Juan 18:1-40
18 Kayarin imbaga nen Jesus irayan bengatla, sikato tan saray disipulo to so linma ed sakey a hardin, a walad biek na kulos na Kidron.
2 Sayan pasen et amta met nen Judas, a mangiyawat ed sikato, ta dia so mabetbet a pambabanaan di Jesus tan saray disipulo to.
3 Kanian intagar nen Judas so ulop na saray sundalo tan saray opisyal na saray manunan saserdote tan saray Fariseo tan linma ra ditan a walaray awit dan silew tan lamparaan tan armas.
4 Lapud amta nen Jesus so amin a bengatlan nagawa ed sikato, sikatoy pinmaway tan inkuan to ed sikara: “Siopay aanapen yo?”
5 Inmebat ira: “Si Jesus a Nazareno.” Inkuan to ed sikara: “Siak ’man.” Si Judas a mangiyawat ed sikato et wadman met a kaiba ra.
6 Balet sanen imbaga to ed sikaran: “Siak ’man,” sinmener ira tan atumba ra.
7 Kanian tinepetan to ra lamet: “Siopay aanapen yo?” Inkuan da: “Si Jesus a Nazareno.”
8 Inmebat si Jesus: “Imbagak la ed sikayo a siak iman. No siak sirin so aanapen yo, paulyan yo iraya”;
9 ta pian nasumpal so salita ya imbaga ton: “Diad saramay inter mo ed siak et anggapoy anggan sakey ya abalang ko.”
10 Et inuyos nen Simon Pedro so espadan walad sikato, tan sinigbat toy aripen na atagey a saserdote tan atapyas so kawanan a layag to. Say ngaran na aripen et Malco.
11 Balet, inkuan nen Jesus ed si Pedro: “Ikaluban mo itay espada. Agta kaukolan kon inumen so kopa ya inter na Ama ed siak?”
12 Diad saman et si Jesus so inerel tan binalor na ulop na saray sundalo tan komandante na militar tan saray opisyal na saray Judio,
13 tan sikatoy inyakar dan unona ed si Anas, say katulangan a laki nen Caifas ya atagey a saserdote ed saman a taon.
14 Diad tua, si Caifas imay animbawa ed saray Judio a pakagunggonaan da so ipatey na sakey a too nisengeg ed totoo.
15 Natan, si Simon Pedro tan say sakey nin disipulo so tinmumbok ed si Jesus. Satan a disipulo et kabkabat na atagey a saserdote, tan sikatoy linmoob a kaiba nen Jesus dia ed lolooban na abung na atagey a saserdote,
16 balet si Pedro et akaalagey ed paway na puerta. Kanian saman a disipulo, a kabkabat na atagey a saserdote, so pinmaway tan akitongtong ed managbantay na puerta tan pinaloob toy Pedro.
17 Say aripen a bii, a managbantay na puerta, so angikuan ed si Pedro: “Agta sakey ka met ed saray disipulo na sayan too?” Inkuan to: “Andi.”
18 Natan, akaalagey diman iray aripen tan saray opisyal, ya amarlang ira na apoy lapud ambetel ed saman, tan mandadangdang ira. Akaalagey met diman si Pedro a kaiba ran mandadangdang.
19 Diad saman et tinepetan na manunan saserdote si Jesus nipaakar ed saray disipulo to tan nipaakar ed ibabangat to.
20 Inmebat si Jesus: “Mansasalita ak ed arap na amin a totoo. Lanang ak a manbabangat diad sinagoga tan diad templo, a pandaragupan na amin a Judio; tan agak balot nansalita diad maamot.
21 Akin et tetepetan mo ak? Tepetan mo iramay akadngel ed sinalitak ed sikara. Nengneng mo! Amta ra no antoy imbagak.”
22 Kayarin imbaga nen Jesus irayan bengatla, sikatoy tinampal na sakey ed saray opisyal ya akaalagey diman tan inkuan to: “Ontan so kakaebat mo ed manunan saserdote?”
23 Inmebat si Jesus: “No walay imbagak ya aliwa, paneknekan mo itan; balet no duga, akin et tinampal mo ak?”
24 Diad saman et sikatoy abalor ya impaiyakar nen Anas ed si Caifas ya atagey a saserdote.
25 Natan et akaalagey si Simon Pedro a mandadangdang. Et inkuan da ed sikato: “Agta sakey ka met ed saray disipulo to?” Imburi to itan tan inkuan to: “Andi.”
26 Inkuan na sakey ed saray aripen na atagey a saserdote, a kanayon na samay toon tinapyas nen Pedro so layag to: “Agta sika imay anengneng kon kaiba to ed hardin?”
27 Balet, imburi lamet itan nen Pedro, tan tampol a kinmukaok so sakey a lalong.
28 Insan manlapud si Caifas, inyakar day Jesus diad palasyo na gobernador. Kabkabuasan ed saman. Balet ag-ira linmoob ed palasyo na gobernador, ta pian ag-ira nadutakan tan makapangan ira ed paskua.
29 Kanian pinmaway si Pilato tan inkuan to ed sikara: “Anto so iyaakusa yo ed sayan too?”
30 Inmebat ira ed sikato: “No sayan too et agmanggagawa na mauges, agmi komon iyawat ed sika.”
31 Kanian inkuan nen Pilato ed sikara: “Ala yo la tan ukom yo unong ed ganggan yo.” Inkuan na saray Judio: “Sebel ed sikami so mamatey na anggan siopa.”
32 Agawa iya pian nasumpal imay sinalita nen Jesus nipaakar ed no panon so ipatey to.
33 Kanian linmoob lamet si Pilato diad palasyo na gobernador tan tinawag toy Jesus tan tinepetan to: “Sika so ari na saray Judio?”
34 Inmebat si Jesus: “Kasin imbagam itan lapud ontan so nononoten mo nipaakar ed siak, odino walay arum ya angibaga ed sika?”
35 Inmebat si Pilato: “Agta aliwa ak a Judio? Sikay inyawat ed siak na mismon nasyon mo tan saray manunan saserdote. Antoy ginawam?”
36 Inmebat si Jesus: “Say panarian ko et agkabiangan na sayan mundo. No say panarian ko et kabiangan na sayan mundo, akilaban la komon iray lingkor ko ta pian agak niyawat ed saray Judio. Balet, say tua, say panarian ko et agmanlapu dia.”
37 Kanian inkuan nen Pilato ed sikato: “No ontan sirin, sakey kan ari?” Inmebat si Jesus: “Sikan mismo so mangibabaga a sakey ak ya ari. Lapud saya et nianak ak, tan lapud saya et linma ak dia ed mundo, ta pian tasian ko so katuaan. Ondedengel ed boses ko so balang sakey a walad dapag na katuaan.”
38 Inkuan nen Pilato ed sikato: “Anto so katuaan?”
Tan kayari ton imbaga iya, sikatoy pinmaway lamet ed saray Judio tan inkuan to ed sikara: “Anggapoy aromog kon kasalanan to.
39 Sakey ni, unong ed kustombre yo et kaukolan a mangibulos ak na sakey a too parad sikayo no paskua. Labay yon ibulos ko ed sikayo so ari na saray Judio?”
40 Diad saman et inmeyag ira lamet, a kuan da: “Aliwan sayan too, noagta si Barabas!” Si Barabas et sakey a matakew.
