Juan 4:1-54
4 Natan, sanen naamtaan nen Jesus a nadngelan na saray Fariseo a mas dakel so magmamaliw a disipulo tan babautismoan to nen say si Juan—
2 anggaman diad tua et aliwan si Jesus a mismo so manbabautismo noagta saray disipulo to—
3 sikatoy tinmaynan ed Judea tan linma lamet ed Galilea.
4 Balet kaukolan a sikatoy ondalan ed Samaria.
5 Kanian sikatoy akasabi ed sakey a syudad na Samaria a tatawagen a Sicar, ya asingger ed uma ya inter nen Jacob ed anak ton si Jose.
6 Diad tua et wadman so bobon nen Jacob. Natan, yinmurong si Jesus ed abay na bobon lapud naksawan a nanakar. Diad saman et komanem lan oras.*
7 Sinmabi so sakey a biin taga Samaria pian onasol. Tan inkuan nen Jesus ed sikato: “Ikdan mo ak pay inumen ko.”
8 (Lapud linma ed syudad iray disipulo to pian manaliw na naakan.)
9 Kanian inkuan na Samaritana ed sikato: “Akin et onkekerew ka ed siak na inumen anta Judio ka, tan Samaritana ak?” (Ta saray Judio et agmitotongtong ed saray Samaritano.)
10 Et inmebat si Jesus ed sikato: “No naamtaan mo labat so regalo na Dios tan no siopay mangibabaga ed sikan, ‘Ikdan mo ak pay inumen ko,’ kinmerew ka la komon ed sikato, ta pian ikdan to kay danum a mabilay.”
11 Inkuan na bii ed sikato: “Katawan, anggapoy anggan pan-asol mo, tan aralem so bobon. Iner sirin so pangalaan mo ed sayan danum a mabilay?
12 Kasin magmaong ka ni nen say laki min si Jacob, ya angiter ed sikami na bobon tan sikaton mismo tan saray ananak to tan ayayep to et inminum dia?”
13 Inmebat si Jesus ed sikato: “Balang sakey ya oniinum ed sayan danum et napegaan lamet.
14 Balet siopaman ya oninum ed danum ya iter ko ed sikato et agbalot napegaan, ta say danum ya iter ko ed sikato et magmaliw a singa subol na danum ed loob to a mansusbol pian mangiter na bilay ya andi-anggaan.”
15 Inkuan na bii ed sikato: “Katawan, ikdan mo ak pa na sayan danum, ta pian agak la napegaan odino pawilpawil ed sayan pasen pian onasol.”
16 Inkuan to ed sikato: “La ka, itagar mo diay asawam.”
17 Et inmebat so bii: “Anggapoy asawak.” Inkuan nen Jesus ed sikato: “Dugay imbagam ya, ‘Anggapoy asawak.’
18 Ta limara lay nagmaliw ya asawam, tan say lakin piaamongan mo natan et agmo asawa. Diad saya et tua so imbagam.”
19 Inkuan na bii ed sikato: “Katawan, seguro et sakey kan propeta.
20 Diad sayan palandey so nandayewan na inmuunan atateng mi; balet ibabaga yo a diad Jerusalem so nepeg a pandayewan na totoo.”
21 Inkuan nen Jesus ed sikato: “Manisia ka ed siak, bii. Say oras et onsabi sano aliwa lan diad sayan palandey odino diad Jerusalem so pandayewan yo ed Ama.
22 Agyo amta so dadayewen yo, balet amta mi so dadayewen mi, lapud say kilalaban et manlapud saray Judio.
23 Anggaman kuan, onsabi so oras, tan natan la itan, sano saray tuan managdayew et mandayew ed Ama diad espiritu tan katuaan, ta diad tua et ontan iray aanapen na Ama a mandayew ed sikato.
24 Say Dios et Espiritu, tan saramay mandadayew ed sikato et nepeg a mandayew diad espiritu tan katuaan.”
25 Inkuan na bii ed sikato: “Amtak ya onsabi so Mesias, a tatawagen a Kristo. Sano sikatoy onsabi, maparungtal ton iyabawag ed sikatayo so amin a bengatla.”
26 Inkuan nen Jesus ed sikato: “Siak a mitotongtong ed sika et siak itan.”
27 Diad sayan bekta et sinmabi iray disipulo to, tan mankelaw ira ta pitotongtongan toy sakey a bii. Ingen, anggapoy angitepet na: “Antoy aanapen mo?” odino, “Akin et mitotongtong ka ed sikato?”
28 Diad saman et intilak na bii so buyog to tan linma ed syudad tan imbaga to ed saray totoo:
29 “Mila kayo ed siak, nengneng yo so toon angibaga ed siak na amin a ginawak. Aliwa kasin saya imay Kristo?”
30 Et sikaray pinmaway ed syudad tan linma ra ed sikato.
31 Kaleganan na satan, oniay kekerewen ed sikato na saray disipulo: “Rabbi, mangan ka la.”
32 Balet inkuan to ed sikara: “Walay kanen ko ya agyo amta.”
33 Kanian inkuan na saray disipulo ed balang sakey: “Agta anggapoy angawit ed sikato na antokaman a naakan?”
34 Inkuan nen Jesus ed sikara: “Say kanen ko et say panggaway linawa na samay angibaki ed siak tan say panumpal ed kimey to.
35 Agta ibabaga yon wala ni so apat bulan antis ya onsabi so panag-ani? Nia! Ibagak ed sikayo: Nengneng yo iray kaumaan, ya amputi la ra parad panag-ani.
36 Say manag-ani et mangaawat la na saray upa tan mantitipon la na bunga a parad bilay ya andi-anggaan, ta pian say tomatanem tan say manag-ani et manliket iran dua.
37 Nipaakar ed saya et tua so salitan, Say sakey et tomatanem tan say sakey ni et manag-ani.
38 Imbaki ta kayo pian anien yoy agyo nansagpotan. Say arum so nansagpot, tan pinanabangan yo lay nansagpotan da.”
39 Natan, anisia ed sikato so dakel a Samaritano a nanlapud satan a syudad lapud inkuan na bii bilang pantasi: “Imbaga to ed siak so amin a ginawak.”
40 Kanian sanen linma ed sikato iray Samaritano, kinerew da ed sikato a mansiansia ni ed sikara; tan sikatoy nansiansia diman ed duaran agew.
41 Diad ontan et dakel ni so anisia lapud imbaga to,
42 tan inkuan da ed bii: “Manisia kami, aliwan lapud ibabagam, noagta lapud nadngel mi lan mismo tan amta mi a sayan too so peteg a manangilaban na mundo.”
43 Kayari na duay agew, sikatoy tinmaynan diman ya amaarap ed Galilea.
44 Balet, tinasian a mismo nen Jesus a say sakey a propeta et agnapagalangan diad dilin baley to.
45 Kanian kasabi to ed Galilea, sikatoy inawat na saray totoo ditan, lapud anengneng da so amin a ginawa to ed Jerusalem kaleganan na piesta, ta linma ra met diad piesta.
46 Diad saman et sikatoy linma lamet ed Cana na Galilea, a diman et impagmaliw to nensaman ya alak so danum. Natan, walay sakey a lingkor na ari a say anak ton laki et mansasakit diad Capernaum.
47 Sanen nadngel na sayan too a pinmaway si Jesus ed Judea pian onla ed Galilea, sikatoy nila to tan intagar to pian paabigen toy anak to ta ngalngali la ompatey.
48 Balet inkuan nen Jesus ed sikato: “No agkayo makanengneng na saray tanda tan pakelaw, agkayon balot manisia.”
49 Inkuan ed sikato na lingkor na ari: “Katawan, mila ka ed siak sakbay ya ompatey so melag ya ana’ko.”
50 Inkuan nen Jesus ed sikato: “La ka la; say anak mo et manbilay.” Sikatoy anisia ed imbaga nen Jesus tan linma la.
51 Balet sanen mampapalasur ni labat et sikatoy inabet la na ariripen to pian ibaga ran mabilay so anak to.
52 Kanian tinepetan to ra no anton oras so inyabig to. Et inkuan da ed sikato: “Karuman, diad komapiton oras* et naandi lay petang to.”
53 Kanian naamtaan na ama a saman imay mismon oras na impangibaga nen Jesus ed sikato: “Say anak mo et manbilay.” Et sikato tan say interon sankaabungan to so anisia.
54 Ontan met, saya so komaduan tanda a ginawa nen Jesus sanen pinmaway ed Judea ya amaarap ed Galilea.
