Juan 7:53–8:59

53  Kanian sinmempet la so balang sakey ed ayaman to. 8  Balet linma si Jesus ed Palandey na saray Olibo.  Ingen, diad kabkabuasan et sikatoy nampanengneng lamet diad templo, tan dinmago ed sikato so amin a totoo, tan sikatoy yinmurong tan nambangat ed sikara.  Natan et inyakar na saray eskriba tan saray Fariseo so sakey a biin narel a mikakalugoran, tan kayari ran pinaalagey ed pegley da,  inkuan da ed sikato: “Managbangat, sayan bii et narel a mikakalugoran.  Unong ed Ganggan ya inter nen Moises ed sikami, saray ontan a bibii et nepeg a tupaken. Antoy nibagam ed saya?”  Ibabaga ra iya pian sikatoy suboken da, ta pian walay pangakusaan da ed sikato. Balet tinmuek si Jesus tan nansulat ed dalin ya inusar toy gamet to.  Sanen mapilit iran mantetepet ed sikato, sikatoy tinmangwa tan inkuan to ed sikara: “Samay anggapoy kasalanan ed sikayo so unona lan manupak ed sikato.”  Et sikatoy tinmuek lamet tan intuloy toy pansusulat to diad dalin.  Balet sansakey a pinmaway iramay akadngel ed saya, ya inmuna iray mamasiken, tan bukbukor to lay atilak tan samay biin walad pegley da. 10  Et tinmangwa si Jesus tan inkuan to ed bii: “Kawalaan da la? Anggapoy nandusa ed sika?” 11  Inkuan to: “Anggapo, katawan.” Et imbaga nen Jesus: “Agta ka met dusaen. La ka la. Manlapud natan, agka la manggagaway kasalanan.” 12  Kanian inkuan lamet nen Jesus ed sikara: “Siak so liwawa na mundo. Samay ontumbok ed siak et agbalot manakar ed kabilungetan, balet nakayarian to so liwawa na bilay.” 13  Kanian inkuan ed sikato na saray Fariseo: “Tatasian moy inkasika; aliwan tua so pantatasim.” 14  Et inmebat si Jesus ed sikara: “Anggano tatasian koy inkasiak, say pantatasik et tua, ta amtak no iner so nanlapuan ko tan laen ko. Balet sikayo et agyo amta no iner so nanlapuan ko tan laen ko. 15  Manguukom kayo a singa ed panguukom na totoo, balet siak et agko uukomen so siopaman a too. 16  Balet no siak so mangukom, say panangukom ko et matua, lapud agko bukbukor, noagta kaibak so Ama ya angibaki ed siak. 17  Ontan met, nisulat ed mismon Ganggan yo, ‘Say pantasi na duaran too et tua.’ 18  Tatasian koy inkasiak, tan tatasian ak met na Ama ya angibaki ed siak.” 19  Kanian inkuan da ed sikato: “Kawalaan na Amam?” Inmebat si Jesus: “Agyo ak kabat odino say Amak. No kabat yo ak, kabat yo met komon so Amak.” 20  Imbaga to iraya legan a sikatoy manbabangat diad templo, diad pasen a kawalaan na panangisimpenan na kayamanan. Balet anggapoy aningkat ed sikato, ta agni asabi so oras to. 21  Kanian inkuan to lamet ed sikara: “Onla ak la, tan anapen yo ak, balet ompatey kayo ed kasalanan yo. Diman ed laen ko et agkayo makakar.” 22  Kanian inkuan na saray Judio: “Manbikkel kasi? Lapud ibabaga ton, ‘Diman ed laen ko et agkayo makakar.’” 23  Et inkuan to ed sikara: “Nanlapu kayo ed saray pasen ed leksab; balet siak et nanlapu ak ed saray pasen ed tagey. Nanlapu kayo ed sayan mundo; balet siak et agak nanlapu ed sayan mundo. 24  Kanian imbagak ed sikayon, Ompatey kayo ed saray kasalanan yo. Ta no agyo panisiaan a siak iman, ompatey kayo ed saray kasalanan yo.” 25  Kanian inkuan da ed sikato: “Siopa ka?” Inkuan nen Jesus ed sikara: “Akin et mitotongtong ak ni ed sikayo? 26  Dakel so salitaen ko nipaakar ed sikayo tan dakel a bengatla so ukomen ko. Balet samay angibaki ed siak et tua, tan saray mismon nadngel ko ed sikato so sasalitaen ko ed mundo.” 27  Agda atalosan a say ibabaga to ed sikara et nipaakar ed Ama. 28  Kanian inkuan nen Jesus: “Sano niyatagey yo lay Anak na too, diad saman et nakabatan yo a siak iman, tan anggapoy antokaman a gagawaen ko a manlalapud siak a dili, noagta sasalitaen ko no anto iray imbangat ed siak na Ama. 29  Tan samay angibaki ed siak et kaibak. Agto ak pinaulyanan a bukor, ta gagawaen kon naynay iray makapaliket ed sikato.” 30  Legan ton ibabaga iraya, dakel so anisia ed sikato. 31  Diad ontan et inkuan nen Jesus ed saray Judio ya anisia ed sikato: “No mansiansia kayo ed salitak, peteg a sikayo iray disipulok, 32  tan naamtaan yo so katuaan, tan say katuaan so mangibulos ed sikayo.” 33  Inmebat ira ed sikato: “Ilalak kami nen Abraham tan agkamin balot nagmaliw ya aripen na siopaman. Akin et ibabagam ed sikamin, ‘Magmaliw kayon bulos’?” 34  Inmebat si Jesus ed sikara: “Tua kuan ko ed sikayo, Balang sakey a manggagawa na kasalanan et aripen na kasalanan. 35  Niarum ni, say aripen et agmansiansia ed sankaabungan ed andi-anggaan; balet say anak et mansiansia ed andi-anggaan. 36  Kanian no ibulos kayo na Anak, peteg a nibulos kayo. 37  Amtak a sikayoy ilalak nen Abraham, balet labay yo ak a pateyen, lapud agyo aawaten so bangat ko. 38  Sasalitaen ko iray bengatlan anengneng ko ed Amak, tan sikayo sirin et gagawaen yo iray bengatlan nadngel yo ed ama yo.” 39  Inmebat ira ed sikato: “Si Abraham so ama mi.” Inkuan nen Jesus ed sikara: “No ananak kayo nen Abraham, gawa yo iray kimey nen Abraham. 40  Balet natan et labay yo ak a pateyen, siak ya angibaga ed sikayo na katuaan a nadngel ko ed Dios. Ag-iya ginawa nen Abraham. 41  Gagawaen yo iray kimey nen ama yo.” Inkuan da ed sikato: “Agkami nianak ed pilalawanan;* walay sakey ya Ama mi, say Dios.” 42  Inkuan nen Jesus ed sikara: “No say Dios so Ama yo, aroen yo ak, ta nanlapu ak ed Dios tan wadia ak. Agak linma dia ed dilin panlabayan ko, noagta imbaki to ak. 43  Akin et agyo amta so sasalitaen ko? Lapud agyo nayarian a dengelen so salitak. 44  Nanlapu kayo ed ama yon Diablo, tan labay yon gawaen iray pilalek na ama yo. Sikatoy managpatey manlapu la ed gapo, tan agnansiansia ed katuaan, ta anggapo ed sikato so katuaan. Sano sikatoy mansalita na tila, sikatoy mansasalita unong ed dilin panlabayan to, ta sikatoy matila tan ama na tila. 45  Balet lapud ibabagak so katuaan, agyo ak panisiaan. 46  Siopa ed sikayo so makapaneknek a nankasalanan ak? No sasalitaen ko so katuaan, akin et agyo ak panisiaan? 47  Samay nanlapu ed Dios et ondedengel ed saray salita na Dios. Saya so makasengeg no akin ya agkayo ondedengel, ta sikayoy agnanlapu ed Dios.” 48  Inmebat ed sikato iray Judio: “Agta dugay imbaga min, Sakey kan Samaritano tan aselepan kay demonyo?” 49  Inmebat si Jesus: “Agak aselepay demonyo, noagta igagalang koy Amak, balet agyo ak igagalang. 50  Ingen ta agko aanapen so kigloriaan kon dili; walay Sakey a manaanap ed satan tan sikatoy manguukom. 51  Tua kuan ko ed sikayo, Siopaman a manguunor ed salitak, agton balot nanengneng so ipapatey.” 52  Inkuan na saray Judio ed sikato: “Natan et amta mi lan walaan kay demonyo. Anta inatey lay Abraham, ontan met iray propeta, ibabagam nin, ‘Siopaman a manguunor ed salitak, agton balot natawayan so ipapatey.’ 53  Kasin magmaong ka ni nen say ama min si Abraham ya inatey la? Sakey ni, inaatey la iray propeta. Antoy pangipapasen mo ed inkasika?” 54  Inmebat si Jesus: “No igloriak so inkasiak, anggapoy kakanaan na gloriak. Say Amak so mangiglogloria ed siak, samay ibabaga yon Dios yo, 55  ingen ta sikatoy agyo kabat. Balet sikatoy kabat ko. Tan no ibagak a sikatoy agko kabat, magmaliw ak a singa sikayo, a matitila. Balet sikatoy kabat ko tan uunoren koy salita to. 56  Say ama yon si Abraham et nanliketan ton maong so ilalon makanengneng ed agew ko, tan anengneng to itan tan nanliket.” 57  Kanian inkuan na saray Judio ed sikato: “Anta anggapo ni so limamplon taon mo, anengneng mo lay Abraham?” 58  Inkuan nen Jesus ed sikara: “Tua kuan ko ed sikayo, Anggapo ni Abraham, wala ak la.” 59  Kanian anokdok ira na saray bato pian itupak da ed sikato; balet inmamot si Jesus tan pinmaway ed templo.

Paimanod leksab

Jn 8:41 * Sayan salita so manutukoy ed amin a klase na agmanepeg a seksual a relasyon. Nengnengen so Apendise 4.