Apocalipsis 13:1-18
13 Tan nanalagey itan diad buer na dayat.
Tan anengneng ko so sakey ya atap ya ayep ya onsasakbit manlapud dayat, a walaan na samploran saklor tan pitoran ulo, tan diad saray saklor to et walay pitoran korona, balet diad saray ulo to et walaray ngaran a mangaayew ed Dios.
2 Natan say atap ya ayep ya anengneng ko et singa sakey a leopardo, balet saray sali to et singa saray sali na oso, tan say sangi to et singa sangi na leon. Tan inter na dragon ed atap ya ayep so pakayari tan trono tan baleg a pakauley to.
3 Tan anengneng ko so sakey ed saray ulo to a singano sinugatan pian ompatey, balet inmabig so makapatey a sugat to, tan say interon dalin et mandinayew a tinmumbok ed atap ya ayep.
4 Tan indayew day dragon lapud inikdan to na pakauley so atap ya ayep, tan indayew day atap ya ayep, a kuan da: “Siopa so mipara ed atap ya ayep, tan siopa so makapilaban ed sikato?”
5 Tan niiter ed sikato so sangi a mansasalita na mapaatagey iran bengatla tan saray ayew, tan sikatoy naikdan na pakauley ya onkiwas ed apataplo tan dua a bulan.
6 Tan say sangi to et nansalita na saray panag-ayew ed Dios, pian mangayew ed ngaran to tan ed ayaman to, salanti, saramay manaayam ed tawen.
7 Tan sikatoy naabuloyan a milaban ed saray masanto tan taloen to ra, tan naikdan na pakauley ed kada tribu tan rasa tan lenguahe tan nasyon.
8 Tan amin iramay manaayam ed dalin et mandayew ed sikato; anggapoy anggan sakey ed ngaran da a nisulat ed lukot na bilay na Kordero a pinatey, manlapu la ed inkiletneg* na mundo.
9 Siopaman a walaan na layag, sikatoy ondengel komon.
10 Siopaman a niganan nadakep, sikatoy onla a nadakep. Siopaman a mamatey ed panamegley na espada, sikatoy nepeg a pateyen ed panamegley na espada. Dia et nakaukolan so panagsungdo tan pananisia na saray masanto.
11 Tan anengneng ko so sananey ya atap ya ayep ya ompapaway manlapud dalin, tan sikatoy walaan na duaran saklor a singa kordero, balet sikatoy nansalita a singa dragon.
12 Tan uusaren to so amin a pakauley na inmunan atap ya ayep diad imaton na saya. Tan say dalin tan saramay manaayam ditan et pandadayewen to ed inmunan atap ya ayep, ya inmabig so makapatey a sugat to.
13 Tan sikatoy manggagawa na angkakabaleg a tanda, ta pian napaleksab to ed dalin so apoy manlapud tawen diad imaton na katooan.
14 Tan papalikdoen to iramay manaayam diad dalin, lapud saray tanda a niyabuloy a gawaen to ed imaton na atap ya ayep, tan ibabaga to met ed saramay manaayam ed dalin ya igawaan da na sakey ya imahen so atap ya ayep ya asugat na espada ingen ta abilay.
15 Tan sikatoy naabuloyan a mangiter na linawa ed imahen na atap ya ayep, ta pian say imahen na atap ya ayep et mansalita tan nayarian ton papatey so amin ya agmalabay a mandayew ed imahen na atap ya ayep.
16 Tan papasooten to so amin a totoo, saray abeba tan saray atagey, saray mayaman tan saray pobri, saray bulos tan saray aripen, ta pian awaten da so sakey a marka diad kawanan a lima ra odino diad moling da,
17 tan anggapo so makapansaliw odino makapanlako nilikud ed samay toon walaan na marka—say ngaran na atap ya ayep odino say numero na ngaran to.
18 Dia et nakaukolan so karunongan: Samay walaan na pakatalos et bilangen to komon so numero na atap ya ayep, ta numero itan na too; tan say numero to et anem a lasus tan anemaplo tan anem.*
