Apocalipsis 3:1-22
3 “Tan isulat mo ed anghel na kongregasyon ed Sardis: Saraya so inkuan na samay walaan na pitoran espiritu na Dios tan pitoran bitewen, ‘Amtak iray gagawaen mo, ya ompatnag a mabilay ka, balet ta inatey ka.
2 Manbantay ka, tan pabiskeg mo iray atilak ni a magano lan ompatey, ta naimanok ya agmo ni asumpal so kimey a gagawaen mo ed imaton na Dios ko.
3 Kanian, nonot mon naynay no panon so impakaawat mo tan no panon so impakadngel mo, tan itultuloy mon sumpalen itan, tan magbabawi ka. Segurado a no agka onliing, onsabi ak a singa sakey a matakew, tan agmon balot naamtaan no anton oras so isabik.
4 “‘Balet, walaray pigaran totoo ed limog yo diad Sardis ya agda dinutakan iray ilalatop dan kawes, tan kaibak iran manakar ya akakawes na amputi, lapud makanepegan ira.
5 Say manalo so nasulongan sirin na amputi iran ilalatop a kawes; tan agkon balot ekalen so ngaran to ed libro na bilay, noagta bidbiren koy ngaran to diad arap nen Amak tan diad arap na saray anghel to.
6 Samay walaan na layag et ondengel komon ed ibabaga na espiritu ed saray kongregasyon.’
7 “Tan isulat mo ed anghel na kongregasyon ed Filadelfia: Saraya so inkuan na samay masanto, a sikato so tua, a walad sikato so tombok nen David, a mangilulukas pian anggapoy mangikapot, tan mangikakapot pian anggapoy mangilukas,
8 ‘Amtak iray gagawaen mo (nia! nilukasan ko so sakey a puerta ed arapan mo, ya anggapo so makapangikapot,) a walay daiset a pakayarim, tan sinumpal mo so salitak tan pinaneknekan mon matoor ka ed ngaran ko.
9 Nia! Iter ko iramay nanlapud grupo* nen Satanas a mangibabagan Judio ira, anta andi noagta mantitila ra—nia! padagoen ko ra ed sika tan padakmomoen ko ra ed arapan mo tan ipaamtak ed sikara ya inaro ta ka.
10 Lapud ginawam so salitan nadngel mo nipaakar ed impansungdok, salimbengan ta ka no oras na subok, ya onsabi ed interon dalin, pian suboken iramay manaayam ditan.
11 Onsabi ak a tampol. Bembenan mon malet so walad sika, pian anggapoy mangala ed koronam.
12 “‘Say manalo et gawaen kon lusek diad templo na Dios ko, tan sikatoy aglan balot ompaway ditan, tan isulat ko ed sikato so ngaran na Dios ko tan say ngaran na syudad na Dios ko, salanti, say balon Jerusalem ya onleksab manlapud tawen a kawalaan na Dios ko, tan samay balon ngaran ko.
13 Samay walaan na layag et ondengel komon ed ibabaga na espiritu ed saray kongregasyon.’
14 “Tan isulat mo ed anghel na kongregasyon ed Laodicea: Saraya so inkuan na Amen, say matoor tan tuan tasi, say sankaunaan a pinalsa na Dios,
15 ‘Amtak iray gagawaen mo, ya aliwa kan ambetel tan aliwa ka met ya ampetang. Komon ta ambetel ka odino no andi et ampetang ka.
16 Kanian, lapud malainem-em ka tan agka ampetang tan agka met ambetel, iyula ta ka.
17 Lapud ibabagam: “Mayaman ak tan akatipon ak na kaykayamanan tan anggapo lan balot so nakaukolan ko,” balet ta agmo amta a sikay maer-ermen tan pakaskasi tan pobri tan bulag tan lakseb,
18 bilinen ta ka a manaliw ka ed siak na balitok a pinapuro ed apoy ta pian magmaliw kan mayaman, tan amputi iran ilalatop a kawes pian nakawesan ka tan ag-ompatnag so kababaingan mo lapud inkalakseban mo, tan puyok a parad saray matam pian makanengneng ka.
19 “‘Amin iramay aaroen ko et babaaten tan didisiplinaen ko. Kanian magmaliw kan maseseg tan magbabawi ka.
20 Nia! Akaalagey ak ed puerta tan ontotoktok ak. No walay siopaman a makarengel ed boses ko tan lukasan toy puerta, onloob ak ed abung to tan mipangdem ak ed sikato tan midungo ed siak.
21 Samay manalo et abuloyan kon onyurong a kaibak ed tronok, a singa siak met ya analo tan yinmurong a kaiba na Amak diad trono to.
22 Samay walaan na layag et ondengel komon ed ibabaga na espiritu ed saray kongregasyon.’”
