Juan 6:1-71
6 Kayari na sarayan bengatla, binmaliw si Jesus ed dayat na Galilea, odino Tiberias.
2 Balet naynay ya ontutumbok ed sikato so dakel a totoo, ta nanenengneng da iray milagron gagawaen to, a papaabigen to iramay mansasakit.
3 Kanian tinmatdang si Jesus ed sakey a palandey, tan yinmurong diman a kaiba iray disipulo to.
4 Natan et asingger lay paskua, say piesta na saray Judio.
5 Kanian sanen tinmangwa si Jesus tan naimano to ya ondadago ed sikato so dakel a totoo, inkuan to ed si Felipe: “Iner so panaliwan tayo na saray tinapay ya ipakan ed sikara?”
6 Balet, imbaga to iya pian suboken toy Felipe, ta amta to lan mismo no antoy gawaen to.
7 Inmebat si Felipe: “Kulang ed sikara so tinapay a mankantidad na duanlasus a denario,* anggano daiset labat so alaen na balang sakey.”
8 Sakey ed saray disipulo to, si Andres ya agi nen Simon Pedro, so angikuan ed sikato:
9 “Nia so melag ya ugaw a laki a walay awit ton limaran tinapay a sebada tan duaran angkelag a sira. Balet panon irayan onsusto ed dakdakel a totoo?”
10 Inkuan nen Jesus: “Payurong yo iray totoo a singa ra akarungo.” Ta marika ed saman a pasen. Kanian yinmurong iray totoo, a ngalngali limanlibo so lalaki.
11 Diad saman et inala nen Jesus iray tinapay, tan kayari ton akisalamat, imbunog to ed saramay akayurong, ontan met iray angkelag a sira anggan panon karakel so labay da.
12 Balet sanen napsel la ra, inkuan to ed saray disipulo to: “Tipon yo iray keran pisagpisag, ta pian anggapoy naperdi.”
13 Kanian tinipon da iratan, tan labinduan buksot so apano ra na saray pisagpisag manlapud limaran tinapay a sebada, a kera na saramay angan.
14 Et sanen anengneng na saray totoo iray tandan ginawa to, inkuan da: “Petepeteg a saya imay propeta ya onsabi ed mundo.”
15 Sirin, lapud atebek nen Jesus a sikatoy ngalngali da la piliten a gawaen ya ari ra, sikatoy tinmaynan lamet ya amaarap ed palandey a bukbukor to.
16 Sanen labi la, linmasur iray disipulo to diad dayat,
17 tan linmugan ira ed baloto, tan binmaliw ira ed dayat pian onla ra ed Capernaum. Ambilbilunget la ed saman tan agni linmay Jesus ed sikara.
18 Ontan met, say dayat et nagmaliw a madaluyon lapud makmaksil so dagem.
19 Balet, sanen akaarawi la ra na limara odino anemiran kilometro, anengneng day Jesus a manaakar ed tapew na dayat tan onaasingger ed baloto; et ataktakot ira.
20 Balet inkuan to ed sikara: “Siak iya; agkayo natatakot!”
21 Kanian sikaray maliket ya angilugan ed sikato diad baloto, tan agangganon akasabi so baloto diad pasen a labay dan laen.
22 Diad tinmumbok ya agew, saramay totoo a walad biek a gilig na dayat et anengneng dan saksakey a melag a baloto so wadman, tan si Jesus et agkaiba na saray disipulo ton linmugan ed baloto sanen inmalis ira;
23 balet walaray baloto a nanlapud Tiberias a sinmabi diad asingger ed anganan day tinapay kayarin akisalamat so Katawan.
24 Kanian sanen anengneng na saray totoo ya anggapo diman si Jesus odino saray disipulo to, linmugan ira ed saray melag a baloto ra tan linma ra ed Capernaum pian anapen day Jesus.
25 Sanen sikatoy aromog da ed biek na dayat, inkuan da ed sikato: “Rabbi, kapigan so insabim dia?”
26 Inmebat si Jesus ed sikara: “Tua kuan ko ed sikayo, Aanapen yo ak lapud angan kayo na saray tinapay tan napsel kayo, aliwan lapud akanengneng kayo na saray tanda.
27 Mankimey kayo, aliwan parad naderal a kakanen, noagta parad agnaderal a kakanen a mangiter na bilay ya andi-anggaan, ya iter ed sikayo na Anak na too; ta sikatoy tinatakan na Ama, say Dios a mismo, bilang panangabobon to.”
28 Kanian inkuan da ed sikato: “Anto so gawaen mi ta pian nagawaan mi iray kimey na Dios?”
29 Inmebat si Jesus ed sikara: “Saya so kimey na Dios, ya ipatnag yoy pananisia ed samay imbaki to.”
30 Kanian inkuan da ed sikato: “Anto sirin so tanda a gawaen mo, ta pian nanengneng mi itan tan manisia kami ed sika? Anton kimey so gawaen mo?
31 Saray inmunan atateng mi et angan na mana diad kalawakan, unong a nisulat, ‘Inikdan to ray tinapay manlapud tawen pian kanen da.’”
32 Kanian inkuan nen Jesus ed sikara: “Tua kuan ko ed sikayo, Ag-inter nen Moises ed sikayo so tinapay manlapud tawen, balet say Amak et mangiiter ed sikayo na tuan tinapay manlapud tawen.
33 Ta say tinapay na Dios et samay linmeksab manlapud tawen tan mangiiter na bilay ed mundo.”
34 Kanian inkuan da ed sikato: “Katawan, ikdan mo kamin naynay na sayan tinapay.”
35 Inkuan nen Jesus ed sikara: “Siak so tinapay na bilay. Samay ondadago ed siak et agla naerasan, tan samay mangipapanengneng na pananisia ed siak et aglan balot napegaan.
36 Balet imbagak la ed sikayo, Nanenengneng yo ak la balet agkayo ni manisia.
37 Ondago ed siak so amin ya iiter na Ama ed siak, tan agkon balot paarawien imay ondadago ed siak;
38 lapud linmeksab ak manlapud tawen pian gawaen ko so linawa na samay angibaki ed siak, aliwan say linawak.
39 Saya so linawa na samay angibaki ed siak, a nepeg ya anggapoy nabalang ko ed amin ya inter to ed siak noagta paolien ko ran amin diad kaunoran ya agew.
40 Ta saya so linawa nen Amak, a balang sakey a makakanengneng ed Anak tan mangipapatnag na pananisia ed sikato et nawalaan na bilay ya andi-anggaan, tan sikatoy paolien ko diad kaunoran ya agew.”
41 Diad saman et nannguronguro iray Judio ed sikato lapud imbaga to: “Siak so tinapay a linmeksab manlapud tawen”;
42 tan inkuan da: “Agta saya imay Jesus ya anak nen Jose, a kabat tayo so ama tan ina to? Akin et ibabaga to natan, ‘Linmeksab ak manlapud tawen’?”
43 Inmebat si Jesus ed sikara: “Agkayo la manngunguronguro.
44 Anggapoy makadago ed siak no sikatoy ag-iyasingger na Ama ya angibaki ed siak; tan sikatoy paolien ko diad kaunoran ya agew.
45 Oniay nabasa ed sulat na saray Propeta, ‘Et amin da so nabangatan nen Jehova.’ Balang sakey a dinmengel ed Ama tan akaaral et ondago ed siak.
46 Anggapo so too ya akanengneng ed Ama, nilikud ed samay nanlapud Dios; saya imay akanengneng ed Ama.
47 Tua kuan ko ed sikayo, Samay manisia et walaan na bilay ya andi-anggaan.
48 “Siak so tinapay na bilay.
49 Saray inmunan atateng yo et angan na mana diad kalawakan ingen ta inatey ira.
50 Balet siopaman a mangan ed tinapay a linmeksab manlapud tawen et ag-ompatey.
51 Siak so mabilay a tinapay a linmeksab manlapud tawen. Siopaman a mangan ed sayan tinapay, sikatoy manbilay ya andi-anggaan. Ta diad tua, say tinapay ya iter ko et say laman ko ta pian manbilay so katooan.”*
52 Kanian nansasangsangan iray Judio, a kuan da: “Panon a niiter na sayan too so laman to pian ipakan ed sikatayo?”
53 Diad saya et inkuan nen Jesus ed sikara: “Tua kuan ko ed sikayo, No agyo kanen so laman na Anak na too tan inumen so dala to, agkayo nawalaan na bilay.*
54 Samay mangan na laman ko tan oninum na dalak et walaan na bilay ya andi-anggaan, tan sikatoy paolien ko diad kaunoran ya agew;
55 ta say laman ko et tuan kakanen, tan say dalak et tuan iinumen.
56 Samay mangan na laman ko tan oninum na dalak et mansiansian mikasakey ed siak, tan mikasakey ak ed sikato.
57 No panon a say mabilay ya Ama et imbaki to ak tan manbibilay ak lapud Ama, saman met so mangan ed laman ko, sikato met so manbilay lapud siak.
58 Saya so tinapay a linmeksab manlapud tawen. Aliwa iyan singa samay inakan na saray inmunan atateng yo tan siansia nin inatey ira. Samay mangan ed sayan tinapay et manbilay ya andi-anggaan.”
59 Saraya so imbaga to sanen manbabangat diman ed pantitiponan na totoo diad Capernaum.
60 Kanian sanen nadngel iya na dakel ed saray disipulo to, inkuan da: “Makapabigla iyan imbaga to. Siopay makayarin ondengel ed satan?”
61 Balet lapud atebek nen Jesus a nguronguro iray disipulo to nipaakar ed saya, inkuan to ed sikara: “Abigla kayo ed saya?
62 Panon to no nanengneng yoy Anak na too ya onsesegep la ed datin kawalaan to?
63 Say espiritu et manangiter-bilay, balet say laman et anggapoy kakanaan. Saray salitan imbagak ed sikayo et nanlapud masanton espiritu tan mangiiter na bilay.
64 Balet agmanisia so arum ed sikayo.” Ta manlapud gapo et amta la nen Jesus no siopa iramay agmanisia tan no siopa imay mangiyawat ed sikato.
65 Kanian intuloy ton inkuan: “Saya so makasengeg no akin ya imbagak ed sikayon, Anggapo so makadago ed siak no sikatoy ag-inabuloyan na Ama.”
66 Lapud saya et dakel ed saray disipulo to so pinmawil ed saray binenegan da la tan agla ra akiulop ed sikato.
67 Kanian inkuan nen Jesus ed labindua: “Sikayo ey, labay yo met lay ontaynan?”
68 Inmebat si Simon Pedro ed sikato: “Katawan, siopa ni so laen mi? Walad sika iray salita a mangitonton ed bilay ya andi-anggaan,
69 tan anisia kami tan naamtaan mi a sika so Masanto na Dios.”
70 Inmebat si Jesus ed sikara: “Agta sikayon labindua so pinilik? Ingen say sakey ed sikayo et managpauges.”
71 Diad tua, say tutukoyen to et si Judas ya anak nen Simon ya Iscariote, ta saya so mangiyawat ed sikato, anggaman sakey ed saray labindua.
