Apocalipsis 14:1-20
14 Tan nia! anengneng ko so Kordero ya akaalagey diad Palandey Sion, tan kaiba to so sanlasus tan apataplo tan apat a libo, ya akasulat ed saray moling da so ngaran to tan say ngaran na Ama to.
2 Tan walay nadngel kon tanol manlapud tawen a singa tanol na manag-agus a danum tan singa tanol na maksil a karol; tan say tanol a nadngel ko et singa boses na saray managkansion a babansagan da itan na saray arpa ra.
3 Tan kakansionen da so singa sakey a balon kanta diad arap na trono tan diad arap na apatiran mabilay a pinalsa tan saray mamasiken; tan anggapoy akaaral ed satan a kanta noag say sanlasus tan apataplo tan apat a libo, a sinaliw diad dalin.
4 Agda dinutakan so inkasikara ed saray bibii; diad tua et birhen ira. Sikara imay nantultuloy a tinmumbok ed Kordero anggan iner so laen to. Sinaliw ira ed limog na katooan bilang unonan bungabunga ed Dios tan ed Kordero,
5 tan anggapoy aromog a katilaan diad saray sangi ra; anggapo so pakabalawan ed sikara.
6 Tan anengneng ko so sakey nin anghel a mantiktikyab ed pegley na tawen, tan walay iyabawag ton agmanganggan maong a balita bilang makapaliket a pakabat ed saramay manaayam diad dalin, diad kada nasyon tan tribu tan lenguahe tan rasa,
7 a kuan to ed maksil a boses: “Takotan yo so Dios tan igloria yo, lapud sinmabi lay oras na panangukom to, kanian dayewen yo imay Sakey a nanggawa ed tawen tan dalin tan dayat tan saray subol na danum.”
8 Tan walay tinmumbok nin sananey, say komaduan anghel, a kuan to: “Naplag la! Naplag la so Makapanyarin Babilonia, samay nampainum ed amin a nasyon na alak na sanok ed impilawanan to!”
9 Tan wala ni sakey a tinmumbok ed sikara, say komatlon anghel, a kuan to ed maksil a boses: “Siopaman a mandayew ed atap ya ayep tan ed imahen to, tan mangawat na marka diad moling to odino diad lima to,
10 inumen to met so alak na sanok na Dios ya imbales ya anggapoy laok diad kopa na sanok to, tan sikatoy napairap ed apoy tan asupre diad imaton na saray masanton anghel tan diad imaton na Kordero.
11 Tan onatagey lawas ed andi-anggaan so asewek na panamairap ed sikara, tan diad agew tan labi et anggapoy painawa ra, saramay mandadayew ed atap ya ayep tan ed imahen to, tan anggan siopa a mangawat ed marka na ngaran to.
12 Dia et nakaukolan so panagsungdo na saray masanto, saray manguunor ed ganggan na Dios tan walaan na pananisia ed si Jesus.”
13 Tan nadngel koy sakey a boses manlapud tawen, a kuan to: “Isulat mo: Maliket iramay inatey a nikasakey ed Katawan manlapud sayan panaon a manpatuloy. On, kuan na espiritu, manpainawa la ra ed saray pansasagpot da, ta akila ed sikara iray agawaan da.”
14 Tan nia! anengneng koy sakey ya amputin lurem, tan diad lurem et walay akayurong a singa anak na too, a walay balitok a korona diad ulo to tan akaegna na sakey a makdem a palot.
15 Tan pinmaway ed santuaryo na templo so sananey ya anghel, a maksil so boses ton kinmelyaw ed samay akayurong diad lurem: “Usar moy palot mo tan manani ka, lapud asabi lay oras na panani, ta alutoluto la so aanien diad dalin.”
16 Tan samay akayurong diad lurem et insingwat toy palot to diad dalin, tan say dalin et naani.
17 Tan pinmaway so sananey nin anghel manlapud santuaryo na templo a walad tawen, a wala met so makdem a palot to.
18 Tan pinmaway ed altar so sananey nin anghel, a walaan na pakayari ed apoy. Tan tinawag to ed maksil a boses imay sakey a walaan na makdem a palot, a kuan to: “Usar moy makdem a palot mo tan tipon mo iray amungkog a sengeg na ubas na dalin, lapud aluto la iray bunga na saratan.”
19 Tan insingwat na anghel so palot to diad dalin tan tinipon to so sengeg na ubas na dalin, tan imbantak to itan ed baleg a panagpespesan na sanok na Dios.
20 Tan say panagpespesan et ginatin-gatinan diad paway na syudad, tan diad panagpespesan et pinmaway so dala a say kaaralem na satan et anggad saray pakalat na saray kabayo, tan akasabi itan angga ed sanlibo tan anem a lasus ya estadio.*
