Apocalipsis 19:1-21
19 Kayari na sarayan bengatla et walay nadngel kon maksil a boses a singa boses na sakey a baleg ya ulop ed tawen. Inkuan da: “Idayew yo si Jah,* sikayoran totoo! Say panangilaban tan say gloria tan say pakayari et kayarian na Dios tayo,
2 lapud matua tan matunong iray panangukom to. Ta impaakseb to lay panangukom ed bantog a balangkantis ya aneral ed dalin diad impilawanan to, tan binmales la ed sikato nisengeg ed dala na saray aripen to.”
3 Tan diad komaduan pankanawnawa et tampol ya inkuan da: “Idayew yo si Jah, sikayoran totoo! Tan say asewek a manlalapud sikato et ontatagey lawas diad andi-anggaan.”
4 Tan say duamplo tan apat a mamasiken tan say apatiran mabilay a pinalsa et dinmakmomo tan indayew da so Dios ya akayurong ed trono, tan inkuan da: “Amen! Idayew yo si Jah, sikayoran totoo!”
5 Ontan met, sakey a boses so nadngel manlapud trono a kuan to: “Idayew yo so Dios tayo, amin yon ariripen to, ya ontatakot ed sikato, saray abeba tan saray atagey.”
6 Tan nadngel koy sakey a boses a singa boses na baleg ya ulop tan singa tanol na manag-agus iran danum tan singa tanol na maksil iran karol. Inkuan da: “Idayew yo si Jah, sikayoran totoo, lapud si Jehova a Dios tayo, say Makapanyarin-amin, et ginmapo lan manuley bilang ari.
7 Manggayaga itayo tan manliket itayon maong, tan sikatoy igloria tayo, lapud asabi la so kasal na Kordero tan akaparaan la so nobya to.
8 On, say nobya et naabuloyan a mangisulong na masileng, malinis, tan pinon lienzo, ta say kabaliksan na pinon lienzo et saray matunong a gawa na saray masanto.”
9 Tan inkuan na anghel ed siak: “Isulat mo: Maliket iramay naimbitaan ed ponsia na kasal na Kordero.” Tan inkuan to ni ed siak: “Saraya so tuan salita na Dios.”
10 Diad saman et dinmakmomo ak ed salian to pian idayew ko. Balet inkuan to ed siak: “Manalwar ka! Agmo itan gagawaen! Sakey ak labat ya aripen, a singa sika tan saray agagim a walaan na kimey a panagtasi nipaakar ed si Jesus. Dayewen moy Dios; ta say panagtasi nipaakar ed si Jesus so gagala na pampropropesiya.”
11 Tan anengneng kon alukasan so tawen, tan nia! sakey ya amputin kabayo. Tan samay akakabayo ed satan et tatawagen a Matoor tan Matua, tan sikato so mangukom tan milaban unong ed inkatunong.
12 Saray mata to et singa mandarlang ya apoy, tan diad ulo to et walay dakel a korona. Walay akasulat a ngaran to ya anggapoy makaamta noag sikato labat,
13 tan sikatoy akasulong na latop a kawes ya awalsikan na dala, tan say inngaran ed sikato et Say Salita na Dios.
14 Ontan met, ontutumbok ed sikato iray armada ed tawen ya akalugan ira ed saray amputin kabayo, tan akakawes ira na amputi, malinis, tan pinon lienzo.
15 Tan diad sangi to et ompapaway so makdem tan andukey ya espada, pian kabilen to iray nasyon diad panamegley na satan, tan pastolan to ra diad panamegley na balatyang a baston. Igatin-gatin to met so panagpespesan na baleg a sanok na Dios a Makapanyarin-amin.
16 Tan diad latop a kawes to, salanti diad tapew na ulpo to et akasulat so ngaran ton, Ari na saray arari tan Katawan na saray katawan.
17 Anengneng ko met so sakey ya anghel ya akaalagey ed pegley na agew, tan sikatoy kinmelyaw ed maksil a boses tan inkuan to ed saray amin a manok ya ontitikyab ed pegley na tawen: “Gali dia, mantitipon kayo parad baleg a pangdem na Dios,
18 pian kanen yo iray laman na saray arari tan laman na saray komandante na militar tan laman na saray mabiskeg a lalaki tan laman na saray kabayo tan saramay akalugan ed saratan, tan saray laman na amin, saray laman na bulos a totoo ontan met ed saray aripen tan saray abeba tan saray atagey.”
19 Tan anengneng ko so atap ya ayep tan saray arari ed dalin tan saray armada ra a nantitipon pian milaban ed samay akalugan ed kabayo tan ed armada to.
20 Tan narel so atap ya ayep, pati say palson propeta a nanggawa ed arapan to na saray tanda ya impamalikdo to ed saray angawat ed marka na atap ya ayep tan saramay mandadayew ed imahen to. Legan a mabilay ni ra, nibantak ira ed mandarlang a dayat a manliob ed asupre.
21 Balet saray arum et pinatey ed panamegley na andukey ya espada na samay akalugan ed kabayo, say espada a pinmaway ed sangi to. Tan saray amin a manok et napsel ed saray laman da.
