Juan 21:1-25
21 Kayari na sarayan bengatla et nampanengneng lamet si Jesus ed saray disipulo diad dayat na Tiberias; balet sikatoy nampanengneng ed onian paraan.
2 Mankakaiba ed saman si Simon Pedro tan si Tomas, a tatawagen a Say Lason, tan si Natanael a taga Cana na Galilea tan saray anak nen Zebedeo tan say duara nin disipulo to.
3 Inkuan nen Simon Pedro ed sikara: “Onla ak a mansigay.” Inkuan da ed sikato: “Mila kami met ed sika.” Kanian linma ra tan linmugan ira ed baloto, balet diad saman a labi et anggapoy nala ra.
4 Balet, sanen onkakabuasan la, inmalagey si Jesus ed gilig na dayat, ingen ta ag-abidbir na saray disipulo a si Jesus iman.
5 Diad saman et inkuan nen Jesus ed sikara: “Ananak, walay naakan yo?” Inmebat ira, “Anggapo!”
6 Inkuan to ed sikara: “Ipelag yo so iket ed bandad kawanan na baloto tan walay naala yo.” Tan impelag da itan, balet agda la naguyor lapud karakel na sira.
7 Kanian samay disipulo ya inar-aro nen Jesus so angikuan ed si Pedro: “Say Katawan iman!” Sanen nadngel nen Simon Pedro a say Katawan iman, insulong toy kawes to, ta sikatoy akalakseb, insan tinmaboy ed dayat.
8 Balet dinmago iray arum a disipulo ya akalugan ed melag a baloto, lapud ag-ira arawi ed gilig, a ngalngali siamaplon metro labat, tan ingguyor da so iket a walaan na saray sira.
9 Balet, sanen akasakbit la ra, anengneng da a walaray sira ya ikakalot tan wala met so tinapay.
10 Inkuan nen Jesus ed sikara: “Mangawit kayo dia na pigaran sira a kapkapangerel yo.”
11 Kanian sinmapat si Simon Pedro ed baloto tan ingguyor to ed gilig so iket a napno na angkakabaleg a sira, a sanlasus tan limamplo tan talo iratan. Balet ag-apilat so iket anggano dakdakel iratan.
12 Inkuan nen Jesus ed sikara: “Gali dia, mangalmusal kayo.” Anggapo ed saray disipulo so nampakpel a mantepet ed sikato: “Siopa ka?” lapud amta ra a sikato so Katawan.
13 Inmasingger si Jesus tan angala na tinapay tan inter to itan ed sikara, pati say sira.
14 Saya so mikatlo lan pankanawnawa a nampanengneng si Jesus ed saray disipulo kayari na inkioli to manlapud inaatey.
15 Natan, sanen akapan-almusal la ra, inkuan nen Jesus ed si Simon Pedro: “Simon ya anak nen Juan, kasin mas inarom ak nen saraya?” Inkuan to ed sikato: “On, Katawan, amtam a papablien ta ka.” Inkuan to ed sikato: “Pakan mo iray korderok.”
16 Inkuan to lamet ed sikato, diad mikaduan pankanawnawa: “Simon ya anak nen Juan, kasin inarom ak?” Inkuan to ed sikato: “On, Katawan, amtam a papablien ta ka.” Inkuan to ed sikato: “Pastolan mo iray angkekelag a karnerok.”
17 Inkuan to ed sikato ed mikatlon pankanawnawa: “Simon ya anak nen Juan, kasin papablien mo ak?” Naermenan si Pedro ta mikatlo lan imbaga to ed sikaton: “Kasin papablien mo ak?” Kanian inkuan to ed sikato: “Katawan, amtam so amin a bengatla; amtam a papablien ta ka.” Inkuan nen Jesus ed sikato: “Pakan mo iray angkekelag a karnerok.
18 Tua kuan ko ed sika, Sanen malangwer ka ni, babalkesan moy inkasika tan onaakar ka ed inerman a labay mo. Balet sano ontatken ka la, iyunat mo iray limam tan balkesan ka na sananey a too tan awiten to ka ed pasen ya agmo labay.”
19 Imbaga to iya pian ipaamta to no anton klase na ipapatey so nagawa ed si Pedro pian nigloria toy Dios. Kanian, sanen nibaga to la iya, inkuan to ed sikato: “Mantultuloy kan ontumbok ed siak.”
20 Sanen linmingaw si Pedro, anengneng ton ontutumbok imay disipulo ya inar-aro nen Jesus, samay sinmaral ed pagew to sanen manpapangdem ira tan angikuan: “Katawan, siopay mangiyawat ed sika?”
21 Kanian, sanen sikatoy anengneng nen Pedro, inkuan to ed si Jesus: “Katawan, antoy gawaen na sayan too?”
22 Inkuan nen Jesus ed sikato: “No linawak a sikatoy mansiansia anggad isabik, akin et pampagaan mo itan? Mantultuloy kan ontumbok ed siak.”
23 Lapud saya et kinmayat so salita diad limog na saray agagi a sayan disipulo et ag-ompatey. Balet aliwan ontan so imbaga ed sikato nen Jesus, noagta: “No linawak a sikatoy mansiansia anggad isabik, akin et pampagaan mo itan?”
24 Sayan disipulo et tatasian to irayan bengatla tan insulat to iraya, tan amta tayo a tua so pantatasi to.
25 Diad tua et amayamay met niray ginawa nen Jesus, a no isulat ya ami-amin so detalye na saratan, ompano agnakarga na mundo iray lukot a pansulatan.
