Apocalipsis 11:1-19
11 Tan niiter ed siak so sakey a tanubong a singa baston tan inkuan to: “Alagey ka tan sukat mo so santuaryo na templo na Dios tan say altar tan saramay mandadayew ditan.
2 Balet say lolooban a walad paway na santuaryo na templo, labsanan mo la itan tan agmo susukaten, lapud niiter itan ed saray nasyon, tan igatin-gatin da so masanton syudad ed apataplo tan duay bulan.
3 Tan pampropesiyaen ko so duaran tasik ed sanlibo duanlasus tan anemaplon agew, ya akasulong ira na sakon abel.”
4 Saraya so isisimbolo na duaran kiew ya olibo tan duaran kandelero tan akaalagey ira ed arap na Katawan na dalin.
5 Tan no walay malabay a mamasakit ed sikara, ompaway so apoy ed sangi ra tan akmonen da iray kakabusol da; tan no walay malabay a mamasakit ed sikara, onia met so pamatey ed sikato.
6 Walay pakayari na saraya a mangikapot ed tawen pian ag-onuran legan na saray agew na pampropropesiya ra, tan walay pakayari ra ed saray danum pian pagmaliwen iratan a dala tan nayarian dan idapo ed dalin so amin a klase na salot kapiganman a labay da.
7 Tan sano asumpal da lay pantatasi ra, say atap ya ayep ya ompaway ed kaaralman et milaban ed sikara tan taloen tan pateyen to ra.
8 Tan saray bangkay da et niiyan naani ed malapar a dalan na baleg a syudad a diad espiritual a pantalos et tatawagen a Sodoma tan Ehipto, a ditan met so angipasakan ed Katawan da.
9 Tan saray totoo ed nanduruman rasa tan tribu tan lenguahe tan nasyon so onnengneng ed saray bangkay da ed talora tan kapalduan agew, tan agda abuloyan a niponpon iray bangkay da.
10 Tan saramay manaayam ed dalin et manliket tan manggayaga ed impatey da, tan manreregaloan ira, lapud pinairap ira na sarayan duaran propeta.
11 Tan kayari na talora tan kapalduan agew, linmoob ed sikara so espiritu na bilay a nanlapud Dios, tan inmalagey ira, tan tinmakot a maong iramay makakanengneng ed sikara.
12 Tan nadngel da so maksil a boses manlapud tawen a kuan to ed sikara: “Segep kayo dia.” Tan sinmegep ira ed tawen diad lurem, tan sankanengneng ira na kakabusol da.
13 Tan diad saman ya oras et yinmegyeg a maksil, tan aderal so kakaplo na syudad; tan piton libo a totoo so inatey ed yegyeg, tan say arum et tinmakot tan inggloria ra so Dios ed tawen.
14 Linmabas lay komaduan desyang. Nia! Say komatlon desyang et maples ya onsasabi.
15 Tan pinaknol na komapiton anghel so trumpeta to. Tan walaray maksil a boses ed tawen a mangibabagan: “Say panarian na mundo et nagmaliw a panarian na Katawan tayo tan say Kristo to, tan sikatoy manuley bilang ari ed andi-anggaan.”
16 Tan say duamplo tan apat a mamasiken ya akayurong ed saray trono ra diad arap na Dios et dinmakmomo tan nandayew ed Dios,
17 a kuan da: “Misalamat kami ed sika, Jehova a Dios, say Makapanyarin-amin, samay Sakey a wala natan tan wala la nensaman, lapud inalam la so baleg a pakayarim tan ginmapo ka lan manuley bilang ari.
18 Balet sinmanok iray nasyon, tan sinmabi so sanok mo, tan say aturon panaon pian ukomen mo iray inatey, tan pian iter mo so tumang ed saray aripen mon propeta tan ed saray masanto tan ed saramay ontatakot ed ngaran mo, saray abeba tan saray atagey, tan pian deralen mo iramay manederal ed dalin.”
19 Tan alukasan so santuaryo na templo na Dios a walad tawen, tan anengneng ed santuaryo na templo to so kaban na sipanan to. Tan walaray kirmat tan boses tan karol tan yegyeg tan maksil ya uran a yelo.
