Apocalipsis 4:1-11
4 Kayari na sarayan bengatla et anengneng ko, tan nia! sakey ya akalukas a puerta ed tawen, tan say unaan a boses a nadngel ko et singa tanol na trumpeta, a mitotongtong ed siak, a kuan to: “Segep ka dia, tan ipanengneng ko ed sika iray bengatlan nepeg a nagawa.”
2 Kayari na sarayan bengatla et tampol a niiyan ak ed pakayari na espiritu: tan nia! sakey a trono a walad tawen, tan walay akayurong ed satan a trono.
3 Tan say itsura na samay akayurong et singa sakey a baton jaspe tan sakey a mablin bato ya ambalanga,* tan akapaliber ed trono so sakey a bunlalakaw a singa esmeralda so itsura to.
4 Tan say trono et apaliberan na duamplo tan apat a trono, tan anengneng kon akayurong ed sarayan trono so duamplo tan apat a mamasiken ya akasulong na amputi iran latop a kawes, tan walaray balitok a korona diad ulo ra.
5 Tan manlapud trono et ompapaway iray kirmat tan boses tan karol; tan walay pitoran angkakabaleg a lamparaan a mandarlang ed arap na trono, tan say kabaliksan na saraya et pitoran espiritu na Dios.
6 Tan diad arap na trono et singano walay dayat a salming a singa kristal.
Tan diad pegley na trono tan diad paliber na satan et walay apatiran mabilay a pinalsa a napno na saray mata diad arap tan beneg.
7 Tan say unonan mabilay a pinalsa et singa leon, tan say komaduan mabilay a pinalsa et singa kilaw a baka, tan say komatlon mabilay a pinalsa et walaan na lupa a singa lupa na too, tan say komapat a mabilay a pinalsa et singa agila a mantiktikyab.
8 Tan kada sakey ed saray apatiran mabilay a pinalsa et walaan na anemiran payak; diad paliber tan diad dalem na saratan et napno na saray mata. Tan ag-ira ontutunda ed agew tan labi a mangibabagay: “Masanto, masanto, masanto si Jehova a Dios, say Makapanyarin-amin, a wala la nensaman tan wala natan tan onsabi la.”
9 Tan kapagno iglogloria tan igagalang tan pisasalamatan na saray mabilay a pinalsa imay Sakey ya akayurong ed trono, salanti, samay Sakey a mabilay lawas ed andi-anggaan,
10 say duamplo tan apat a mamasiken et ondadakmomo tan mandadayew ed samay Sakey ya akayurong ed trono tan mabilay lawas ed andi-anggaan, tan ibubuntok da iray korona ra diad arap na trono, ya ibabaga ran:
11 “Sika so makanepegan, Jehova a Dios mi, a mangawat na gloria tan galang tan pakayari, lapud sika so amalsa ed amin a bengatla, tan lapud linawam et niwala tan apalsa iratan.”
