Juan 14:1-31
14 “Agyo aabuloyan a nagonigon so kapusoan yo. Ipatnag yo so pananisia ed Dios, ipatnag yo met so pananisia ed siak.
2 Diad abung nen Amak et dakel so napanayaman. Ta no andi et imbagak la komon ed sikayo, lapud onla ak a mangiparaan na sakey a pasen parad sikayo.
3 Ontan met, no onla ak lan mangiparaan na sakey a pasen parad sikayo, ompawil ak tan awiten ta kayo ed ayaman ko, ta pian no iner so kawalaan ko et wadman kayo met.
4 Tan diman ed laen ko et amta yo so dalan.”
5 Inkuan nen Tomas ed sikato: “Katawan, agmi amta no iner so laen mo. Panon min amta so dalan?”
6 Inkuan nen Jesus ed sikato: “Siak so dalan tan say katuaan tan say bilay. Anggapo so makasabi ed Ama no aliwan diad panamegley ko.
7 No kabat yo ak, nakabat yo met so Amak; manlapud natan et sikato lay kabat yo tan anengneng yo.”
8 Inkuan nen Felipe ed sikato: “Katawan, ipanengneng mo ed sikami so Ama, tan magenap la itan ed sikami.”
9 Inkuan nen Jesus ed sikato: “Abaybayag ta kayo lan kaiba, balet ta agmo ak ni kabat, Felipe? Samay akanengneng ed siak et anengneng to met lay Ama. Akin et ibabagam ya, ‘Ipanengneng mo ed sikami so Ama’?
10 Agmo ta panisiaan ya akikasakey ak ed Ama tan say Ama et akikasakey ed siak? Saray ibabagak ed sikayo et agko sasalitaen unong ed dilin kanonotan ko; noagta say Ama ya akikasakey ed siak et gagawaen to iray kimey to.
11 Panisiaan yo ak ya akikasakey ak ed Ama tan say Ama et akikasakey ed siak; no andi, manisia kayo ed saray kimey a ginawak.
12 Tua kuan ko ed sikayo, Samay mangipapatnag na pananisia ed siak et gawaen to met iray kimey a gagawaen ko; tan gawaen to iray kimey a babaleg nen saraya, lapud onla ak la ed Ama.
13 Ontan met, antokaman so kerewen yo diad ngaran ko, saya so gawaen ko, ta pian nigloria so Ama diad panamegley na Anak.
14 No onkerew kayo na antokaman diad ngaran ko, gawaen ko itan.
15 “No inaro yo ak, unoren yo iray ganggan ko;
16 tan onkerew ak ed Ama tan ikdan to kayo na sakey nin mananulong* a nakaiba yo ed andi-anggaan,
17 say espiritu na katuaan, ya agnayarin awaten na mundo, lapud agto itan nanenengneng tan agto kabat. Kabat yo itan, lapud mansiasiansia itan ed sikayo tan walad sikayo.
18 Agta kayo taynanan a manbukbukor.* Laen ta kayo.
19 Agla manbayag et agak la nanengneng na mundo, balet nanengneng yo ak, lapud mabilay ak tan sikayoy manbilay.
20 Diad satan ya agew et naamtaan yo ya akikasakey ak ed Amak tan akikasakey kayo ed siak tan akikasakey ak ed sikayo.
21 Samay mangaawat ed saray ganggan ko tan manguunor ed saratan, sikato so mangaaro ed siak. Tan samay mangaaro ed siak et aroen nen Amak, tan sikatoy aroen ko tan iparungtal koy inkasiak ed sikato.”
22 Et inkuan ed sikato nen Judas (aliwan Iscariote): “Katawan, antoy agawa, a diad sikami so labay mon pangiparungtalan na inkasika, aliwan diad mundo?”
23 Inmebat si Jesus ed sikato: “Siopaman a mangaaro ed siak, unoren toy salitak, tan sikatoy aroen na Amak, tan onla kami ed sikato tan manayam kami a kaiba to.
24 Samay agmangaaro ed siak et agto uunoren iray salitak; tan say salita a narerengel yo et agko kayarian, noagta kien na Ama ya angibaki ed siak.
25 “Imbagak la iraya ed sikayo legan a kaiba yo ak ni.
26 Balet say mananulong,* say masanton espiritu, ya ibaki na Ama diad ngaran ko, so mangibangat ed sikayo na amin a bengatla tan mangipanonot ed sikayo ed amin ya imbagak ed sikayo.
27 Itilak ko ed sikayo so deen, iter ko ed sikayo so deen ko. Agko itan iter ed sikayo a singa ed pangiiter na mundo ed satan. Agyo aabuloyan a nagonigon odino ontakot so kapusoan yo.
28 Nadngel yo ya imbagak ed sikayon, Onla ak la tan ompawil ak ed sikayo. No inaro yo ak, manliket kayo ta onla ak ed Ama, lapud say Ama et babaleg nen say siak.
29 Kanian natan et imbagak la ed sikayo sakbay a nagawa itan, ta pian sano nagawa la itan et manisia kayo.
30 Agko la dukeyan so pansalitak ed sikayo, ta onsasabi lay manuley na mundo. Tan anggapoy pakayari to ed siak,
31 balet, ta pian naamtaan na mundo ya inarok so Ama, gagawaen ko so ingganggan ed siak na Ama. Alagey kayo, ontaynan ti’la dia.
