Juan 2:1-25
2 Natan diad komatlon agew et walay sakey a bansal ya agawa ed Cana na Galilea, tan wadman so ina nen Jesus.
2 Naimbitaan met ed bansal si Jesus tan saray disipulo to.
3 Sanen kinmulang so alak, inkuan na ina nen Jesus ed sikato: “Anggapo lay alak da.”
4 Balet inkuan nen Jesus ed ina to: “Antoy pibabalik ed satan? Agni sinmabi so oras ko.”
5 Inkuan na ina to ed saramay manseserbi: “Antokaman ya ibaga to ed sikayo, gawa yo.”
6 Et walay anemiran baton pasig diman unong a kakaukolanen na saray totontonen na saray Judio nipaakar ed panaglinis, a kada sakey et makakargay duara odino taloran sukat a danum.*
7 Inkuan nen Jesus ed sikara: “Pano yoy danum iray pasig.” Et pinano da iratan anggad sangab.
8 Tan inkuan to ed sikara: “Mangala kayo na daiset natan tan awit yo itan ed manangasikaso na ponsia.” Kanian inawit da itan.
9 Natan, sanen atawayan na manangasikaso na ponsia so danum a nagmaliw ya alak balet agto amtay nanlapuan na satan, anggaman amta itan na saramay manseserbi ya angala na danum, tinawag toy nobyo
10 tan inkuan to ed sikato: “Balang too et iserbi to nin unona so maong ya alak, tan sano abuek la ray totoo, say abeban klase. Balet sika et inyunor mo so maong ya alak.”
11 Ginawa iya nen Jesus diad Cana na Galilea bilang gapoan na saray tanda to, tan imparungtal to so gloria to; tan anisia ed sikato iray disipulo to.
12 Kayari na saya, sikato tan say ina to tan saray agagi to tan saray disipulo to so linmasur ed Capernaum, balet pigay agew da labat diman.
13 Natan et asingger lay paskua na saray Judio, tan tinmatdang si Jesus ed Jerusalem.
14 Tan asabian to ed templo iramay manlalako na saray baka tan saray karnero tan saray malapati tan saramay managsalat na kuarta ya akayurong.
15 Et kayari ton nanggaway panagsiplat iran lubir, pinapaway to ed templo iramay amin a walaan na saray karnero tan saray baka, tan inkakalbo to iray sinsilyo na saray managsalat na kuarta tan imbabalintuag to iray lamisaan da.
16 Tan inkuan to ed saramay manlalako na saray malapati: “Ekal yo dia irayan bengatla! Agyo la gagawaen a panaglakoan so abung nen Amak!”
17 Anonotan na saray disipulo to so nisulat: “Say seseg parad abung mo et agko napokpokan.”
18 Kanian inmebat iray Judio ed sikato: “Anton tanda so nipanengneng mo ed sikami, lapud gagawaen mo irayan bengatla?”
19 Et inmebat si Jesus ed sikara: “Igeba yo iyan templo, tan ipaalagey ko iya ed taloy agew.”
20 Kanian inkuan na saray Judio: “Sayan templo et impaalagey ed apataplo tan anem a taon, tan ipaalagey mo iya ed taloy agew?”
21 Balet say labay ton ibaga et say templo na laman to.
22 Kanian sanen apaoli si Jesus manlapud saray inaatey, anonotan na saray disipulo to a saya imay naynay ton ibabaga, tan anisia ira ed Kasulatan tan ed salitan imbaga to.
23 Balet, sanen sikatoy walad Jerusalem legan na piesta na paskua, dakel a totoo so anisia ed ngaran to, ya anengneng da iray tanda to a gagawaen to.
24 Ingen, ag-impiya nen Jesus ed sikara so inkasikato lapud kabkabat to iran amin
25 tan lapud agto la nakaukolan so siopaman a mangiter na paneknek nipaakar ed too, ta sikaton mismo et amta to la no anto so walad puso na too.
