed sikato: “Nengneng mo, inmabig ka la. Agka la mankakasalanan, ta pian anggapoy nagawa ed sikan mas mauges a bengatla.”
15 Sayan too et linma tan imbaga to ed saray Judio a say amaabig ed sikato et si Jesus.
16 Kanian si Jesus et pinasegsegang na saray Judio nisengeg ed saya, ta gagawaen to iraya legan na Sabaton.
17 Balet imbaga to ed sikara: “Say Amak et mankikimey ni anggad natan, tan ontan ak met.”
18 Nisengeg ed saya et sikatoy lalon nanggunaetan a pateyen na saray Judio, lapud agto lambengat susumlangen so Sabaton noagta tatawagen to met ya Ama to so Dios, ya ipapara toy inkasikato ed Dios.
19 Kanian, inmebat si Jesus ed sikara: “Tua kuan ko ed sikayo, Say Anak et agmakapanggawa na anggan sakey a bengatla manlapud inkasikaton dili, noagta saman lambengat so nanenengneng ton gagawaen na Ama. Ta antokaman a gagawaen na Ama, saraya so gagawaen met na Anak.
20 Ta aaroen na Ama so Anak tan ipapanengneng to ed sikato so amin a gagawaen to, tan ipanengneng to ed sikato iray kimey a babaleg nen saraya, ta pian onkelaw kayo.
21 Ta no panon a papaolien na Ama iray inaatey tan bibilayen to ra, ontan met so Anak a bibilayen to iramay labay to.
22 Ta anggapon balot so uukomen na Ama, noagta inmatalek to la ed Anak so amin a panangukom,
23 ta pian amin so mangigalang ed Anak a singa pangigagalang da ed Ama. Samay agmangigagalang ed Anak et agmangigagalang ed Ama ya angibaki ed sikato.
24 Tua kuan ko ed sikayo, Samay ondedengel ed salitak tan manisia ed samay angibaki ed siak et walaan na bilay ya andi-anggaan, tan sikatoy agnaukom noagta alabasan to lay ipapatey tan mamapaarap la ed bilay.
25 “Tua kuan ko ed sikayo, Onsabi so oras, tan natan la itan, sano narengel na inaatey so boses na Anak na Dios tan saramay tinmalineng et nabilay.
26 Ta unong a say Ama et walay bilay ed sikaton mismo, inikdan to met so Anak ta pian walay bilay ed sikaton mismo.
27 Tan sikatoy inikdan to na autoridad a mangukom, lapud sikatoy Anak na too.
28 Agyo pankelawan iya, lapud onsabi so oras a saray amin a walad pakanodnonotan iran lubok et narengel day boses to
29 tan ompaway ira, saramay nanggawa na maong iran bengatla et napaoli pian manbilay, saramay nanggawa na mauges iran bengatla et napaoli pian naukom.
30 Agak makapanggawa na anggan sakey a bengatla unong ed dilin panlabayan ko; mangukom ak unong ed narengel ko; tan say panangukom ko et matunong, ta say aanapen ko et aliwan say dilin linawak, noag say linawa na samay angibaki ed siak.
31 “No siak lambengat so mantasi nipaakar ed inkasiak, aliwan tua so pantasik.
32 Wala so sananey a mantatasi nipaakar ed siak, tan amtak a say pantatasi to nipaakar ed siak et tua.
33 Sikayoy angibaki na totoo ed si Juan, tan tinasian to so katuaan.
34 Anggaman ontan, agko la kaukolan so pantasi na too, balet ibabagak iraya ta pian nilaban kayo.
35 Saman a too et sakey a silew a mandarlang tan maliwliwawa, tan diad antikey a panaon et labalabay yon panliketan a maong so liwawa to.
36 Balet walaan ak na pantasi a mas mabiskeg nen samay pantasi nen Juan, ta saray mismon kimey ya ingganggan na Amak a sumpalen ko, saray mismon kimey a gagawaen ko, so mamaneknek a siak so imbaki na Ama.
37 Ontan met, say Ama ya angibaki ed siak so mismon mantatasi ed siak. Agyon balot nadngel so boses to odino anengneng so itsura to,
38 tan agmansiasiansia ed sikayo so salita to, ta agyo panisiaan imay mismon imbaki to.
39 “Uusisaen yo so Kasulatan, ta iisipen yo a diad panamegley na saratan et nawalaan kayoy bilay ya andi-anggaan; tan sarayan mismo so mantatasi nipaakar ed siak.
40 Ingen ta agyo labay so ondago ed siak pian nawalaan kayoy bilay.
41 Agko aawaten so panangigloria na totoo,
42 balet amtak ya anggapoy panangaro yo ed Dios.
43 Linma ak dia ed ngaran nen Amak, balet agyo ak inawat; no walay sananey ya onsabi dia ed ngaran ton dili, sikatoy aawaten yo.
44 Panon kayon manisia, anta aawaten yoy panangigloria na balang sakey tan agyo aanapen so gloria a manlalapud saksakey a Dios?
45 Agyo iisipen ya akusaan ta kayo ed Ama; walay sakey a mangaakusa ed sikayo, si Moises, a sikatoy paniilaloan yo.
46 Diad tua, no anisia kayo ed si Moises, manisia kayo komon ed siak, lapud sikatoy nansulat nipaakar ed siak.
47 Balet no agyo panisiaan iray insulat to, panon yon panisiaan iray salitak?”
