Apocalipsis 10:1-11

10  Tan anengneng ko so sananey nin mabiskeg ya anghel ya onleleksab manlapud tawen, ya abalkot na lurem, tan walay bunlalakaw ed ulo to, tan say lupa to et singa agew, tan saray sali to et singara lusek ya apoy,  tan sankaegnaan toy melag a lukot ya alukasan. Tan say kawanan a sali to et walad dayat, balet say kawigin sali to et walad dalin,  tan sikatoy kinmelyaw ed maksil a boses a singa sakey a leon ya inmaglem. Tan sanen kinmelyaw, nansalita so pitoran karol diad boses dan dili.  Natan sanen nansalita so pitoran karol, mansulat ak la komon; balet nadngel koy sakey a boses manlapud tawen a kuan to: “Iyamot* mo iray bengatlan sinalita na pitoran karol, tan agmo iratan isusulat.”  Tan say anghel ya anengneng kon akaalagey diad dayat tan diad dalin et intagey toy kawanan a lima to diad tawen,  tan oniay  insamba to ed samay Sakey a mabilay lawas ed andi-anggaan, ya amalsa ed tawen tan saray bengatlan wadtan tan ed dalin tan saray bengatlan wadtan tan ed dayat tan saray bengatlan wadtan: “Agla nakaukolan so manalagar;  balet diad saray agew na pamaknol na komapiton anghel, sano paknolen to lay trumpeta to, peteg a nasumpal so sagradon sekreto na Dios unong ed maong a balita ya inyabawag to ed saray aripen ton propeta.”  Tan say boses a nadngel ko manlapud tawen et nansalita lamet ed siak, a kuan to: “La ka, alam so alukasan a lukot a walad lima na anghel ya akaalagey diad dayat tan diad dalin.”  Tan linma ak ed samay anghel tan imbagak ed sikato ya iter to ed siak so melag a lukot. Tan inkuan to ed siak: “Alam tan akan mo itan, tan paagasangen* na satan so eges mo, balet diad sangim et masamit itan a singa dilo.” 10  Tan inalak so melag a lukot ed lima na samay anghel tan inakan ko itan, tan diad sangik et masamit itan a singa dilo; balet sanen naakmon ko la, inmagasang so eges ko. 11  Tan inkuan da ed siak: “Nepeg a manpropesiya ka ni nipaakar ed saray rasa tan saray nasyon tan saray lenguahe tan dakel ya arari.”

Paimanod leksab

Apo 10:4 * Literal, “Tatakan.”
Apo 10:9 * Literal, “gawaen ton ampait.”