Juan 17:1-26
17 Sarayan bengatla so imbaga nen Jesus, tan tinmangay ed tawen, ya inkuan to: “Ama, sinmabi lay oras; igloriam so anak mo, ta pian sikay igloria na anak mo,
2 lapud inter mo ed sikato so pakauley ed amin a totoo, ta pian amin iramay inter mo ed sikato et ikdan toy bilay ya andi-anggaan.
3 Saya so mankabaliksan na bilay ya andi-anggaan, a kabaten* da ka, say saksakey a tuan Dios, tan samay imbakim, si Jesu-Kristo.
4 Inggloria ta ka diad dalin, a sinumpal koy kimey ya impagawam ed siak.
5 Kanian natan, Ama, igloriam ak ed abay mo a singa ed samay gloria a walad siak sanen wala ak ed abay mo antis na mundo.
6 “Imparungtal koy ngaran mo ed saray totoon inter mo ed siak manlapud mundo. Kayarian mo ra, tan inter mo ra ed siak, tan inunor day salitam.
7 Naamtaan da la natan a nanlapud sika so amin a bengatlan inter mo ed siak;
8 lapud inter ko ed sikara iray salitan inter mo ed siak, tan inawat da iratan tan naamtaan da a linma ak dia a mangirepresenta ed sika, tan anisia ra ya imbaki mo ak.
9 Onkerew ak parad sikara; onkerew ak, aliwan parad mundo, noagta parad saramay inter mo ed siak, lapud kayarian mo ra,
10 tan amin a kayarian ko et kayarian mo tan saray kayarian mo et kayarian ko, tan iglogloria da ak.
11 “Ontan met, ontaynan ak la ed sayan mundo, balet wadia ra ed sayan mundo tan onla ak la ed sika. Masanton Ama, bantayan mo ra nisengeg ed ngaran mo ya inter mo ed siak,* ta pian magmaliw iran saksakey a singa sikata.
12 Sanen kaibak ira, babantayan ko ra nisengeg ed ngaran mo ya inter mo ed siak, tan inasikasok ira, tan anggapoy aderal ed sikara nilikud ed samay anak na kadederal, ta pian nasumpal so kasulatan.
13 Balet natan et onla ak ed sika, tan ibabagak iraya legan a wala ak ni ed mundo ta pian nalikna ran maong so liket a naliliknak.
14 Inter ko ed sikara so salitam, balet binusol ira na mundo, lapud ag-ira kabiangan na mundo, a singa siak ya agkabiangan na mundo.
15 “Kerewen ko ed sika, ya agmo ra eekalen ed mundo, noagta bantayan mo ra lapud samay sakey a mauges.
16 Ag-ira kabiangan na mundo, a singa siak ya agkabiangan na mundo.
17 Pasantom ira diad panamegley na katuaan; say salitam et katuaan.
18 No panon a siak so imbakim ed mundo, imbakik met ira diad mundo.
19 Tan papasantoen koy inkasiak nisengeg ed sikara, ta pian napasanto met ira diad panamegley na katuaan.
20 “Onkerew ak, aliwa labat a parad sikara, noagta parad saramay manisia met ed siak diad panamegley na salita ra;
21 ta pian amin da et magmaliw a saksakey, a singa sika, Ama, ya akikasakey ed siak tan akikasakey ak ed sika, ta pian mikasakey met ira ed sikata, tan say mundo et manisia a siak so imbakim.
22 Ontan met, inter ko ed sikara so gloria ya inter mo ed siak, ta pian magmaliw iran saksakey a singa sikata et saksakey.
23 Akikasakey ak ed sikara tan akikasakey ka ed siak, ta pian magmaliw iran peteg a nankakasakey, tan nakabatan na mundo a siak so imbakim tan inarom ira a singa impangarom ed siak.
24 Ama, nipaakar ed saramay inter mo ed siak, komon ta wadman met iran kaibak ed kawalaan ko, ta pian nanengneng da so gloria ya inter mo ed siak, lapud inarom ak antis nin niletneg* so mundo.
25 Matunong ya Ama, agkabat na mundo no siopa ka; balet kabat ta ka, tan naamtaan na saray disipulo a siak so imbakim.
26 Tan impakabat ko ed sikara so ngaran mo tan ipakabat ko itan, ta pian nipatnag da met so aro ya impatnag mo ed siak tan mikasakey ak ed sikara.”
