Juan 11:1-57
11 Natan et walay sakey a lakin mansasakit, si Lazaro a taga Betania, a ditan met so baryo di Maria tan Marta ya agagi to.
2 Diad tua et saya imay Maria ya angipuyok na ambalingit a larak ed Katawan tan angipunas na saray buek to ed saray sali to, tan agi to si Lazaro a mansasakit.
3 Kanian walay imbaki na saray agagi ton bibii pian mangibaga ed si Jesus: “Katawan, nengneng mo! samay pinabpablim a kaaro et mansasakit.”
4 Balet sanen nadngel itan nen Jesus, inkuan to: “Sayan sakit et agmansumpal ed ipapatey, noagta diad kigloriaan na Dios, ta pian nigloria so Anak na Dios diad panamegley na satan.”
5 Inar-aro nen Jesus ira di Marta tan say yugtan ton bii tan si Lazaro.
6 Balet, sanen nadngel to a mansasakit si Lazaro, sikatoy nansiansia nin duay agew diman ed kawalaan to.
7 Tan kayari na saya, inkuan to ed saray disipulo: “Onla itayo lamet ed Judea.”
8 Inkuan ed sikato na saray disipulo: “Rabbi, nen kien labat et labay kan tupaken na saray taga Judea, insan onla ka lamet diman?”
9 Inmebat si Jesus: “Agta walay labinduan oras no agew? No say sakey et manakar no agew, anggapoy antokaman a natalapos to, lapud nanenengneng toy liwawa a parad totoo.
10 Balet no say sakey et manakar no labi, walay natalapos to, lapud anggapo ed sikato so liwawa.”
11 Saratan so imbaga to, insan inkuan to ed sikara: “Say kaaro tayon si Lazaro et manpapainawa, balet onla ak diman pian bangonen ko ed ugip to.”
12 Kanian inkuan na saray disipulo ed sikato: “Katawan, no sikatoy manpapainawa, sikatoy onabig sirin.”
13 Balet say imbaga nen Jesus et nipaakar ed impatey nen Lazaro. Ingen ta inisip dan say ibabaga to et nipaakar ed panagpainawa ed ugip.
14 Kanian diad saman et imbaga la nen Jesus ed sikara: “Inatey lay Lazaro,
15 tan nisengeg ed sikayo et maliket ak ya anggapo ak diman, ta pian manisia kayo. Balet onla itayo ed sikato.”
16 Kanian si Tomas, a tatawagen a Say Lason, et inkuan to ed saray kapara ton disipulo: “Onla itayo met, ta pian ompatey tayon kaiba to.”
17 Diad saman, sanen sinmabi si Jesus, apat agew lan walad pakanodnonotan a lubok si Lazaro.
18 Say Betania et asingger ed Jerusalem, a ngalngali taloran kilometro so distansia.
19 Diad saman, dakel ed saray Judio so linma ed si Marta tan Maria ta pian ligliwaen da ra lapud impatey na agi ra.
20 Kanian sanen nadngel nen Marta ya onsasabi lay Jesus, sikatoy inabet to; balet si Maria et akayurong labat diad abung.
21 Et inkuan nen Marta ed si Jesus: “Katawan, no wadia ka labat, agkomon inatey so agik.
22 Balet natan et amtak ya anggan panon karakel so kerewen mo ed Dios, iter iratan ed sika na Dios.”
23 Inkuan nen Jesus ed sikato: “Say agim et onoli.”
24 Et inkuan nen Marta ed sikato: “Amtak a sikatoy onoli diad kaunoran ya agew.”
25 Inkuan nen Jesus ed sikato: “Siak so kioli tan say bilay. Samay mangipapanengneng na pananisia ed siak, anggano sikatoy ompatey et ombilay lamet;
26 tan balang sakey a mabilay tan mangipapanengneng na pananisia ed siak et aglan balot ompatey. Manisia ka ed saya?”
27 Inkuan to ed sikato: “On, Katawan, manisia ak a sika so Kristo ya Anak na Dios, samay onsabi ed mundo.”
28 Tan sanen nibaga to la iya, sikatoy tinmaynan tan tinawag toy Maria ya agi to, tan masekreto ton imbaga: “Wadia lay Managbangat tan patatawag to ka.”
29 Sanen nadngel iya nen Maria, sikatoy inmalagey a tampol tan linma ed sikato.
30 Diad tua et agni akasabi ed baryo si Jesus, noagta wadman ni ed pasen ya angabetan nen Marta ed sikato.
31 Kanian, sanen saray Judio a kaiba nen Maria diad abung tan manliligliwa ed sikato et anengneng dan sikatoy inmalagey a tampol tan pinmaway, sikatoy tinumbok da, ya inisip dan sikatoy onla ed pakanodnonotan a lubok pian onakis diman.
32 Diad ontan, sanen akasabi si Maria ed kawalaan nen Jesus tan sikatoy anengneng to, sikatoy dinmakmomo ed salian to, tan inkuan to: “Katawan, no wadia ka labat, agkomon inatey so agik.”
33 Kanian, sanen anengneng nen Jesus a sikatoy onaakis pati saray Judio a tinmumbok ed sikato, naermenan si Jesus diad puso* to tan agonigon,
34 tan inkuan to: “Iner so angiparukolan yo ed sikato?” Inkuan da: “Katawan, gala tan nengneng mo.”
35 Et akalua si Jesus.
36 Kanian inkuan na saray Judio: “Nengneng yo, agaylay panamabli to ed sikato!”
37 Balet inkuan na arum ed sikara: “No ayarian ton ilukas so mata na bulag a too, agta nayarian to met komon ya amperen so ipatey nen Lazaro?”
38 Kanian, sanen lalon naermenan si Jesus, sikatoy linma ed pakanodnonotan a lubok. Diad tua et sakey itan ya ungib, tan asaraan na sakey a bato.
39 Inkuan nen Jesus: “Ekal yo so bato.” Et inkuan ed sikato nen Marta, ya agi na inatey: “Katawan, sikatoy ambanget la natan, ta apat agew to la.”
40 Inkuan nen Jesus ed sikato: “Agta imbagak ed sika a no manisia ka et nanengneng moy gloria na Dios?”
41 Kanian inekal day bato. Et tinmangay si Jesus ed tawen tan inkuan to: “Ama, misalamat ak ed sika ta dinengel mo ak.
42 Tua, amtak a naynay mo ak a dedengelen; balet nansalita ak nisengeg ed saray totoon akaalagey ed kaliberliber, ta pian manisia ra ya imbaki mo ak.”
43 Tan sanen nibaga to la iraya, sikatoy kinmelyaw ed maksil a boses: “Lazaro, paway ka!”
44 Say too ya inatey la et pinmaway a saray sali tan lima to et apotipotan na saray abel, tan say lupa to et abalkot na abel. Et inkuan nen Jesus ed sikara: “Ukbaran yo tan paulyan yo.”
45 Kanian dakel ed saray Judio a linma ed si Maria so anisia ed si Jesus sanen anengneng day ginawa to;
46 balet arum ed sikara so linma ed saray Fariseo tan imbaga da iray ginawa nen Jesus.
47 Lapud saya et tinipon na saray manunan saserdote tan saray Fariseo so Sanhedrin tan inkuan da: “Anto lay gawaen tayo, ta amayamay a tanda so gagawaen na sayan too?
48 No sikatoy paulyanan tayo labat ya onia, manisia la ran amin ed sikato, tan onsabi iray Romano tan ekalen da ed sikatayo so pasen* tayo tan say nasyon tayo.”
49 Balet samay sakey ed sikara, si Caifas, ya atagey a saserdote ed saman a taon, so angikuan: “Anggapon balot so amta yo,
50 tan agyo ibabagan sikayoy nagunggonaan no say sakey a too et ompatey nisengeg ed totoo tan agnaderal so interon nasyon.”
51 Balet, agto iya imbaga manlapud sikaton dili; ingen lapud sikatoy atagey a saserdote ed saman a taon, impasakbay to a si Jesus et nepeg ya ompatey parad nasyon,
52 tan aliwan parad nasyon labat, noagta tiponen to met a mankakasakey iray nitaytayak ya ananak na Dios.
53 Kanian manlapu la ed saman ya agew et nantotongtongan da so pamatey ed sikato.
54 Lapud saya, si Jesus et agla nanakar-akar a maparungtal ed limog na saray Judio, noagta sikatoy tinmaynan la diman ya amaarap ed pasen ya asingger ed kalawakan, diad sakey a syudad a tatawagey Efraim, tan nansiansia diman a kaiba to iray disipulo.
55 Natan et asingger la so paskua na saray Judio, tan dakel so totoon nanlapud saman a pasen a tinmatdang ed Jerusalem sakbay na paskua ta pian linisan day inkasikara unong ed ganggan.
56 Kanian inanap day Jesus tan ibabaga ra ed sakey tan sakey legan iran akaalagey diad loob na templo: “Antoy nikuan yo? Agto lan balot kasi onla ed piesta?”
57 Diad saman et ingganggan na saray manunan saserdote tan saray Fariseo a no walay makaamta ed kawalaan nen Jesus, nepeg ton ibaga itan, ta pian naerel da.
