Juan 15:1-27
15 “Siak so tuan sengeg na ubas tan say Amak so tomatanem.
2 Eekalen toy balang sanga ed siak ya agmanbubunga, tan lilinisan toy balang sakey a manbubunga, ta pian manbunga itan na mas dakel.
3 Malinis kayo la lapud salitan imbagak ed sikayo.
4 Mansiansia kayon mikasakey ed siak, tan mikasakey ak ed sikayo. No panon a say sanga et agmakapanbungan bukor no ag-itan mansiansia ed sengeg na ubas, agkayo met makapanbunga no agkayo mansiansian mikasakey ed siak.
5 Siak so sengeg na ubas, sikayo iray sanga. Samay mansiansian mikasakey ed siak, tan mikasakey ak ed sikato, sikatoy manbunga na dakdakel; ta no nisian kayo ed siak, anggapon balot so nagawaan yo.
6 Siopaman ya agmansiansian mikasakey ed siak, sikatoy ibantak a singa sakey a sanga tan namagaan; tan tiponen na totoo iratan a sanga tan ibuntok da ed apoy tan poolan da.
7 No mansiansia kayon mikasakey ed siak tan mansiansia ed sikayo iray salitak, kerew yo so antokaman a labay yo tan niiter itan ed sikayo.
8 Say Amak et nigloria no mantultuloy kayon manbunga na dakel tan paneknekan yo a sikayo iray disipulok.
9 Inaro ak na Ama tan inaro ta kayo, kanian mansiansia kayo ed arok.
10 No unoren yo iray ganggan ko, mansiansia kayo ed arok, no panon ya inunor ko iray ganggan na Ama tan nansiansia ak ed aro to.
11 “Imbagak iraya ed sikayo, ta pian nalikna yon maong so liket a naliliknak.
12 Iganggan ta kayo a manaaroan kayo a singa ed impangarok ed sikayo.
13 Anggapo lay walaan na mas baleg a panangaro nen saya, a say sakey et iter toy bilay* to nisengeg ed kakaaro to.
14 Kakaaro ta kayo no gagawaen yo so igaganggan ko ed sikayo.
15 Agta kayo la tawagen ya ariripen, lapud ag-amta na aripen so gagawaen na katawan to. Balet tinawag ta kayon kakaarok, lapud impaamtak la ed sikayo so amin a nadngel ko ed Amak.
16 Agyo ak pinili, balet pinili ta kayo, tan tinuro ta kayo pian mantultuloy kayon manbunga na dakel tan mansiansia so bunga yo; ta pian antokaman a kerewen yo ed Ama diad ngaran ko et iter to ed sikayo.
17 “Igaganggan ko iraya ed sikayo, pian manaaroan kayo.
18 No busolen kayo na mundo, amta yo a binusol to ak la sakbay to kayon busolen.
19 No kabiangan kayo na mundo, say mundo et manliket ed kayarian ton dili. Natan ta agkayo kabiangan na mundo, noagta pinili ta kayo manlapud mundo, busolen kayo sirin na mundo.
20 Nodnonot yoy salitan imbagak ed sikayo, Say aripen et aliwan babaleg nen say katawan to. No pinasegsegang da ak, pasegsegangen da kayo met; no inunor da so salitak, unoren da met so salita yo.
21 Balet gawaen da irayan amin a bengatla sumpad sikayo lapud ngaran ko, ta agda kabat imay angibaki ed siak.
22 No agak linma tan nansalita ed sikara, anggapo komon so kasalanan da; balet natan et anggapoy nibaraan da ed kasalanan da.
23 Samay mamubusol ed siak et mamubusol met ed Amak.
24 No agko ginawa ed sikara iray kimey ya agni agawaan na anggan siopa, anggapo komon so kasalanan da; balet natan et anengneng da ak tan binusol da ak pati say Amak.
25 Ingen, agawa itan pian nasumpal so salitan nisulat ed Ganggan da, ‘Binusol da ak ya anggapoy sengegan.’
26 Sano onsabi so mananulong* ya ibakik ed sikayo manlapud Ama, say espiritu na katuaan a manlalapud Ama so mantasi nipaakar ed siak,
27 tan sikayo met so mantasi, lapud kaiba ta kayo la manlapu nen ginmapo ak.
