Juan 19:1-42
19 Kanian diad saman et inala nen Pilato si Jesus tan impasiplatan to.
2 Tan saray sundalo et nanlaga na koronan sabisabit tan inyan da itan ed ulo to tan sinulongan day purpuran kawes;
3 tan inmaasingger ira ed sikato, a kuan da: “Maabig ya agew, Ari na saray Judio!” Ontan met, sikatoy tinatampal da.
4 Tan pinmaway lamet si Pilato tan inkuan to ed sikara: “Nengneng yo! Sikatoy ipaway ko ed sikayo pian naamtaan yon anggapoy aromog kon kasalanan to.”
5 Diad saman et pinmaway si Jesus, ya akoronaan na sabisabit tan akasulong na purpuran kawes. Tan inkuan to ed sikara: “Nia! Say too!”
6 Balet, sanen sikatoy anengneng na saray manunan saserdote tan saray opisyal, inmeyag ira, a kuan da: “Ipasak mo! Ipasak mo!” Inkuan nen Pilato ed sikara: “Ala yo la tan ipasak yo, ta anggapon balot so naromog kon kasalanan to.”
7 Inmebat iray Judio: “Walay ganggan mi, tan unong ed ganggan et sikatoy nepeg ya ompatey, lapud ginawa toy inkasikaton anak na Dios.”
8 Kanian sanen nadngel nen Pilato iyan salita, sikatoy lalon tinmakot;
9 tan linmoob lamet ed palasyo na gobernador tan inkuan to ed si Jesus: “Iner so nanlapuan mo?” Balet ag-inebatan nen Jesus.
10 Kanian inkuan nen Pilato ed sikato: “Agka mitongtong ed siak? Agmo amta a walay autoridad kon mangibulos ed sika tan walay autoridad kon mangipasak ed sika?”
11 Inmebat si Jesus: “Anggapon balot so autoridad mo sumpad siak no ag-itan impagamor ed sika manlapud tagey. Kanian mas baleg so kasalanan na samay toon angiyawat ed siak diad sika.”
12 Lapud saya, nannonot si Pilato no panon a sikatoy nibulos to. Balet inmeyag iray Judio, a kuan da: “No ibulos mo iyan too, aliwa kan kaaro nen Cesar. Balang too a gagawaen ton ari so inkasikato et sumpa ed Cesar.”
13 Kanian sanen nadngel iraya nen Pilato, impaway toy Jesus, tan yinmurong ed panangukoman diad pasen a tatawagey Say Entabladon Bato, balet diad Hebreo et Gabbatha.
14 Diad saman et panagparaan la ed paskua, tan asingger lay komanem ya oras.* Tan inkuan to ed saray Judio: “Nengneng yo! Say ari yo!”
15 Balet, inyeeyag da: “Patey mo! Patey mo! Ipasak mo!” Inkuan nen Pilato ed sikara: “Ipasak koy ari yo?” Et inmebat iray manunan saserdote: “Anggapoy ari mi noag si Cesar.”
16 Kanian diad saman et sikatoy inyawat to la ed sikara pian nipasak.
Et inala ra si Jesus.
17 Tan sikatoy pinmaway, a sankasakbat to so panamairapan a kiew,* ya amaarap ed sakey a pasen a tatawagen a Lapislapis na Ulo, a diad Hebreo et tatawagen a Golgotha;
18 tan ditan da impasak si Jesus, a kaiba toy duara nin lalaki, sakey ed kawanan to tan sakey ed kawigi, tan sikatoy walad pegley.
19 Nansulat si Pilato na sakey a pakabat tan inyan to ed panamairapan a kiew. Say akasulat: “Jesus a Nazareno say Ari na saray Judio.”
20 Kanian abasa iya na dakel ed saray Judio, lapud asingger ed syudad so pasen ya inkipasakan nen Jesus; tan nisulat itan ed Hebreo, Latin, tan Griego.
21 Balet, imbaga na saray manunan saserdote ed si Pilato: “Agmo isusulat so ‘Say Ari na saray Judio,’ noagta samay imbaga ton, ‘Siak so Ari na saray Judio.’”
22 Inmebat si Pilato: “No antoy insulat ko, insulat ko.”
23 Natan sanen si Jesus et nipasak la na saray sundalo, inala ray ilalatop ton kawes tan impankapat da, a kakapat so betang na kada sundalo. Inala ra met so lalatopan a kawes to. Balet anggapoy nansaipan na sayan lalatopan a kawes, ya inabel manlapud tagey anggad saloy.
24 Kanian inkuan da ed balang sakey: “Agtayo iya pipilaten, noagta manpapalaranan* itayo no siopa so makala ed saya.” Saya et pian nasumpal so kasulatan: “Nanaapagan da iray ilalatop kon kawes, tan nampapalaranan da so akasulong ed siak.” Kanian oniay peteg a ginawa na saray sundalo.
25 Balet, diad asingger ed panamairapan a kiew nen Jesus et akaalagey so ina to tan say agin bii nen ina to; si Maria ya asawa nen Clopas, tan si Maria Magdalena.
26 Kanian sanen anengneng nen Jesus so ina to tan say papablien ton disipulo ya akaalagey diman, inkuan to ed ina to: “Nia! Say anak mo!”
27 Insan inkuan to ed disipulo: “Nia! Say inam!” Tan manlapud saman ya oras, say ina to et inawit na disipulo diad dilin ayaman to.
28 Kayari na saya, sanen atebek nen Jesus ya agawa la ed saman so amin a bengatla, ta pian nasumpal so kasulatan, inkuan to: “Makakainum ak.”
29 Walay sakey a buyog diman a napnoy anakseng ya alak. Kanian angala ray espongha ya intalem ed anakseng ya alak tan inyan da ed sanga na hisopo* tan indelnet da itan ed sungot to.
30 Natan, sanen atawayan nen Jesus so anakseng ya alak, inkuan to: “Asumpal la!” tan sanen intuek toy ulo to, inyawat to lay espiritu to.
31 Lapud agew na Panagparaan ed saman, tan agnayarin mansiansia iray bangkay diad saray panamairapan a kiew leleg na Sabaton, (ta say agew na Sabaton et baleg ya agew,) kinerew na saray Judio ed si Pilato a puteren iray bikking da tan ekalen iray bangkay.
32 Kanian linma iray sundalo, tan pinuter da iray bikking na samay unaan a laki tan samay sakey nin laki a nipasak a kaiba nen Jesus.
33 Balet sanen isublay da lay Jesus, anengneng dan inatey la kanian agda la pinuter iray bikking to.
34 Ingen ta dinuyok na sakey ed saray sundalo so diking to diad panamegley na gayang, tan pinmaway a tampol so dala tan danum.
35 Tan samay akanengneng ed saya so nantasi, tan tua so pantasi to, tan amta na saman a too a tua iray imbaga to, ta pian manisia kayo met.
36 Diad tua, agawa irayan bengatla ta pian nasumpal so kasulatan: “Anggapoy anggan sakey a pukel to a naputer.”
37 Tan, inkuan met na sakey nin kasulatan: “Onnengneng ira ed samay Sakey a dinuyok da.”
38 Kayari na sarayan bengatla, kinerew nen Jose a taga Arimatea ed si Pilato so bangkay nen Jesus. Sikatoy sakey a disipulo nen Jesus, balet ta agto imbaga iya ed arum lapud takot to ed saray Judio. Lapud inabuloyan nen Pilato, sikatoy linman angala ed bangkay nen Jesus.
39 Ontan met, si Nicodemo, a linma ed sikato ya aminsan diad labi, et angawit na pinunggos a mira* tan saray aloe,* a ngalngali sanlasus a libra.
40 Kanian inala ra so bangkay nen Jesus tan binalkot da na saray abel a walaan na saray pabalingit, unong ed akaugalian na saray Judio a panangiparaan ed ponpon.
41 Nibanbana, diad pasen na inkipasakan to et walay sakey a hardin, tan ditan et walay sakey a balon pakanodnonotan a lubok, ya anggapo nin balot so niponpon ditan.
42 Kanian diad sayan pakanodnonotan a lubok so angiparukolan da ed si Jesus ta asingger labat itan, nisengeg ed agew na panagparaan na saray Judio.
