Juan 10:1-42
10 “Tua kuan ko ed sikayo, Samay onloob ed pukokan na saray karnero ya ag-ondalan ed puerta balet ta onkalab ed sananey a pasen, sikatoy sakey a matakew tan tulisan.
2 Balet samay onloob diad puerta, sikatoy managpastol na saray karnero.
3 Sikatoy lukasan na managbantay na puerta, tan dengelen na saray karnero so boses to, tan tawagen to ed ngaran iray dilin karnero to tan ipaway to ra.
4 Sano nipaway to lay amin a karnero to, sikatoy onla ed unaan da, tan ontumbok ira ed sikato lapud kabat day boses to.
5 Agda tumboken so sakey a sangkaili noagta ibatikan da, lapud agda kabat so boses na saray sangkaili.”
6 Imbaga nen Jesus ed sikara iyan panangikompara; balet agda atalosan so kabaliksan na saray imbaga to ed sikara.
7 Kanian inkuan lamet nen Jesus: “Tua kuan ko ed sikayo, Siak so puerta parad saray karnero.
8 Amin iramay sinmabin mankuankuanan a siak, sikaray matakew tan tulisan; balet agdinmengel ed sikara iray karnero.
9 Siak so puerta; nilaban so siopaman ya onloob ed panamegley ko, tan sikatoy onloob tan ompaway tan makaromog na panagpastolan.
10 Say matakew et onsabi labat pian mantakew tan mamatey tan manderal ed saray karnero. Linma ak dia pian nawalaan ira na bilay, salanti, andukey a bilay.
11 Siak so maong a managpastol; say maong a managpastol et iter toy kamarerwa to parad saray karnero.
12 Say toon uupaan et taynanan tan ibatikan to iray karnero sano nanengneng ton onsasabi so lobo, ta sikatoy aliwan managpastol tan agto kayarian iratan, tan saratan so sibaren na lobo tan nabuybuyak ira.
13 Oniay gawaen to lapud sikatoy toon uupaan tan agto iyaansakit iray karnero.
14 Siak so maong a managpastol, tan kabat ko iray karnerok tan saray karnerok et kabat da ak,
15 a singa say Ama et kabat to ak tan kabat koy Ama; tan iter koy kamarerwak parad saray karnero.
16 “Tan wala niray arum a karnerok, ya anggapo ed sayan pulok; nepeg ya awiten ko met ira, tan dengelen day boses ko, tan magmaliw iran sakey a pulok, a walay sakey a managpastol da.
17 Saya so makasengeg ya aaroen ak na Ama, lapud iter ko so kamarerwak, pian awaten ko lamet itan.
18 Anggapo so toon mangala na satan ed siak, noagta iter ko itan unong ed panlabayan kon dili. Walay pakauley ko ya iter itan, tan walay pakauley ko ya awaten lamet itan. Inawat ko ed Amak so ganggan nipaakar ed saya.”
19 Lapud sarayan salita, naapag lamet iray Judio.
20 Dakel ed sikara so mangibabaga: “Sikatoy aselepan na demonyo tan natatapis la. Akin et ondedengel kayo ed sikato?”
21 Ibabaga na arum: “Aliwan onia so panagsalita na toon aselepan na demonyo. Nayarian kasi na demonyo a lukasan iray mata na bulag a totoo?”
22 Diad saman et agawa ed Jerusalem so piesta na panangidedika.* Ambetel so panaon ed saman,
23 tan si Jesus et manaakar ed templo diad naatepan a dadalanan* nen Solomon.
24 Kanian sikatoy pinaliberan na saray Judio tan inkuan da ed sikato: “Anggad kapigan a panduaruwaen mo iray kamarerwa mi? No sika so Kristo, ibagam la ed sikami.”
25 Inmebat si Jesus ed sikara: “Imbagak la ed sikayo, ingen ta agkayo manisia. Saray kimey a gagawaen ko ed ngaran na Amak, saraya so mantatasi ed siak.
26 Balet agkayo manisia, lapud agta kayo karnero.
27 Saray karnerok et ondedengel ed boses ko, tan kabat ko ra, tan tutumboken da ak.
28 Tan ikdan ko ra na bilay ya andi-anggaan, tan ag-iran balot naderal, tan anggapoy manamsam ed sikara ed limak.
29 Say inter ed siak nen Amak et babaleg nen say arum niran bengatla, tan anggapoy makasamsam ed sikara ed lima na Ama.
30 Siak tan say Ama et saksakey.”
31 Saray Judio et anokdok lamet na saray bato pian sikatoy tupaken da.
32 Et inkuan nen Jesus ed sikara: “Dakel iray maabig a gawa manlapud Ama ya impanengneng ko ed sikayo. Dinan ed saratan a gawa so sengegay panupakan yo ed siak?”
33 Inmebat iray Judio ed sikato: “Tupaken mi ka, aliwan lapud maabig a gawa, noag lapud mansasalita ka na ayew,* ta sakey kan too balet gagawaen mon dios so inkasika.”
34 Inmebat si Jesus ed sikara: “Agta nisulat ed Ganggan yo, ‘Inkuan ko: “Dirios kayo”’?
35 No tinawag ton “dirios” iramay inukom na salitay Dios, ingen ta agnayarin sumlangen so Kasulatan,
36 ibaga yo kasi ed siak a pinasanto tan imbaki na Ama diad mundo, ‘Mansasalita ka na ayew,’ lapud inkuan kon, Siak so Anak na Dios?
37 No agko gagawaen iray kimey nen Amak, agyo ak papanisiaan.
38 Balet no gagawaen ko iratan, panisiaan yo iray gagawaen ko, anggano agyo ak panisiaan, ta pian naamtaan yo tan mantultuloy yon naamtaan a say Ama et akikasakey ed siak tan akikasakey ak ed Ama.”
39 Kanian sikatoy sinali da lamet ya erelen; balet naarawian to ra.
40 Et sikatoy linma lamet ed nibaliw na Jordan, diad pambabautismoan nen Juan ed gapo, tan sikatoy nansiansia diman.
41 Tan dinmago ed sikato so dakel a totoo, tan inkuan da: “Diad tua et anggapoy anggan sakey a tanda a ginawa nen Juan, balet anggan panon karakel so imbaga nen Juan nipaakar ed sayan too, saratan ya amin et tua.”
42 Et dakel diman so anisia ed sikato.
