Apocalipsis 1:1-20

1  Say panangiparungtal* nen Jesu-Kristo, ya inter na Dios ed sikato, pian ipanengneng ed saray aripen to no anto iray magano lan nagawa. Tan imbaki toy anghel to tan diad panamegley na saray simbolo et imparungtal to itan ed aripen ton si Juan,  a nantasi nipaakar ed salita ya inter na Dios tan nipaakar ed impantasi nen Jesu-Kristo, salanti, nipaakar ed amin a bengatlan anengneng to.  Maliket imay manbabasan maksil tan saramay onderengel ed saray salita na sayan propesiya, tan samay manguunor ed saray nisulat ditan; ta asingger lay aturon panaon.  Siak, si Juan, so nansulat ed pitoran kongregasyon a walad distrito na Asia: Nawalaan kayo komon na agnaparaan a kaabigan tan deen a manlalapud “samay Sakey a wala natan tan wala la nensaman tan onsabi la,” tan manlalapud pitoran espiritu a walad arap na trono to,  tan manlalapud si Jesu-Kristo, “say Matoor a Tasi,” “Say panguloan manlapud saray inaatey,” tan “Say Manuley na saray arari ed dalin.” Diad sikato a mangaaro ed sikatayo tan angibulos ed sikatayo manlapud saray kasalanan tayo diad panamegley na dala ton dili—  tan ginawa to itayon sakey a panarian, tan saserdote na Dios tan Ama to—on, niiter komon ed sikato so gloria tan biskeg ed andi-anggaan. Amen.  Nia! Sikatoy onsabi a walad saray lurem, tan sikatoy nanengneng na amin a mata tan saramay nanduyok ed sikato; tan say amin a tribu ed dalin et tapoktapoken da iray pagew da lapud ermen nisengeg ed sikato. On, Amen.  “Siak so Alfa tan say Omega,”* kuan nen Jehova a Dios, “samay Sakey a wala natan tan wala la nensaman tan onsabi la, say Makapanyarin-amin.”  Siak si Juan, ya agi yo tan kaiba yo ed kairapan tan panarian tan panagsungdo bilang ontutumbok ed si Jesus, so walad isla a tatawagen a Patmos lapud pansasalitak nipaakar ed Dios tan pantatasik nipaakar ed si Jesus. 10  Ta diad panamegley na masanton espiritu, akasabi ak ed agew na Katawan, tan nadngel ko ed benegan ko so maksil a boses, a singa tanol na trumpeta, 11  a kuan to: “Isulat mo ed sakey a lukot no antoy nanengneng mo tan ipawit mo itan ed pitoran kongregasyon, salanti, diad Efeso, Smirna, Pergamo, Tiatira, Sardis, Filadelfia, tan Laodicea.” 12  Tan linmingaw ak pian nengnengen ko no siopa imay mitotongtong ed siak, tan kalingaw ko et anengneng ko so pitoran balitok a kandelero, 13  tan diad pegley na saray kandelero et walay sakey a singa anak na too, a say kawes to et anggad saray sali, tan akabariber ed pagew to so balitok a balkes. 14  Sakey ni, say ulo to tan saray buek to et amputi a singa kaputi na bagoy karnero, singa niebe, tan saray mata to et singa mandarlang ya apoy; 15  tan saray sali to et singa masileng a gansa a popoolan ed hurno; tan say boses to et singa tanol na manag-agus iran danum. 16  Tan diad kawanan a lima to et walay pitoran bitewen, tan diad sangi to et ompapaway so sakey a makdem tan andukey ya espada a duaray-tarem, tan say lupa to et singa agew ya onsisinag no kapetapetangan to. 17  Tan sanen sikatoy anengneng ko, alukbob ak a singa inatey diad salian to. Tan intapew to ed siak so kawanan a lima to tan inkuan to: “Agka natatakot. Siak so Inmuna tan say Kaunoran, 18  tan say sakey a mabilay; tan inatey ak, balet, nia! mabilay ak lawas ed andi-anggaan, tan walad siak iray tombok na patey tan say Hades.* 19  Kanian isulat mo iray anengneng mo, tan saray nagagawa natan tan saray nagawa kayari na saraya. 20  Saya so sagradon sekreto nipaakar ed pitoran bitewen ya anengneng mo ed kawanan a limak, tan nipaakar ed pitoran balitok a kandelero: Say pitoran bitewen et saray anghel na pitoran kongregasyon, tan say pitoran kandelero et say pitoran kongregasyon.

Paimanod leksab

Apo 1:1 * Griego, A·po·kaʹly·psis.
Apo 1:8 * Say Alfa tan say Omega et say unaan tan unor iran letra na Griegon alpabeto.
Apo 1:18 * Nengnengen so Apendise 8.