Juan 20:1-31
20 Diad unonan agew na simba, si Maria Magdalena et asaksakbay a linma ed pakanodnonotan a lubok, legan ya ambilunget ni, tan anengneng to a nakal la so bato ed pakanodnonotan a lubok.
2 Kanian sikatoy binmatik tan linma ed si Simon Pedro tan ed samay sakey nin disipulo, a pinabpabli nen Jesus, tan inkuan to ed sikara: “Inala ra so Katawan diad pakanodnonotan a lubok, tan agmi amta no iner so anginan da ed sikato.”
3 Kanian si Pedro tan samay sakey nin disipulo et pinmaway tan linma ra ed pakanodnonotan a lubok.
4 On, binmatik iran dua, balet mas maples imay sakey a disipulo nen say si Pedro kanian akaunan sinmabi ed pakanodnonotan a lubok.
5 Tan sanen tinmakiling, anengneng ton akagaton iramay impanbalkot, balet sikatoy aglinmoob.
6 Insan sinmabi met si Simon Pedro a manumtumbok ed sikato, tan linmoob ed pakanodnonotan a lubok. Tan anengneng ton akagaton iramay impanbalkot,
7 balet samay abel ed ulo to et ag-akagaton ed abay na saramay impanbalkot noagta akabiig tan alukot diad sakey a pasen.
8 Kanian diad saman et linmoob met imay sakey a disipulo ya akaunan sinmabi ed pakanodnonotan a lubok, tan anengneng to tan anisia.
9 Ta agda ni atalosan ed saman so kasulatan a sikatoy nepeg ya onoli manlapud inaatey.
10 Kanian pinmawil la irayan disipulo ed saray ayaman da.
11 Balet, si Maria et nansiansian akaalagey ed paway, diad asingger ed pakanodnonotan a lubok, tan onaakis. Insan, legan ya onaakis, sikatoy tinmakiling pian onnengneng ed loob na pakanodnonotan a lubok
12 tan diad angiparukolan ed bangkay nen Jesus et anengneng to so duaran anghel ya akaamputi tan akayurong, say sakey et diad uloan tan say sakey et diad salian.
13 Tan inkuan da ed sikato: “Akin et onaakis ka?” Inkuan to ed sikara: “Inala ray Katawan ko, tan agko amta no iner so anginan da ed sikato.”
14 Kayari ton imbaga iratan, sikatoy linmingaw tan anengneng toy Jesus ya akaalagey, balet agto abidbir a si Jesus iman.
15 Inkuan nen Jesus ed sikato: “Akin et onaakis ka? Siopay aanapen mo?” Lapud abaloan to a saman imay hardinero, inkuan to ed sikato: “Katawan, no sikatoy inalam, ibagam ed siak no iner so anginan mo ed sikato, tan alaen ko.”
16 Inkuan nen Jesus ed sikato: “Maria!” Sanen ninengneng to et inkuan to ed sikato, diad Hebreo: “Rabboni!” (a mankabaliksay “Managbangat!”)
17 Inkuan nen Jesus ed sikato: “Agka ompepeket ed siak. Ta agak ni sinmegep ed Ama. Balet onla ka ed saray agagik tan ibagam ed sikaran, ‘Onsegep ak ed kawalaan nen Amak tan Ama yo tan Dios ko tan Dios yo.’”
18 Et linma si Maria Magdalena tan imbalita to ed saray disipulo: “Anengneng ko lay Katawan!” tan inkuan to ya imbaga nen Jesus iraya ed sikato.
19 Sanen mansirunget la ed saman ya agew, ya unonan agew na simba, linmoob si Jesus ed kawalaan na saray disipulo anggaman akatalak iray puerta ra lapud takot da ed saray Judio, tan inmalagey ed pegley da tan inkuan to ed sikara: “Niwala komon so kareenan ed sikayo.”
20 Tan kayari ton imbaga iya, impanengneng to ed sikara iray lima to tan say diking to. Diad saman et malikeliket iray disipulo sanen anengneng da so Katawan.
21 Kanian, imbaga lamet nen Jesus ed sikara: “Niwala komon so kareenan ed sikayo. No panon ya imbaki ak na Ama, ibaki ta kayo met.”
22 Tan kayari ton imbaga iya, sinibokan to ra tan inkuan to ed sikara: “Awat yo so masanton espiritu.
23 No perdonaen yo iray kasalanan na siopaman a totoo, mansiansia iratan ya aperdona; no agyo iratan perdonaen ed siopaman a totoo, mansiansia iratan ya ag-aperdona.”
24 Balet si Tomas, a sakey ed saray labindua tan tatawagen a Say Lason, so agda kaiba sanen sinmabi Jesus.
25 Kanian imbaga ed sikato na arum a disipulo: “Anengneng mi lay Katawan!” Balet inkuan to ed sikara: “Agak balot manisia no agko nanengneng so abot na saray pasak ed saray lima to tan nidiwit so gamet ko ed abot na saray pasak tan nidiwit ko so limak dia ed diking to.”
26 Et kayari na waloy agew, wala lamet ed loob na abung iray disipulo to tan kaiba ray Tomas. Linmoob si Jesus, anggaman akatalak iray puerta, tan inmalagey ed pegley da tan inkuan to: “Niwala komon so kareenan ed sikayo.”
27 Insan inkuan to ed si Tomas: “Iyan moy gamet mo dia, tan nengneng mo iray limak, tan idiwit mo itay limam ed diking ko, tan agka la manduaruwa noagta manisia ka la.”
28 Inmebat si Tomas ed sikato: “Katawan ko, Dios ko!”
29 Inkuan nen Jesus ed sikato: “Manisia ka la ta anengneng mo ak la? Maliket iramay ag-akanengneng ingen ta manisia ra.”
30 Diad tua et nanggawa met si Jesus na dakel nin tanda ed arap na saray disipulo, ya agla nisulat ed sayan lukot.
31 Balet nisulat iraya pian manisia kayo a si Jesus so Kristo ya Anak na Dios, tan lapud pananisia yo et nawalaan kayo na bilay diad panamegley na ngaran to.
