Apocalipsis 12:1-17
12 Tan anengneng ed tawen so sakey a baleg a tanda, sakey a biin akawesan na agew, tan akatoon ed bulan iray sali to, tan say ulo to et akoronaan na labinduan bitewen,
2 tan malukon. Tan sikatoy inmeyag lapud pampapasakit to tan paniirap to ed pananak.
3 Tan anengneng ed tawen so sananey nin tanda, tan nia! sakey a baleg ya ambalangan dragon, a walaan na pitoran ulo tan samploran saklor tan saray ulo to et walaan na pitoran korona;
4 tan ingguyor na ikol to so kakatlo na saray bitewen ed tawen, tan imbantak to iratan diad dalin. Tan nanalagey so dragon ed arapan na bii a magano lan mananak, pian sano nananak la et akmonen to so ugaw.
5 Tan say bii et angiyanak na sakey ya ugaw, sakey a laki, a mangipastol ed amin a nasyon diad panamegley na balatyang a baston. Tan say anak to et tampol ya inyakar ed Dios tan diad trono to.
6 Tan say bii et binmatik ed kalawakan, ta walay pasen to diman ya imparaan na Dios, pian sikatoy pakanen da diman ed sanlibo duanlasus tan anemaplon agew.
7 Tan agawa so guerra ed tawen: Si Miguel tan saray anghel to et akilaban ed dragon, tan say dragon tan saray anghel to et akilaban
8 balet ag-itan analo, tan anggapo lay pasen ed tawen parad sikara.
9 Kanian imbantak so baleg a dragon, say daan ya uleg, samay tatawagen a Diablo tan Satanas, a mamapalikdo ed interon mundo;* sikatoy imbantak diad dalin, a kaiba to iray anghel to.
10 Tan walay nadngel kon maksil a boses ed tawen, a kuan to:
“Sinmabi lay kilalaban tan say pakayari tan say panarian na Dios tayo tan say pakauley na Kristo to, lapud nibantak lay mangaakusa ed saray agagi tayo, ya aakusaen to ra ed agew tan labi diad arap na Dios tayo!
11 Tan sikatoy tinalo ra lapud dala na Kordero tan lapud mensahe ya ipupulong da, tan agda pinabli iray kamarerwa ra anggano nipaarap ira ed ipapatey.
12 Lapud saya et manliket kayo katawenan tan sikayoran manaayam ditan! Kasi lay dalin tan say dayat, lapud linmeksab ed sikayo so Diablo, ya agaylay pasnok to, ta amta ton antikey lay panaon to.”
13 Natan sanen nibantak la diad dalin so dragon, pinasegsegang to so bii ya angiyanak ed ugaw a laki.
14 Balet say bii et naikdan na duaran payak na baleg ya agila, pian makatikyab diad pasen to ed kalawakan; diman et sikatoy pakanen ed sakey a panaon tan duaran panaon tan kapaldua na sakey a panaon ya arawi ed uleg.
15 Tan say uleg et angibuga na danum a singa ilog diad benegan na bii, pian sikatoy nalener ed ilog.
16 Balet say dalin et tinmulong ed bii, tan sinmangi so dalin tan inakmon toy ilog ya imbuga na dragon.
17 Tan say dragon et sinmanok ed bii, tan akilaban ed saray nakekeraan a bini na bii, a manguunor ed saray ganggan na Dios tan walaan na kimey a panagtasi nipaakar ed si Jesus.
