Juan 16:1-33
16 “Sinalitak irayan bengatla ed sikayo ta pian agkayo natiror.
2 Sikayoy papawayen* na saray totoo ed sinagoga. Diad tua et onsabi so oras sano isipen na balang sakey a mamatey ed sikayo a sikatoy akapanggawa na sagradon panaglingkor ed Dios.
3 Balet gawaen da irayan bengatla lapud agda kabat so Ama odino siak.
4 Anggaman ontan, imbagak iraya ed sikayo ta pian sano onsabi lay oras parad saraya et nanonotan yo ya imbagak iraya ed sikayo.
“Balet, agko imbaga iraya ed sikayo diad gapo, lapud kaiba yo ak.
5 Natan et onla ak la ed samay angibaki ed siak, ingen ta anggapo ed sikayo so nantepet ed siak, ‘Iner so laen mo?’
6 Balet lapud imbagak iraya ed sikayo, napno na ermen so kapusoan yo.
7 Anggaman ontan, ibabagak so tua ed sikayo, Pankaabigan yo so itaynan ko. Ta no agak ontaynan, say mananulong* et agbalot onla ed sikayo; balet no onla ak, sikatoy ibakik ed sikayo.
8 Sano onsabi itan, sikatoy mangiter ed mundo na makakombinsin paneknek nipaakar ed kasalanan tan nipaakar ed inkatunong tan nipaakar ed panangukom:
9 unona et nipaakar ed kasalanan, lapud agda ipapatnag so pananisia ed siak;
10 insan nipaakar ed inkatunong, lapud onla ak ed Ama tan agyo ak la nanengneng;
11 insan nipaakar ed panangukom, lapud say manuley na sayan mundo et naukom la.
12 “Dakel ni so ibagak ed sikayo, balet agyo ni natalosan iratan natan.
13 Balet sano onsabi itan,* say espiritu na katuaan, iwanwan to kayo diad amin a katuaan, ta sikatoy agmansalita manlapud sikaton dili, noagta salitaen to iray bengatlan narengel to, tan ipaamta to ed sikayo iray bengatlan onsabi.
14 Satan so mangigloria ed siak, lapud awaten to imay manlapud siak tan ipaamta to itan ed sikayo.
15 Amin a bengatlan walad Ama et kayarian ko. Kanian imbagak ya awaten to imay manlapud siak tan ipaamta to itan ed sikayo.
16 Diad daiset nin panaon et agyo ak la nanengneng, tan diad daiset met a panaon et nanengneng yo ak lamet.”
17 Kanian inkuan na arum ed saray disipulo to ed sakey tan sakey: “Anto kasi labay ton ibaga sanen inkuan to ed sikatayon, ‘Diad daiset nin panaon et agyo ak la nanengneng, tan diad daiset met a panaon et nanengneng yo ak lamet,’ tan, ‘lapud onla ak la ed Ama’?”
18 Kanian inkuan da: “Antoy labay ton ibaga sanen inkuan ton, ‘daiset nin panaon’? Agtayo natatalosan so ibabaga to.”
19 Amta nen Jesus a sikatoy labay dan tepetan, kanian tinepetan to ra: “Kasin mantetepetan kayo nipaakar ed saya, lapud inkuan kon, Diad daiset nin panaon et agyo ak la nanengneng, tan diad daiset met a panaon et nanengneng yo ak lamet?
20 Tua kuan ko ed sikayo, Onakis tan manugaog kayo, balet manliket so mundo; manermen kayo, balet magmaliw a gayaga so ermen yo.
21 Say sakey a bii et maermen sano mananak la, lapud asabi lay oras to; balet sano nianak to lay ugaw, agto la nanonotan so impanirap to lapud gayaga to a nianak ed mundo so sakey a too.
22 Kanian maneermen kayo met natan; balet nanengneng ta kayo lamet tan manliket so kapusoan yo, tan anggapoy makapangekal ed gayaga yo.
23 Tan diad satan ya agew et agyo ak tepetan a balot. Tua kuan ko ed sikayo, No walay antokaman a kerewen yo ed Ama, iter to itan ed sikayo diad ngaran ko.
24 Anggad natan et anggapo ni anggan sakey a kinerew yo diad ngaran ko. Kerew kayo tan makaawat kayo, ta pian magmaliw a nagnap so gayaga yo.
25 “Imbagak iraya ed sikayo diad panamegley na saray panangikompara. Onsabi so oras ya agak la mangusar na saray panangikompara sano mitongtong ak ed sikayo, balet malinew kon isalaysay ed sikayo so nipaakar ed Ama.
26 Diad satan ya agew et onkerew kayo diad ngaran ko, tan agko labay ya ibagan siak ni so onkerew ed Ama parad sikayo.
27 Ta aaroen kayo na Ama, lapud inaro yo ak tan anisia kayo a linma ak dia a mangirepresenta ed Ama.
28 Nanlapu ak ed Ama tan linma ak ed mundo. Sakey ni, ontaynan ak la ed mundo tan onla ak la ed Ama.”
29 Et inkuan na saray disipulo to: “Nia! Malinew la so ibabagam, tan agka la manguusar na panangikompara.
30 Amta mi la natan ya amtam so amin a bengatla tan agla kaukolan a wala ni mantepet ed sika. Lapud saya et manisia kami a nanlapu ka ed Dios.”
31 Inmebat si Jesus ed sikara: “Manisia kayo la natan?
32 Nia! Onsabi so oras, diad tua et sinmabi la itan, a balang sakey ed sikayo et ombatik ed dilin abung to tan taynanan yo ak a bukor; ingen ta agak manbukbukor, lapud kaibak so Ama.
33 Imbagak iraya ed sikayo ta pian nawalaan kayo na deen diad panamegley ko. Diad mundo et walaan kayo na kairapan, balet manpakpel kayo! Tinalok so mundo.”
